2 PETER NIHNA 1 - Tedim Bible

Hopihna

¹ Zeisu Khazih’ sila leh sawltak keimah Simon Piter in, eite Pasian leh Honpa Zeisu Khazih’ dikna hangin kote thu-up bangin a manpha upna a ngah mite ka hong zasak hi.

² Pasian leh i Topa Zeisu’ theihtel pilna hangin hehpihna thupha leh nopna in note tungah kicing takin om ta hen.

Note Hong Kisapna Leh Hong Kiteelna

³ Tua mah bangin ama minthan’na leh ama dikna tawh hong sam Pasian’ theihtel pilna hangin, eite nuntakna leh Pasian lamah nopsakna tawh kipawl na khempeuh ama vangliatna siangtho a hong pia zo hi.

⁴ Tuate hangin zong a manpha a lian mahmah thuciamnate eite hong pia zo hi. Bang hang hiam na cih uh leh, hih thuciamnate suangin deihgawhna hangin hih leitungah a om kisiat gawpna tawh note in kipelhin, Pasian’ nuntakna tawh kizom mi na suah nading uh ahi hi.

⁵ Ahi hi. Tua thu hangin note in upna tungah hoihna, hoihna tungah lungpilna,

⁶ lungpilna tungah noptat khamna, noptatna khamna tungah thuakna, thuakna tungah Pasian biakna lamah nopsakna,

⁷ Pasian biakna lamah nopsakna tungah ki-unau itna, ki-unau itna tungah ki-itna hahkat mahmahin na koih thuap un.

⁸ Bang hang hiam na cih uh leh, tua thupha teng note in nei-in na hauh uh leh, i Topa Zeisu Khazih’ theihtelna-ah thadah loh nading ahi zongin, a gah om lo mawkna ahih loh nading ahi zongin, hong bawlpha thei uh hi.

⁹ Tua gamtat pha a nei lo mi in mittaw a, a muhna tom a, ama mawhna luite sawp siangna thu a mangngilh hi.

¹⁰ Tua ahih ciangin ute naute aw, note hong sapna leh hong teelna kipsak nadingin, nakpi-in hahkat zaw un. Tua bang na hih uh leh, na puk ngei kei ding uh hi.

¹¹ Tua bang hangin eite Topa leh Honpa Zeisu Khazih’ tawntung Gam sung lut theihna thu note a kicingin hong kipia ding hi.

¹² Tua ahih ciangin na ngahsa uh thuman thutak note in thei-in tua thu-ah kip khin na hi uh zongin tua nate ngaihsunin note hong phawksak kik dingin ka om khol tawntung ding hi.

¹³ I Topa Zeisu Khazih in hong lah sa mah bangin a sawt loin ka pumpi nuntakna ka nutsiat ding thei ka hih ciangin,

¹⁴ hih pumpi nuntakna-ah ka om lai takin note hong phawksakin, kong hansuah ding kilawm ka sa hi.

¹⁵ Ahi hi. Ka sih khit ciangin note in hih thute na phawk tawntung nading uh ka hahkat ding hi.

Khazih’ Thupina A mu Tecite

¹⁶ Kote in i Topa Zeisu Khazih’ vangliatna ahi zongin, a hong paikikna thu ahi zongin, note kiangah kong gen uh ciangin pilna tawh kibawl tangthu zui loin, a thupitna leh a liatna mu-in teci ka hi uh hi.

¹⁷ Bang hang hiam na cih uh leh, “Hihpa in ka lung hong damsak ka it ka Tapa hi,” ci-in Vanglian Bel sung pan tua Topa tungah aw khat hong tun’ ciangin, Pa Pasian kiang pan minthan’na leh liatna a ngah hi.

¹⁸ Kote in mual siangtho tungah Topa tawh ka omkhawm lai takun, van panin tua aw ka za uh hi.

¹⁹ Tua bang hangin kamsangte’ thugenna thu, eite adingin a kip zaw hi. Note lungsim sungah khuavakin, zingsol suak a, khua hong vak dongin tua thu, khuamialna-ah a tang meivak bangin ngaihsunin na belh dingun a kilawm hi.

²⁰ Lai Siangtho-ah a om Pasian’ kamsangte’ thu in mi ut thu bangin a khiatna dawk lo hi ci-in a masa belin na thei un.

²¹ Bang hang hiam na cih uh leh, Pasian’ kamsangte’ thu in mi’ deih bangin hong tung ngei kei hi, Kha Siangtho hansuahna ngahin mite in Pasian kiang pan a gen sawn uh hi.