2 SAMUEL NIHNA 10 - Tedim Bible

Ammon mite leh Siria mite a Kizawhna

¹ Hih hun khit ciangin Ammon mite’ kumpipa si a, a tapa Hanun in ama tangin uk hi.

² Tua ciangin David in, “Keima tungah a pa thuman takin hong gamtat bangin Nahash’ tapa Hanun’ tungah thuman takin ka gamta ding hi,” a ci hi. Tua ahih ciangin David in a pa’ hangin amah a hehnem dingin a nasemte sawl hi. David nasemte Ammon mite’ gamah va tung uh hi.

³ Ahih hangin Ammon mite’ uliante in a topa uh Hanun kiangah “David in nangma kiangah hehnemte hong sawl manin na pa a pahtawi hi, ci-in ngaihsun na hi hiam? David in a nasemte khuapi sung a en ding, thu kansim ding, leh a lawnthal dingin hong sawl hilo ahi hiam?” a ci uh hi.

⁴ Tua ahih ciangin Hanun in David’ nasemte manin a khamul uh a lang ciat kiat khiatsak a, a puan uh a laizang, a kawng ciangah at khiatsakin amaute sawlkhia hi.

⁵ David kiangah tua thu a kigen ciangin amaute dawn dingin amah in mi sawl hi; bang hang hiam cih leh a mite nakpi takin maizum uh hi. Kumpipa in, “Na khamul uh a khan’ mateng Jerikho ah om un la, tua ciangin hong ciah un,” a ci hi.

⁶ Ammon mite in amaute David’ huat mi a suah khitna uh a muh uh ciangin Ammon mite in mi sawlin Bethrehob-a Siria mite, leh Zobah-a Siria mite, khe galkap tul sawmnih, leh Ma-akah kumpipa, mi tulkhat tawh, Tob mite mi tulsawm leh tulnih cial uh hi.

⁷ David in hih thu a zak ciangin amah in Joab leh a thahat mihon khempeuh sawl hi.

⁸ Tua ciangin Ammon mite hong kuankhia-in kulh kongpi lutna-ah gal sim dingin pang uh hi; Zobah leh Rehob-a Siria mite, Top mite, leh Ma-akahte, gamlakah amau pawl ciatin om uh hi.

⁹ Joab in a mai leh a nungah amah do dingin gal in a pan’na a muh ciangin, amah in Israelte a kitengkhia mi pawlkhat teel a, Siria mite do dingin pang sak hi;

¹⁰ ama mi a om lai teng a sanggampa Abishai’ ukna sungah koih a, Ammon mite’ lang khatah amaute pangsak hi.

¹¹ Tua ciangin amah in, “Siria mite kei adingin a hat luat leh kei nong huh ding hi; ahih hangin Ammon mite nang adingin a hat luat leh kei hong pai-in nang kong huh ding hi.

¹² Kihangsak in, i mite ading leh i Pasian’ khuapite adingin kipasalsak ni; Topa in hoih a sak bangin hong hih ta hen” a ci hi.

¹³ Tua ahih ciangin Joab leh amah tawh a om mite in Siria mite a do dingin naih uh hi; tua ciangin ama mai-ah amaute tai uh hi.

¹⁴ Ammon mite in Siria mite a tai a muh ciangin amaute zong Abishai mai-ah tai-in khuapi sungah lut uh hi. Tua ciangin Ammon mite a dona panin Joab ciah-in Jerusalem ah tung hi.

¹⁵ Israelte in amaute a zawhna thu Siria mite in a muh uh ciangin amau mahmah kikaikhawm uh hi.

¹⁶ Tua ciangin Hadadezer in mi sawlin Eufrates galkhat-a Siria mite paikhiatpih hi; Hadadezer’ galkap mangpa Shobak makai-in amaute Helam-ah tung uh hi.

¹⁷ Hih thu David kiangah a kigen ciangin amah in Israelte khempeuh kaikhawm a, Jordan kantanin Helam tung hi. David do dingin Siria mite na pangin amah tawh kido uh hi.

¹⁸ Israelte mai-ah Siria mite tai uh hi; David in leeng za sagih a hawl, Siria mite’ leh sakol tuang mi tulsawmli thatin, amau’ galkap mangpa Shobak liamsakin, tua lai-ah amah si hi.

¹⁹ Hadadezer’ nasem ahi kumpite khempeuh in Israelte in amaute a zawhna thu a muh uh ciangin, amaute in Israelte tawh kilemna bawl uh a, amaute’ khutnuai mi suak uh hi. Tua ahih ciangin Ammon mite a huh lai ding uh Siria mite lau ta uh hi.