2 KUMPI NIHNATE 17 - Tedim Bible

Samaria a Pukna leh Israel mite a Kilakna

¹ Judah kumpipa Ahaz’ kum sawm-le-nihna kumin Elash’ tapa Hoshea in Israel tungah Samaria panin uk ding kipan a, amah in kum kua sung uk hi.

² Amah in Topa muhna ah a sia gamta a, ahi zongin ama ma-a Israel kumpite bang hi lo hi.

³ Assiria kumpipa Shamaneser amah doin kuanto hi; tua ciangin Hoshea in ama khutnuai mi suak a, ama tungah siah puak hi.

⁴ Ahih hangin Assiria kumpipa in Hoshea a zuautatna mu hi; bang hang hiam cih leh amah in Izipt kumpipa So kiangah kamtaite sawl a, a kum kumin a hih ngeisa bangin Assiria kumpipa tungah zong siah pia lo hi; tua ahih ciangin Assiria kumpipa in amah man a, thong sungah amah hencip hi.

⁵ Tua ciangin Assiria kumpipa in gam sung khempeuh simin Samaria tung a, amah in kum thum sung umcih hi.

⁶ Hoshea’ kum kua-na kumin Assiria kumpipa in Samaria la a, amah in Assiria ah Israel mite ciahpih a, Halah gam sung, leh Gozan gam a, gun om Habor, leh Media khuapite sungah amaute koih hi.

⁷ Hih thu a pian’na in, Israel mite in Izipt kumpipa Faro’ khutnuai Izipt gam panin amaute a paikhiatpih a Pasian uh Topa’ tungah khial a, pasian dangte kihta-in

⁸ Israel mite mai-ah Topa in a hawlkhiat minamte’ ngeina, leh Israel kumpite in a pian’sak ngeinate a zuihna hang uh ahi hi.

⁹ Tua ciangin Israel mite in Topa a Pasian uh langpanin a man lo na vaihawm uh hi. Amaute in amau’ adingin gal vilna bukno akipan kulh a nei khuapi dongin khuapi khempeuh ah mual tunga biakna bawl uh hi;

¹⁰ amaute in amau’ adingin mualsang tung khempeuh leh singniim nuai khempeuh ah khuampite leh Asherah milimte phut uh hi;

¹¹ tua ciangin amaute’ mai-ah Topa in a puakkhiat minamte’ hih bangin amaute in mual tunga biakna mun khempeuh tungah paknamtui hal uh hi. Amaute in a hoih lo nate hihin Topa hehsak uh a,

¹² Topa in amaute tungah , “Note in na hih kei ding uh hi,” a cih milimte’ na sem uh hi.

¹³ Ahi zongin Topa in kamsangte khempeuh leh thu-mu-te khempeuh tung tawnin Israel leh Judah hilhkhol a, “Na pu na pate uh ka thupiak thukhamte khempeuh, leh kamsangte ahi ka nasemte tung tawnin note kiangah thu kong puak bangin na gamtat siate panun kihei-in ka thupiaknate leh ka thukhamte zui un,” a ci hi.

¹⁴ Ahih hangin amaute in thungai lo uh a, Topa a Pasian uh a um lo a pate uh mah bangin lungsim khauh uh hi.

¹⁵ Amaute in ama thukhamte, leh a pu a pate uh tawh a bawl a thuciamna, leh amaute tungah a piak hilhkholhnate simmawh uh hi. Amaute in a mawkna milimte zui-in a mawkna suak uh a, amaute tawh kibangin gamta kei un ci-in Topa in a thupiak tawh kisai-in, amaute in amau’ kim-a om minamte zui uh hi.

¹⁶ Amaute in Topa a Pasian uh thupiakte khempeuh nusia-in amau’ adingin a kisung bawngno nih lim bawl uh hi; amaute in Asherah milim khat bawl uh a, vantung a, om nate khempeuh bia-in Baal’ na sem uh hi.

¹⁷ Amaute in biakna-in a tanute uh leh a tapate uh halin vankahna leh aisanna zang uh a, Topa muhna ah a sia gamta dingin amau kizuak tawmin amah hehsak uh hi.

¹⁸ Tua ahih ciangin Israel mite tungah Topa heh a, ama muhna panin amaute hemkhia hi; kuamah dang om nawn loin Judah minam bek om lai hi.

¹⁹ Judah mite in zong Topa a Pasian uh thupiaknate zui loin Israel mite in a phuah tawm ngeinate zuihpih uh hi.

²⁰ Tua ciangin Topa in Israel suan-le-khakte khempeuh nialin amaute gimsak a, ama muhna panin amaute a paihkhiat dongin a siasak mite khut sungah amaute pia hi.

²¹ Amah in David innkuan panin Israel gam a balkhiat khit ciangin Israel mite in Nebat’ tapa Jeroboam kumpi-in koih uh hi. Tua ciangin Jeroboam in Topa zuihna panin Israel hawlkhia-in khialhna lianpi amaute bawlsak hi.

^22-23 Israel mite in Jeroboam’ khialhna khempeuh hih uh hi; kamsangte ahi a nasemte khempeuh tung tawnin a gensa bangin Topa in ama muhna panin Israel a hepkhiat dongin tuate panin amaute kihem lo uh hi. Tua ahih ciangin amau’ gam panin Assiria’ah tu ni dongin Israel sal-in om hi.

Samaria-ah mi a Dimkikna

²⁴ Tua ciangin Assiria kumpipa in Babilon, Kuthah, Avva, Hamath, leh Sefarvaim panin mite paipih a, Israel mite’ tangin Samaria khuapite ah amaute koih hi; amaute in Samaria gam luahin a khuapite-ah teeng uh hi.

²⁵ Tua lai-ah a ten’ cilun amaute in Topa kihta lo uh hi; tua ahih ciangin Topa in amaute kimkhat a that humpinelkaite amaute lakah khah hi.

²⁶ Tua ahih ciangin Assiria kumpipa kiangah, “Nangmah in pua khia-in Samaria khuapite sungah na koih minamte in tua gam’ pasian’ thukham thei lo uh hi; tua ahih ciangin amah in amaute lakah humpinelkaite khah hi, en in, amaute in tua gam’ pasian’ thukham thei lo uh ahih manin tuate in amaute that uh hi,” ci-in kigen hi.

²⁷ Tua ciangin Assiria kumpipa in thu pia a, “Na puakkhiatna uh mun siampite khat tua lai-ah puak un; amah pai-in tua lai-ah teengin a gamsung pasian’ thukhamte amaute hilh sak un,” a ci hi.

²⁸ Tua ahih ciangin Samaria panin a puakkhiat uh siampite khat hong pai-in Beth-el ah teng a, amaute in Topa bangci kihtak ding cih thu amaute kiangah hilh hi.

²⁹ Ahih hangin minam khempeuh in amau’ pasiante bawl uh a, minam khempeuh in amau’ ten’na khuapite sung, Samaria mite’ bawlsa mual tunga biakna munte ah tuate koih uh hi;

³⁰ Babilon mite in Sukkoth-benoth pasian lim, Kuth mite in Nergal pasian lim, Hamath mite in Ashima milim,

³¹ leh Avva mite in Nabhaz leh Tartak milimte bia uh hi; Sefarvaim mite in Sefarvaim pasiante ahi Adrammelek leh Anammelek biakna-in a tate uh mei tawh hal uh hi.

³² Amaute in zong Topa kihta uh a, mual tunga biakna siampi dingin amau sung panin mi namkim seh uh a, tuate in mual tunga biaknate tungah amau’ adingin biakna piaksak uh hi.

³³ Tua ahih ciangin amaute in Topa kihta uh a, ahih hangin amaute a kipuak khiatna minamte’ ngeina bangin amau’ pasiante’ na zong sem uh hi.

³⁴ Tu ni dongin amaute in a ni danga ngeina bangin hih uh hi. Amaute in Topa kihta lo uh a, Israel min a phuah Jakob’ suante’ Topa in a thupiak thukhamte ahi a, ngeina kipte ahi a, zuih ding ngeina ahi a, a thupiakna ahi zongin amaute in zui lo uh hi.

³⁵ Topa in Israelte tawh thuciamna khat bawlin amaute thu pia a, “Note in pasian dangte kihta loin, amaute tungah note kun loin, amau’ na zong sem loin, amaute tungah biakna zong na pia kei ding uh hi;

³⁶ ahih hangin Izipt gam panin vangliatna leh thahatna tawh note a hong paikhiatpih Topa na kihta ding uh hi; ama mai-ah note na kun ding uh a, ama tungah biakna na pia ding uh hi.

³⁷ Note adingin a gelh thukhamte leh ngeina kipte leh zuih ding ngeina leh thupiaknate zuih ding na kingaihsun tawntung ding uh hi. Note in pasian dangte na kihta kei ding uh a,

³⁸ note tawh ka bawlsa thuciamna na mangngilh kei ding uh hi. Note in pasian dangte na kihta kei ding uh a,

³⁹ ahih hangin Topa na Pasian uh na kihta ding uh hi; tua ciangin amah in na galte khempeuh uh khut sung panin note hong honkhia ding hi,” a ci hi.

⁴⁰ Ahi zongin hih mite in tua thu ngai lo uh a, a ni danga ngeina bangin gamta uh hi.

⁴¹ Tua ahih ciangin hih minamte in Topa kihta uh a, a kiseek amau’ milimte’ na zong sem kawm uh hi; a tate uh leh a tate uh tate in zong tua bangin hih uh hi—a pu a pate uh hih bangin a suan a khakte un tu ni dongin hih uh hi.