3 JOHAN THUMNA 1 - Tedim Bible

¹ Upa in a man takin ka it Gaias kong zasak hi.

² Ka it mi aw, na lungsim a nopsak mah bangin nangmah in na khempeuhah nopsakna leh cidamna na ngah nading thu ka ngen hi.

³ Nang in thuman thutak na zuih mah bangin na neihsa thuman thutak ah na cihtakna thu ute naute in hong pai a, teci hong pan’ uh ciangin ka nuam mahmah hi.

⁴ Ka tate in thuman thutak lam a zuih thu ka zak cianga ka nuamna sangin nuam zawkna a om kei hi.

Gaias’ Zindona Kiphat

⁵ Ka it mi aw, nangmah in ute naute tungah ahi zongin, zinte tungah ahi zongin na bawlna khempeuh, dikna tawh kipawlin a bawl na hi hi.

⁶ Tua mite in na itna thu pawlpi mai-ah teci a pang uh hi. Nangmah in Pasian’ deihna tawh kituakin tua mite amau lampi ah na khak leh, a pha a bawl na hi ding hi.

⁷ Bang hang hiam na cih leh, amaute in Topa’ min hangin Gentailte lakah huhna la loin a pai uh hi.

⁸ Tua hi a, eite in thuman thutak a huh mi i suah nadingin tua bang mite zin i do ding a kilawm hi.

Diotrefes’ Langpan’na

⁹ Pawlpi kiangah vaikhakna lai gelhin ka pia zo hi. Ahih hangin a uk a lian a suak nuam Diotrefes in ka thu a mang kei hi.

¹⁰ Tua a hih ciangin ka hong pai ciangin amah in a bawlna thu ka phawksak kik ding hi. Amah in en’na, siatsak nopna kam tawh kote hong kosia tham loin, ute naute ama innah a tungsak nuam kei hi. A tungsak nuam mite zong khamin, pawlpi sung pan a hawlkhia hi.

Demetrias’ Thu A kihoih Genna

¹¹ Ka it mi aw, a sia lam zui kei in, a hoih lam zui in. A hoih a gamta mi in Pasian tawh kipawl hi. A hoih lo a a gamta mi in Pasian a mu nai kei hi.

¹² Mi khempeuh in Demetrias ading teci a hi uh hi. Thuman thutak in zong ama teci a hi hi. Ahi hi, kote in zong tua mi lamah teci ka pang uh hi. Kote teci pan’na thu in a man hi ci-in na thei hi.

Tawpna Hopihna

¹³ Ka gelh ding thu tampi a om hangin laikung leh laitui tawh gelh ding ka deih kei hi.

¹⁴ A sawt loin nang tawh kimu-in, khat leh khat kihopihin i kikup khop ding ka lamen hi.

¹⁵ Nangma tungah nopna om ta hen. Lawmte in nang hong hopih uh hi. Na kiangah a om lawmte a minin lo-in na hopihsak in.