2 KUMPI NIHNATE 20 - Tedim Bible

Hezekiah’ Cinatna

¹ Tua hun lai takin Hezekiah a cina-in si dektak hi. Tua ciangin Amoz’ tapa kamsangpa Isaiah ama kiangah hong pai a, ama kiangah, “Topa in hih bangin ci hi: ‘Na innkuan vai ding hawm in; bang hang hiam cih leh nang na si ding hi; na damkik kei ding hi, ci hi,” a ci hi.

² Tua ciangin Hezekiah in a mai kawm lam ngatin Topa tungah thungen a,

³ “Nangma mai-ah thuman tak leh lungsim khempeuh tawh ka gamtatna, leh nangma muhna ah a hoih ka sepna thu tu-in hong phawk in, kong thum hi, Topa aw,” a ci hi. Tua ciangin Hezekiah nakpi takin kap hi.

⁴ Tua ciangin inntual laita panin Isaiah a paikhiat ma-in ama tungah Topa’ thu hong tung hi:

⁵ “Kileh kik in la, keima mite’ makai Hezekiah kiangah hih bangin gen in. Na pa David’ Pasian, Topa in hih bangin ci hi: Na thungetna ka za khin a, na khituite ka mu khin hi; en in, nang kong damsak ding a; ni thum ni-in Topa’ innah na paito ding hi.

⁶ Na nuntakna kum sawm-le-nga sung kong behlap ding hi. Assiria kumpipa’ khutsung panin nangmah leh hih khuapi ka honkhia ding a, keima hang leh ka nasempa David hangin hih khuapi ka hu ding hi, ci-in gen in,” a ci hi.

⁷ Tua ciangin Isaiah in, “Thei moh khat hong la un. Amah a damkik theih nadingin tuate la un la, a uilut nuh un,” a ci hi.

⁸ Tua ciangin Hezekiah in Isaiah kiangah, “Topa in kei hong damsakna ding, leh a ni thum ni-in Topa’ innah ka paitoh nading a lim in bang hi ding ahi hiam?” a ci hi.

⁹ Tua ciangin Isaiah in, “Topa in a ciamsa na hong hih nadingin hih in Topa tung panin nangma tungah lim ahi hi: a liim kalsawm mai pai ding hiam, ahih kei leh kalsawm nungkik ding ahi hiam?” a ci hi.

¹⁰ Tua ciangin Hezekiah in dawngin, “Liim kal sawm a mainawt ding a baih khat ahi hi; liim kal sawm nungkik sak zaw in,” a ci hi.

¹¹ Tua ciangin kamsangpa Isaiah Topa tungah kiko hi; tua ciangin amah in Ahaz’ ni-nai tungah a ni tumsa a liim kal sawm lehkaih hi.

Hezekiah in Babilon pana Kamtaite Saang

¹² Tua hun lai takin Babilon kumpipa, Baladan’ tapa Melodak-baladan in Hezekiah kiangah laikhakte leh letsong khat tawh kamtaite sawl hi; bang hang hiam cih leh Hezekiah cina, ci-in amah in za hi.

¹³ Tua ciangin Hezekiah in amaute na zindo a, amah in amaute kiangah a vankoihna inn khempeuh, ngun, kham, a namtui nate, sathau manpha, a galvan, a vankoihna innte ah a om khempeuh lak hi; ama inn sung hita leh ama gamsung khempeuh pan hita leh Hezekiah in amaute a lah loh om lo hi.

¹⁴ Tua ciangin Kumpi Hezekiah kiangah kamsangpa Isaiah hong pai a, ama kiangah, “Hih mite in bang gen ahi hiam? Koi lai panin nang kiangah hong pai ahi hiam?” a ci hi. Tua ciangin Hezekiah in, “Amaute Babilon gam, a gamlapi panin hong pai uh hi,” a ci hi.

¹⁵ Amah in, “Amaute in na inn sungah bang mu ahi uh hiam?” a ci hi. Tua ciangin Hezekiah in dawngin, “Amaute in ka inn sunga om khempeuh mu uh hi; ka vankoihna inn sungte panin amaute ka lah loh bangmah om lo hi,” a ci hi.

¹⁶ Tua ciangin Isaiah in Hezekiah kiangah, “Topa’ thu za in:

¹⁷ En in, na inn sunga om khempeuh leh na pu na pate in tu ni donga a kholte Babilon ah a kipuak ni ding hong tung ding hi; bangmah kisiit lo ding hi, Topa in ci hi.

¹⁸ Nangma sung pan a suak na tapate pawlkhat kilakhia ding hi; amaute in Babilon kumpipa’ inn sungah innsung maangte hi ding uh hi,” a ci hi.

¹⁹ Tua ciangin Hezekiah in Isaiah kiangah, “Na gensa ahi Topa’ thugen in hoih hi,” a ci hi. Bang hang hiam cih leh amah in, “Keima hun sungin kilemna leh lungmuan’na a om nak leh bang phamawh ding hiam?” ci-in ngaihsun hi.

Hezekiah’ Sihna

²⁰ Hezekiah’ sepna a om laite, leh a vangliatna, leh tuili leh tuilakna bawlin khuapi sungah tui a tutna, Judah Kumpite Khang Tangthu Laibu sungah kigelh hilo ahi hiam?

²¹ Tua ciangin Hezekiah a pate tawh ihmu hi; ama tangin a tapa Manasseh in uk hi.