2 TIMOTI NIHNA 2 - Tedim Bible

Khazih Zeisu’ Galkap Hoih

¹ Tua ahih ciangin ka ta aw, nangmah in, Khazih Zeisu sungah a om hehpihna thupha tawh thahatin om in.

² Teci tampi mai-ah keima kiang pan na zaksa nate, dikna tawh dimin midangte a hilhsawn thei ding mite’ tungah na ap in.

³ Nang in Khazih Zeisu’ galkap siampa bangin keimah tawh gimna na thuak khawm in.

⁴ Na a sep lai takin galkap in amah galkap a tumsak mi’ deihna bangin ahih theih nadingin, hih leitung vaite tawh a kikai-awk sak kei hi.

⁵ Tua mah bangin mi khat in tai a kidem ciangin ngeina bangin a kidem kei leh, a gualzote’ ngah lukhu a ngah kei ding hi.

⁶ Nasep hahkat lokho mi in a gahte a ngah masapen ahi ding hi.

⁷ Ka thu na ciamteh in. Bang hang hiam cih leh, Topa in na khempeuh ah pilna a hong pia ding hi.

⁸ Kei’ gen Lungdamna Thu bangin David’ suan ahi, sihna pan a hingkik Zeisu Khazih na ngaihsun in.

⁹ Tua Lungdamna Thu hangin keimah in mi gilo bangin khau kikhihna dongin gimna ka thuak hi. Ahih hangin Pasian’ thu ahih leh, a kikhihna om lo hi.

¹⁰ Tua ahih ciangin a kiteel mite in zong a tawntung minthan’na tawh Khazih Zeisu sungah gupna a ngah nadingun na khempeuh ka thuak hi.

¹¹ A dikna thu panin: ‘Amah tawh sihna i thuakkhawm zawh leh, Amah tawh i hingkhawm ding hi;

¹² I thuak leh, amah tawh i maangkhawm ding hi. Eite in amah i nial leh, Amah in eite hong nial ding hi.

¹³ Eite i muanhuai loh hangin, Ama muanhuaina a kip den hi. Bang hang hiam cih leh, Amah in amah leh amah a kitheihmawh bawl thei kei hi.

Dik Akisa Nasempa

¹⁴ Hih thu teng amaute na phawksak in. Bangmah phattuamna a piangsak lo, a za mite’ lungsim a siasak ding kam bek hangin kinialna a om loh nadingin, Topa mai-ah amaute ciamna thu na pia in.

¹⁵ Nangmah in zumhuaina om loin thuman thutak a man takin a khen theipa na suah nadingin Pasian mai-ah a deihhuai mi suakin, na pumpi na piak nadingin ah hahkat in.

¹⁶ Thutak hi lo, a mawkna kamte na tang in.

¹⁷ Bang hang hiam cih leh, tuate in Pasian biak lohna lamah khangto-in, a dam ngei lo meima bangin a ne ding hi. Tua mite lakah Himenaius leh Filetas a om uh hi.

¹⁸ Amaute in, “Misite’ thawhkikna a kheng zo hi,” ci-in thu-upna lam pan pialin mi kimkhatte’ upna a siasak uh hi.

¹⁹ Ahih hangin, “Topa in ama mite a thei hi,” ci-in ahi zongin, “Topa’ min a muangte in dik lohna pan paikhia hen,” ci-in ahi zongin ciamtehna a om, a to mahmah Pasian’ bulpi in, kipin a om hi.

²⁰ Inn lian mahmah sungah kham leh ngun nate bek a om kei hi; sing nate leh lei nate zong a om hi. Tua nate lakah kimkhat in minthan’na ding a om hi, kimkhat in minthan’ loh nading a om hi.

²¹ Tua ahih ciangin tua nate tawh ama pumpi a kisiangthosak mi in minthan’na na, siangthona na, inn neipa zat ding a kilawm na, nasepna pha pawl khempeuh ading a suak ding hi.

²² Khangno’ deihgawhna lungsim na tang in la, lung siangthona tawh Pasian kiangah thu a ngen mite tawh, dikna, upna, itna leh nopna delhin na zuikhawm in.

²³ Hai-a pilna om lo thu kidotna in kitotna piangsak thei hi ci-in thei in la, tang in.

²⁴ Pasian’ sila in a kitawng thei kei hi, mi khempeuhte thu dam takin ahih thei mi, thu a hilh thei mi, a thuak zo mi ahi ding hi.

^25-26 A kam a nial mite in thuman a theih nadingun Pasian in kisikkikna pia kha ding a, Dawimangpa in ama deihna zui dingin thangsiah-a a awk mite phawkin, tua awkna pan suahtakna a ngah khak theih nadingun lungnemna tawh thuhilh mi ahi ding hi.