2 KUMPI NIHNATE 9 - Tedim Bible

Israel Kumpi-in Jehu sathau Kinilh

¹ Tua ciangin kamsang Elisha in kamsangte’ sung pan khat samin ama kiangah, “Kithawi in la, hih sathau um tawi-in Ramoth-gilead ah va pai in.

² Na tun’ ciangin, Nimshi’ tapa Jehoshafat, a tapa Jehu tua lai-ah va zong in; tua ciangin pai-in a lawmte lak panin a paikhiat ding sawl in la, inndei sungnung khat sungah amah paipih in.

³ Tua ciangin sathau um la-in ama lu tungah sung in la, ‘Topa in hih bangin ci hi, ‘Israel tungah kumpi-in sathau kong nilh hi, ci hi,’ va ci in. Tua ciangin kongkhak hong in la, tai in; zekai kei in,” a ci hi.

⁴ Tua ahih ciangin kamsang tangvalpa Ramoth-gilead ah pai hi.

⁵ Amah a tun’ ciangin, en in, galkap a ukte in thu kikupna nei uh hi; tua ciangin amah in, “Ukpa aw, nang tungah thugen ding khat ka nei hi,” a ci hi. Tua ciangin Jehu in, “Kote lakah kua tungah nei na hi hiam?” a ci hi. Tua ciangin amah in, “Nangma tung hi, ukpa aw,” a ci hi.

⁶ Tua ahih ciangin amah ding-in inn sungah pai hi; tua ciangin tangvalpa in ama lu tungah a sathau sungin, ama kiangah, “Israel Pasian, Topa in hih bangin ci hi, Israel mite’ tung, Topa’ mite tungah kumpi-in nang sathau kong nilh hi.

⁷ Kamsang ka nasemte a thahna leh Topa’ nasemte khempeuh a thahna hangin Jezebel tungah phu ka lak theih nadingin na topa Ahab innkuan na satpuk ding hi.

⁸ Bang hang hiam cih leh Ahab innkuan sia ding hi; Israel sungah keimah in Ahab’ innkuan panin sal hita leh a suakta hita leh pasal khempeuh ka beisak ding hi.

⁹ Tua ciangin keimah in Nebat’ tapa Jeroboam’ innkuan leh Ahijah’ tapa Baasha’ innkuan bangin Ahab’ innkuan ka bawl ding hi.

¹⁰ Tua ciangin uite in Jezre-el gam sungah Jezebel ne-in, kuamah in amah vui lo ding hi,” a ci hi. Tua ciangin amah in kongkhak hongin tai hi.

¹¹ A topa’ nasemte kiangah Jehu hong pusuah ciangin amaute in ama kiangah, “Thu khempeuh a hoih hiam? Bang hangin hih mi haipa nang kiangah hong pai ahi hiam?” a ci uh hi. Tua ciangin amah in amaute kiangah, “A mipa leh a thugen na thei uh hi,” a ci hi.

¹² Tua ciangin amaute in, “Tua thu ka thei kei uh hi; tu-in ko kiangah hong gen in,” a ci uh hi. Tua ciangin amah in, “Tua bang tua bangin amah in kei kiangah thu hong genin, ‘Topa in hih bangin ci hi, Israel tungah kumpi-in nang sathau kong nilh hi,’ hong ci hi,” a ci hi.

¹³ Tua ciangin nawhsa-in mi khempeuh in a puan uh la-in ama din’ nadingin kahlei tungah koih uh a, tua ciangin amaute in peengkul tumin, “Jehu in kumpi hi,” ci-in tangko uh hi.

Jehu in Joram That

¹⁴ Tua ciangin Nimshi’ tapa Jehoshafat tapa Jehu in Joram sawmsim hi. (Tu-in Siria kumpi Hazael langpangin Ramoth-gilead ah Israel khempeuh tawh khuacingin Joram om hi;

¹⁵ ahih hangin Siria kumpi Hazael tawh a kido lai-in Siriate in amah a liamsakna mate Jezre-el ah a kidamsak dingin kumpi Joram ciahkik khin hi.) Tua ahih ciangin Jehu in, “Hih in na ngaihsutna uh tawh a kituah leh Jezre-el ah pai-in thu a va ko dingin khuapi panin kuamah paikhia sak kei un,” a ci hi.

¹⁶ Tua ciangin Jehu a leeng tungah kahin Jezre-el ah pai hi, bang hang hiam cih leh tua lai-ah Joram lum hi. Tua ciangin Judah kumpipa Ahaziah Joram kiangah a hawh dingin na tung khin hi.

¹⁷ Tu-in Jezre-el tausang tungah galvilpa ding a, amah hong pai lai takin Jehu’ pawlte amah in mukhia a, “Mi honkhat ka mu hi,” a ci hi. Tua ciangin Joram in, “Sakol tung tuang mi khat la-in amaute dawn dingin sawl in la, ‘Thuhoih ahi hiam?’ ci sak in,” a ci hi.

¹⁸ Tua ahih ciangin sakol tung tuangin amah dawn dingin mi khat pai a, “Kumpipa in hih bangin ci hi, ‘Thuhoih ahi hiam?’ ci hi,” a ci hi. Tua ciangin Jehu in, “Thuhoih tawh bang hih ding na hi hiam? Kihei in la, ka nungah hong tuang in,” a ci hi. Tua ciangin galvilpa in thu zasakin, “Kamtaipa in amaute kiang ban a, ahih hangin amah hong paikik lo hi,” a ci hi.

¹⁹ Tua ciangin amah in sakol tung tuang a nihna sawlin amaute kiangah tuapa pai a, “Kumpipa in hih bangin hong ci khin hi, ‘Thuhoih ahi hiam?’ ci hi,” a ci hi. Tua ciangin Jehu in dawngin, “Thuhoih tawh bang hih ding na hi hiam? Kihei in la, ka nungah hong tuang in,” a ci hi.

²⁰ Galvilpa in thu zasak kikin, “Amah in amaute va ban a, ahih hangin amah hong paikik lo hi. A hawlzia in Nimshi’ tapa Jehu’ hawl tawh kibang hi; bang hang hiam cih leh amah in nakpi takin hawl hi,” a ci hi.

²¹ Joram in, “Kithawi un,” a ci hi. Tua ciangin amaute in a leeng kithawisak uh hi. Tua ciangin Israel kumpipa Joram leh Judah kumpipa Ahaziah, a sakol leeng tuak uhah tuangin dingkhia-in, Jehu dawntuah dingin pai uh a, Jezre-el mi Naboth’ leitangah amah tawh kituak uh hi.

²² Joram in Jehu a muh ciangin amah in, “Jehu aw, thuhoih ahi hiam?” a ci hi. Amah in dawngin, “Na nu Jezebel’ paktatnate leh aisannate tua zahin a tam lai teng bang thuhoih om thei ding ahi hiam?” a ci hi.

²³ Tua ciangin Joram in a sakol kamkaih leh hei-in tai a, Ahaziah kiangah, “Ahaziah aw, gal om!” a ci hi.

²⁴ Tua ciangin Jehu in a thaneih khempeuh tawh a thal keekin a liangko nih kikal sanah Joram kap a, a thaltang in a lungtang pailetin a leeng sungah amah puksuk hi.

²⁵ Jehu in amah a huhpa Bidkar kiangah, “Amah tawmto in la, Jezre-el mi Naboth’ neihsa leitang tungah amah paai in; bang hang hiam cih nang leh kei in a pa Ahab’ nungah mai kimin i tuan’ lai takin amah langpangin Topa in hih thu a genna phawk in:

²⁶ ‘Zan ni-in Naboth leh a tapate a kithahna ka muh taktak mah bangin—Topa in ci hi—leitang tung hih munah nang kong thuk ding hi,’ a ci hi. Tua ahih ciangin tu-in Topa’ thugen bangin amah tawmin tua mun leitang tungah paai in,” a ci hi.

Jehu in Ahaziah That

²⁷ Judah kumpipa Ahaziah in hih thu a muh ciangin Bethhaggan lamah tai hi. Tua ciangin Jehu in amah delhin, “Amah zong kap un,” a ci hi; tua ciangin amaute in Ibleam gei, Gur kahtohna san a leeng sungah amah kap uh hi. Ahi zongin amah Megiddo khuapi ciang dong tai zo lai a, tua khua panin amah si hi.

²⁸ A nasemte in leeng khat tawh Jerusalem ah pua uh a, David khuapi sungah a pate tawh ama hanah vui uh hi.

²⁹ Ahab’ tapa Joram’ kum sawm-le-khatna kumin Ahaziah in Judah tungah uk ding kipan hi.

Jezebel’ Sihna

³⁰ Jezre-el ah Jehu hong tun’ ciangin Jezebel in a thu za hi; amah in a mitte zutin a lutang zeem a, kongvangneu ah khuadak hi.

³¹ Kulh kongpi-ah Jehu hong lut lai takin amah in, “Nang Zimri, a topa a thatpa aw, bang hih-a hong pai na hiam?” a ci hi.

³² Tua ciangin kongvangneu lamah amah khuadak to-in, “Kei lamah kua om na hi uh hiam?” a ci hi. Inn sung maangte nih khawng thum khawng in amah hong en suk hi.

³³ Jehu in, “Amah hong lawnsuk un,” a ci hi. Tua ahih ciangin amaute in Jezebel lawnsuk uh hi; a sisan pawlkhat kulh tung leh sakolte tungah kitheh a, tua ciangin amaute in amah tuancil uh hi.

³⁴ Tua ciangin amah sungtumin ne-in dawn hi; tua ciangin amah in, “Tu-in a kisamsia hih numei mu un la, amah phum un; bangbang ahi zongin amah in kumpipa’ tanu hi buang hi,” a ci hi.

³⁵ Ahih hangin amah a phum dingin amaute a pai uh ciangin a luguh leh a khete leh a khut peekte sim loh amah mu nawn lo uh hi.

³⁶ Amaute hong paikikin ama kiangah a gen uh ciangin, amah in, “Hih in ama nasempa, Tishbe mi Elijah’ tung tawnin Topa’ gensa ahi hi, ‘Jezre-el gam sungah uite in Jezebel’ sa ne ding uh hi;

³⁷ tua ciangin Jezebel’ luanghawm in Jezre-el gam sung gamlak maitang tungah eklei tawh kibang ding a, tua ahih manin kuamah in, ‘Hih in Jezebel ahi hi,’ cih thei lo ding hi,” a ci hi.