2 SAMUEL NIHNA 17 - Tedim Bible

Ahithofel’ Thugente Hushai in Zo

¹ Tua tham loin Ahithofel in Absalom kiangah, “Mi tulsawm leh tulnih hong teelsak in, keimah kuan khia-in tu zanin David ka delh ding hi.

² Amah gimin lungkia-in a om lai takin amah ka hih ding a, amah ka amkhamsak ding hi; tua ciangin amah tawh a om mi khempeuh tai ding uh hi. Keimah in kumpipa bek ka satpuk ding a,

³ mothak in a pasal kiang inn-ah hong ciah bangin mi khempeuh nang kiangah kong ciahpih kik ding hi. Nangmah in mi khat bek’ nuntakna na zong hi, midang khempeuh nuam takin om ding uh hi,” a ci hi.

⁴ Tua thugenna in Absalom leh Israel upate khempeuh lungkimsak hi.

⁵ Tua ciangin Absalom in, “Arkhi mi Hushai zong sam un, ama thugen za ni,” a ci hi.

⁶ Absalom kiangah Hushai hong pai ciangin, Absalom in ama kiangah, “Tua bangin Ahithofel in thugen hi; ama genna bangin i hih ding hiam? Tua ahih kei leh nang gen in,” a ci hi.

⁷ Tua ciangin Hushai in Absalom kiangah, “Tu tungin Ahithofel’ hong thugen hoih lo hi,” a ci hi.

⁸ Hushai in tua tham loin, “Na pa leh a mite mi thahat hi a, gam lakah a note a kilaksak vompi bangin amaute a hehna na thei hi. Tua ban-ah na pa in galdona-ah a siam ahi hi; amah in mite tawh zan-in omkhawm lo ding hi.

⁹ En in, tu nangawnin amah dum khat sungah ahi a, mun dang khatah ahi zongin bu khin ding hi. Kisim cilna-ah mi pawlkhat a tuk ciangin tua thu a za mi peuhpeuh in, ‘Absalom a zui mite lakah sihna om khin hi,’ ci ding hi.

¹⁰ Tua ciangin a lungtang humpinelkai lungtang a bang galhang mipa nangawn launa tawh lungkia gawp ding hi; bang hang hiam cih leh Israelte khempeuh in na pa mi thahat ahihna leh amah tawh a om mite mi hangsan ahihna thei uh hi.

¹¹ Ahih hangin keima ngaihsutna in, Dan panin Bersheba ciang dong, tuipi gei-a sehnel bangin a tam Israelte khempeuh nang kiangah khawmin galdo dingin nangmah mah na pai ding hi.

¹² Tua ahih ciangin amah i muhna mun khatpeuhah amah i hih ding a, lei lakah daitui kia bangin amah i tuam ding hi; amah leh amah tawh a om mi khempeuh khat zong kisiit lo ding hi.

¹³ Amah khuapi khat sungah a nungkik leh, Israelte khempeuh in tua khuapi sungah khauhual paipihin tua lai mun-ah suangtang khat nangawn a kimu nawn lo dingin kuam sungah tua khua i kaikhia ding hi,” a ci hi.

¹⁴ Tua ciangin Absalom leh Israel mite khempeuh in, “Arkhi mi Hushai’ thugen in Ahithofel’ thugen sangin hoihzaw hi,” a ci uh hi. Bang hang hiam cih leh Topa in Absalom tungah siatna a tun’sak theih nadingin Ahithofel’ thugen hoih tawh a zawh ding Topa in a sehsa ahi hi.

¹⁵ Tua ciangin Hushai in siampi Zadok leh Abiathar kiangah, “Tua bang tua bangin Ahithofel in Absalom leh Israel upate kiangah gen hi; tua bang tua bangin keimah in thu ka gen hi.

¹⁶ Tua ahih ciangin tu-in manlang takin sawl in la, David kiangah, ‘Tu zanin gamlak tui ngahmunte-ah giak kei in la, bangbang hita leh gal kah in; tua hi kei leh kumpipa leh amah tawh a om mite khempeuh hong kivalhtum ding hi,’ ci-in gen in,” a ci hi.

¹⁷ Tu-in Jonathan leh Ahima-az in Enrogel-ah ngak uh hi; nasem numei khat pai-in amaute kiangah genin, amaute pai-in Kumpi David kiangah gen zel uh hi; bang hiam cih leh amaute khuapi sungah a lut uh a kimu lo ding ahi hi.

¹⁸ Ahih hangin tangval khat in amaute mu-in Absalom kiangah gen hi; tua ahih ciangin amaute gel manlang takin paikhia uh a, a huang sungah tuikhuk a nei Bahurim-a mi khat’ inn-ah tung uh hi; amaute tuikhuk sungah paisuk uh hi.

¹⁹ Tua ciangin a numei in khuhna khat la-in tuikhuk gong tungah phah a, tua tungah an zalh hi; bangmah kithei lo hi.

²⁰ Absalom’ nasemte tua nu’ inn-ah hong tun’ ciangin amaute in, “Ahima-az leh Jonathan koi lai-ah om ahi uh hiam?” a ci uh hi. A numei in amaute kiangah, “amaute lui gal khatah paikhin zo uh hi,” a ci hi. Amaute in zongin a muh zawh loh uh ciangin Jerusalem ah ciahkik uh hi.

²¹ Amaute a paikhiat khit ciangin tuikhuk panin mite hong paikhia uh a, pai-in Kumpi David kiangah gen uh hi. Amaute in David kiangah, “Ding in, tui gal khatah manlang takin pai in; bang hang hiam cih leh tua bang tua bangin nangma lang khatah Ahithofel in thu gen hi,” a ci uh hi.

²² Tua ciangin David leh amah tawh a om mi khempeuh ding uh a, amaute in Jordan kantan uh hi; khuavak ciangin Jordan a kantan nai lo khat beek om nawn lo uh hi.

²³ Ahithofel in ama thugen a kizuih loh a muh ciangin a la tutphah vawhin ama khuapi a inn-ah nuak ciah hi. Tua ciangin amah in a innkuan vai hawmsak a, tua ciangin amahmah gui-awk hi; amah si a, a pa’ han-ah kivui hi.

Mahanaim-ah David

²⁴ Tua ciangin Mahanaim-ah David tung hi. Absalom in Israel mite khempeuh tawh Jordan kantan hi.

²⁵ Tu-in Absalom in Joab tangin galkapte a uk dingin Amasa koih khin hi. Amasa in Nahash’ tanu Abigail a ten’pih, Ishmael mi ahi Ithra min nei mi khat’ tapa hi a, ama nu Abigail leh Joab’ nu Zeru-iah unau ahi hi.

²⁶ Israelte leh Absalom in Gilead gamah giahphual sat uh hi.

²⁷ Mahanaim-ah David a tun’ ciangin, Ammon mite’ gam Rabbah panin Nahash’ tapa Shobi, leh Lodebar panin Ammiel’ tapa Makhir, leh Rogelim panin Gilead mi Barzillai,

²⁸ in lupnate, kuangte, leh leibeelte, mangbuh, mangbuhham, an, ankan, bepi leh basan,

²⁹ khuaizu leh bawngnawi-thaukhal leh tuu leh sathaukhalte, David leh amah tawh a om mite’ nek dingin hong puak uh hi; bang hang hiam cih leh amaute in, “Mite gam lakah gilkialin, gimin dangtak uh hi,” a ci uh hi.