2 KUMPI NIHNATE 4 - Tedim Bible

Meigongnu’ Sathau

¹ Tu-in kamsang honte sung pan khat’ zi Elisha tungah kiko-in “Na nasem ka pasal si hi; na nasempa in Topa a zahtakna na thei hi, ahih hangin ka tate nih sila dingin a la dingin a leibatna-pa hong pai hi,” a ci hi.

² Tua ciangin Elisha in tua numei kiangah, “Nang adingin bang hong hihsak ding ka hi hiam? Hong gen in; inn sungah bang nei na hi hiam?” a ci hi. Tua ciangin amah in, “Na nasemnu in sathau bing khat cih sim loh inn sungah bangmah nei lo hi,” a ci hi.

³ Tua ciangin amah in, “A pua-ah paikhia in, beel hawm a tawm lua lo, na veengte khempeuh’ beel va kawm in.

⁴ Tua ciangin sung tumin, nang leh na tapate kong kikhaknelh un la, hih beelte khempeuh sungah sung in; beel khat a dim ciangin tuam koih in,” a ci hi.

⁵ Tua ahih ciangin ama kiang panin tua numei paikhia-in amah leh a tapate kong kikhaknelh hi; amah in a sun’ lai takin amaute in ama kiangah a beelte paipih uh hi.

⁶ Beelte a dim ciangin amah in a tapa kiangah, “Beel dang khat hong paipih in,” a ci hi. Tua ciangin amah in ama kiangah, “Beel adang om nawn lo hi,” a ci hi. Tua ciangin sathau a luan’ khawl hi.

⁷ Tua nu hong pai-in Pasian’ mipa kiangah gen a, tua ciangin amah in, “Pai in, a sathau zuakin na leibate loh in, nang leh na tapate in a om laite tawh na nungta ding uh hi,” a ci hi.

Elisha leh Shunem Numei

⁸ Ni khat Elisha Shunem ah paisuak a, tua lai-ah a hau numei khat tengin tua nu in anne dingin amah sam hi. Tua ahih ciangin amah in tua lam a nawk peuhpeuh ciangin anne dingin tua lai-ah baang hi.

⁹ Tua ciangin tua numei in a pasal kiangah, “Tu-in en in, hih i lampi hong nawk tawntungpa in Pasian’ misiangtho hi, ci-in ka thei hi.

¹⁰ Eite kiangah amah hong pai peuhpeuh ciangin a tun’ theih nadingin innkhum zangah kawm a nei inndei neu khat bawlin tua sungah ama adingin lupna khat, sabuai khat, tutphah khat, leh meivak khat koihsak ni,” a ci hi.

¹¹ Ni khat amah tua lai-ah hong pai-in inndei sungah lut a,

¹² tua lai-ah tawlnga hi. Tua ciangin amah in a nasempa Gehazi kiangah, “Hih Shunem mi sam in,” a ci hi. Amah in tua numei a sap ciangin ama mai-ah tua nu hong ding hi.

¹³ Tua ciangin amah in ama kiangah, “Tu-in tua nu kiangah hih bangin gen in, Thei in, kote’ adingin hih haksatna khempeuh na thuak hi; nang adingin bang kihih ding ahi hiam? Kumpipa kiang ahih kei leh galkap a ukpa kiangah nang tangin thu khat hong kigensak ding na ut hiam?” a ci hi. Amah in dawngin, “Keimah in ka mipihte lakah teng ka hih manin bangmah ka kisam kei hi,” a ci hi.

¹⁴ Tua ciangin amah in, “Tua bang ahih leh tua nu adingin bang kihihsak ding ahi hiam?” a ci hi. Gehazi in dawngin, “Thu khat bek om hi, tua nu in tapa nei lo a, a pasal teek hi,” a ci hi.

¹⁵ Amah in, “Tua nu sam in,” a ci hi. Amah in tua nu a sap ciangin kongka lai-ah amah ding hi.

¹⁶ Tua ciangin amah in, “A hun hong tun’ ciangin tapa khat na tawi ding hi,” a ci hi. Tua ciangin tua nu in, “Hilo hi, ka topa, Pasian’ mipa aw, na nasemnu tungah zuau kei in,” a ci hi.

¹⁷ Ahih hangin tua nu in naupaai a, Elisha in ama tungah a gensa bangin a hun a tun’ kik ciangin amah in tapa khat nei hi.

¹⁸ Naupang a gol ciangin ni khat a pa kiang anlate lakah pai hi.

¹⁹ Tua ciangin amah in a pa kiangah, “Aw, ka lutang, ka lutang!” a ci hi. A pa in a nasempa kiangah, “A nu kiangah, va pua in,” a ci hi.

²⁰ Amah in domin a nu kiangah a paipih ciangin a ang sungah sun dong naupang tu a, tua ciangin si hi.

²¹ Tua ciangin tua nu paito-in Pasian’ mipa’ lupna tungah amah koih a, amah kong khaknelhin paikhia hi.

²² Tua ciangin amah in a pasal samin, “Manlang takin Pasian’ mipa kiangah pai-in kong ciahkik theih nadingin nasemte khat leh late khat hong puak in,” a ci hi.

²³ Tua ciangin amah in, “Bang hangin tu ni-in ama kiangah pai ding na hi hiam? Kha det ni ahi a, sabbath ni ahi zongin hilo hi,” a ci hi. Amah in, “Hong hoih na ding hi,” a ci hi.

²⁴ Tua ciangin amah in la van vawhin a nasempa kiangah, “Gan nawh in; kong gen kei nak leh kei adingin a pai khiamsak kei in,” a ci hi.

²⁵ Tua ahih ciangin amah dingkhia a, Karmel Mual-a Pasian’ mipa kiangah pai hi. Pasian’ mipa in amah hong pai a muh ciangin a nasempa Gehazi kiangah, “En in, gal-ah Shunem nu hong pai hi;

²⁶ amah dawn dingin thakhatin va tai in la, ama kiangah, “Na dam hiam? na pasal a dam hiam? Naupang a dam hiam?” va ci in, a ci hi. Tua ciangin tua nu in, “Hoih hi,” a ci hi.

²⁷ Tua ciangin Pasian’ mipa kiang mual tungah tua nu a tun’ ciangin tua nu in ama khe len hi. Tua ciangin amah a sawnkhia dingin Gehazi hong pai hi. Ahih hangin Pasian’ mipa in, “Amah tuaci omsak in, bang hang hiam cih leh amah nakpi takin lungkham hi; Topa in kei tungah a thu iim a, kei kiangah hong gen lo hi,” a ci hi.

²⁸ Tua ciangin tua nu in, “Ka topa’ tung pan tapa hong ngen ka hi hiam? Kei hong khem kei in, hong ci hilo ka hi hiam?” a ci hi.

²⁹ Amah in Gehazi kiangah, “Na kawnggak gak in la, na khutah ka ciangkhut tawi-in pai in. Mi khatpeuh tawh na kituah leh amah hopih kei in; mi khatpeuh in nang hong hopih leh dawng kei in; tua ciangin naupang’ mai tungah ka ciangkhut va nga in,” a ci hi.

³⁰ Tua ciangin naupang’ nu in, “Topa a nuntak bang, leh nang mahmah na nuntak mah bangin, nang kong nusia kei ding hi,” a ci hi. Tua ahih ciangin amah ding-in tua nu zui hi.

³¹ Gehazi na ma paisuakin naupang’ mai tungah a ciangkhut nga a, ahih hangin awging ahi a, nuntakna lim ahi zongin om lo hi. Tua ahih ciangin amah a dawn dingin hong kileh kik a, ama kiangah, “Naupang khanglo nai lo hi,” a ci hi.

³² Inn sungah Elisha hong tun’ ciangin amah in a lupna tungah a si-in a lum naupang mu hi.

³³ Tua ahih ciangin amah lutin amaute nih kong kikhaknelhin, tua ciangin Topa tungah thungen hi.

³⁴ Tua ciangin amah paito-in naupang’ tungah bok a, ama kam tungah ama kam koihin, ama mitte tungah ama mitte omsak a, ama khutte tungah ama khutte omsak hi; tua ciangin ama tungah amah kikhuang a, naupang a ci hong lum hi.

³⁵ Tua ciangin amah dingto kikin inn sungah khatvei vak kawikawi a, tua ciangin paito-in ama tungah kikhuang hi; naupang sagih vei hetchiai-in a mit hak hi.

³⁶ Tua ciangin amah in Gehazi samin, “Hih Shunem numei sam in,” a ci hi. Tua ahih ciangin amah in tua nu sam hi. Tua nu ama kiangah hong pai ciangin amah in, “Na tapa la in,” a ci hi.

³⁷ Tua nu hong pai-in ama khe-ah pukin lei lakah kun hi; tua ciangin a tapa la-in paikhia hi.

Kamsangte ading Elisha’ Nalamdangte

³⁸ Tua ciangin tua gam sungah kialpi a tun’ lai takin Gilgal ah Elisha hong paikik hi. Kamsangte ama mai-ah a tut lai takin amah in a nasemte kiangah, “Beel lianpi suang in la, kamsangte’ ading meh huan in,” a ci hi.

³⁹ Amaute khat meh zong dingin gamlakah pai a, vatak-um gui khat mu-in tua tung panin a ang dimin umgah lo a, tuate bang hiam cih thei lopi-in hong pai-in meh beel sungah at nen hi.

⁴⁰ Tua ciangin amaute in mite’ nek dingin hong thukkhia uh hi. Ahih hangin amaute in meh a nek lai takun, amaute kiko-in, “Pasian’ mipa aw, an sungah gu om!” a ci uh hi. Amaute in ne thei lo uh hi.

⁴¹ Amah in, “Tua ahih leh a an tawm hong la un,” a ci hi. Tua ciangin amah in beel sungah tua an lawn a, “Amaute in a nek theih nadingin mite’ adingin thukkhia un,” a ci hi. Tua ciangin bangmah ci nawn lo hi.

⁴² Mi khat Baalshalishah panin hong pai-in Pasian’ mipa kiangah anpal anlum, mangbuhham lum sawmnih, leh anvui athak a van sungah hong pua hi. Tua ciangin Elisha in, “Amaute in a nek thei nadingun kamsangte tungah pia in,” a ci hi.

⁴³ Ahih hangin a nasempa in, “Mihing zakhatte’ mai-ah keimah in hih bangci lui theih ding ka hi hiam?” a ci hi. Tua ahih ciangin amah in, “Amaute in a nek theih nadingun mite tungah tuate pia in, bang hang hiam cih leh Topa in, ‘Amaute in ne-in khamval ding uh hi,’ ci hi,” a ci kik hi.

⁴⁴ Tua ahih ciangin amah in amaute mai-ah tua an lui hi. Tua ciangin amaute in ne uh a, Topa’ kamgen bangin pawlkhat val lai hi.