2 KUMPI NIHNATE 13 - Tedim Bible

Israelte’ Jehoahaz’ Ukna

¹ Judah kumpi, Ahaziah’ tapa Joash’ kum sawmnih-le-thumna kumin, Jehu’ tapa Jehoahaz in Samaria panin Israel uk ding kipan a, amah in kum sawm-le-sagih sung uk hi.

² Amah in Topa’ muhna ah a sia gamta a, Israelte a khialhsakna, Nabat’ tapa Jeroboam’ khialhnate zui hi; tuate panin amah kihem khia lo hi.

³ Tua ciangin Israelte tungah Topa heh a, amah in Siria kumpipa Hazael khut sung leh Hazael’ tapa Benhadad khut sungah amaute pia tawntung hi.

⁴ Tua ciangin Jehoahaz in Topa tungah thum a, Topa in a thu ngai hi; bang hang hiam cih leh Israel a kinen’niamna, Siria kumpipa in amaute a nen’niamna mu hi.

⁵ (Tua ahih ciangin Topa in Israel tungah honpa khat pia a, tua ahih manin Siriate khut sung panin amaute suakta uh hi. tua ciangin a ni danga bangin Israelte a inn uhah teeng uh hi.

⁶ Ahi zongin Israel a khialhsakna, Jeroboam’ innkuante’ khialhnate panin amaute kihem khia lo uh a, amaute in tuate zui uh hi; Ahserah milim zong Samaria mah-ah om lai hi.)

⁷ Bang hang hiam cih leh Jehoahaz’ adingin galkap sakol tung tuang sawmnga leh leeng sawm leh khe galkap tulsawm bang bek om lai hi; bang hang hiam cih leh Siria kumpipa in amaute susia-in ancilna a, leivui bangin amaute bawl hi.

⁸ Tu-in Jehoahaz’ gamtatna a om laite leh ama hih khempeuh, leh ama vangliatna, Israel Kumpite’ Khang Tangthu Laibu sungah kigelh hilo ahi hiam?

⁹ Tua ahih ciangin Jehoahaz a pate tawh ihmu a, amaute in Samaria ah amah vui uh hi; tua ciangin ama tangin a tapa Jehoash in uk hi.

Israelte Jehoash’ Ukna

¹⁰ Judah kumpipa Joash’ kum sawmthum-le-sagihna kumin Jehoahaz’ tapa Jehoash in Samaria panin Israel tungah uk ding kipan a, amah in kum sawm-le-guk sung uk hi.

¹¹ Amah in zong Topa’ muhna ah a sia gamta hi; Israelte a khialhsakna, Nebat’ tapa Jeroboam’ khialhnate, khempeuh panin amah kihem khia lo a, tua mah bangin amah gamta hi.

¹² Tu-in Jehoash’ gamtatna a om laite, leh ama hih khempeuh, leh Judah kumpipa Amaziah a dona a thahatnate, Israel Kumpite’ Khang Tangthu Laibu sungah kigelh hilo ahi hiam?

¹³ Tua ahih ciangin a pate tawh Jehoash ihmu a, tua ciangin ama kumpi tokhom tungah Jeroboam a nihnapa a tu hi; tua ciangin Israel kumpite tawh Samaria ah Jehoash kivui hi.

Elisha’ Thugenkholhna Nunung pen leh a Sihna

¹⁴ Tu-in amah a sih nading natna tawh Elisha a nat ciangin, Israel kumpipa Jehoash ama kiangah paisuk a, ama mai-ah kapin, “Ka pa, ka pa! Israel mite’ leengte leh sakol galkapte!” ci-in kiko hi.

¹⁵ Tua ciangin Elisha in ama kiangah, “Thal khat leh thaltangte hong la in,” a ci hi; tua ahih ciangin amah in thal khat leh thaltangte la hi.

¹⁶ Tua ciangin amah in Israel kumpipa kiangah, “Thal keek in,” a ci hi. Tua ciangin amah in keek hi. Tua ciangin Elisha in kumpipa khutte’ tungah ama khutte nga hi.

¹⁷ Tua ciangin amah in, “Nisuahna lam kongvangneu hong in,” a ci hi; tua ciangin amah in hong hi. Tua ciangin Elisha in, “Lawn in,” a ci hi; tua ciangin amah in lawn hi. Tua ciangin amah in, “Topa’ gualzawhna thaltang, Siria tungah gualzawhna thaltang! Bang hang hiam cih leh amaute na beisak dongin Afek-ah Siriate na do ding hi,” a ci hi.

¹⁸ Tua ciangin amah in, “Thaltangte la in,” a ci hi; tua ciangin amah in la hi. Tua ciangin amah in Israel kumpipa kiangah, “Tuate tawh leilak sat in,” a ci hi; tua ciangin amah in thum vei satin khawl hi.

¹⁹ Tua ciangin Pasian’ mipa ama tungah hehin, “Nga vei ahi a, guk vei ahi zongin sat ding kilawm hi; tua hi leh na beisak dongin Siria na satpuk ding hi; ahih hangin tu-in Siria thum vei bek na satpuk ding hi,” a ci hi.

²⁰ Tua ahih ciangin Elisha si a, amaute in amah vui uh hi. Tu-in Moab mihonte in sikhiau sungin tua gam sim zel uh hi.

²¹ Tua ciangin amaute in mi khat a vui lai takun, en in, a sim dingin a hong pai mihon khat mu uh a, amau zong a misi uh Elisha’ han sungah lawn uh hi; a misi in Elisha’ guhte a sukkhak phetin hingkik a, tua ciangin ama khe-in ding hi.

²² Tu-in Siria kumpipa Hazael in Jehoahaz’ hun sung khempeuh Israel nengniam hi.

²³ Ahih hangin Topa in amaute hehpihin amaute khasiat a, Abraham, Isaak, leh Jakob tawh a thuciamna hangin amaute lamah amah kihei a, amaute susia lo hi; tu dongin zong ama mite mangngilh lo hi.

²⁴ Siria kumpipa Hazael a sih ciangin ama tangin a tapa Benhadad kumpi suak hi.

²⁵ Tua ciangin a pa Hehoahaz’ tung panin gal sungah Hazael in a laksak khuapite, Hazael’ tapa Benhadad tung panin Jehoahaz’ tapa Jehoash in la kik hi. Jehoash in amah thum vei zoin Israel khuapite ngah kik hi.