2 KHANG TANGTHU NIHNATE 30 - Tedim Bible

Paisan Pawi Bawlna

¹ Israel Pasian, Topa’ Paisan Pawi a bawl dingin Jerusalem a, Topa’ innah amaute hong paina dingun Hezekiah in Israel khempeuh leh Judahte kiangah mi sawl a, Efraim mite leh Manasseh mite tungah zong laikhakte gelh hi.

² Bang hang hiam cih leh kumpipa leh a uliante leh Jerusalem a, a kikhawm khempeuh in Paisan Pawi a kha nihna sungin bawl ding kikum khin uh hi—

³ siampite mi a kicingzah ding amau kisian’suah nai lo uh a, mite zong Jerusalem ah kikhawm nai lo uh ahih manin a hunin bawl thei lo uh hi—

⁴ hih geelna pen kumpipa leh a kikhawm khempeuh adingin hoih leh kilawm hi.

⁵ Tua ahih ciangin mite hong pai-in Israel Pasian, Topa adingin Jerusalem ah Paisan Pawi a bawl nadingun Be-ersheba panin Dan ciang dong Israel sung khempeuh ah taangkona khat a bawlna ding uh thukhentatna khat bawl uh hi; bang hang hiam cih leh bawl dinga a kigen bangin amaute in a lianpi-in bawl ngei lo uh hi.

⁶ Tua ahih ciangin kumpipa leh a uliante kiang pana laikhakte tawh Israel khempeuh leh Judah sungah laitaite pai uh a, kumpipa’ thupiakna, “Israel mite aw, Assiria kumpite’ khut sung panin a suakta, a om lai note lamah amah hong kihei kik theih nadingin Abraham, Isaak, leh Israel Pasian, Topa’ lamah kihei kik un.

⁷ Note in na theih uh bangin, amau’ pute pate’ Topa Pasian tungah a cihtaklohna hangun amaute gamkhingin amah in a bawl na pute na pate uh leh na sanggamte uh bang kei un.

⁸ Tu-in na pute na pate uh bangin lungkhauh kei un la, note kiang panin a lauhuai ama hehna a kiheikhiat theih nadingin Topa’ lamah kipia un la, amah in a tawntung dingin a sian’thosaksa a biakinn ah pai-in Topa na Pasian uh, bia un.

⁹ Bang hang hiam na cih leh Topa’ lamah note na kilehkik uh leh, na sanggamte uh leh na tate un amau a mante’ tung panin hehpihna ngahin hih gamah hong ciahkik ding uh hi. Bang hang hiam cih leh Topa na Pasian uh dikna leh hehpihna a nei hi a, ama lamah na kiheikik nak uh leh note kiang panin a maitang heikhia lo ding hi,” a ci hi.

¹⁰ Tua ahih ciangin laitaite Efraim leh Manasseh gam sung khuapi khat pan khuapi khat, leh Zebulun ciang dong pai uh hi; ahih hangin amaute in amaute nuihsanin zahpih uh a, na simmawh bawl uh hi.

¹¹ Asher mi, Manasseh, leh Zebulun mi tawmkhat bek kiniamkhiatin Jerusalem ah hong pai uh hi.

¹² Topa’ thupiakna tawh kumpipa leh uliante’ sawlna a sem dingin Judah mite tungah Pasian in lungsim kikhatna guan hi.

¹³ Tua ciangin a kha nihna sungin silngo sawh loh anlum pawi a bawl dingin Jerusalem ah mi tampi, mihon tampi tak hong pai uh hi.

¹⁴ Amaute nasem dingin kipanin Jerusalem a, om biakna taute hemkhia uh a, paknamtui halna ding biakna taute khempeuh amaute in la khia-in Kidron kuamah paai uh hi.

¹⁵ Tua ciangin amaute in a kha nihna ni sawm-le-li ni-in Paisan Pawi tuuno go uh hi. Tua ciangin siampite leh Levi mite nakpi takin maizum uh a, tua ahih ciangin amau mah kisian’suahin Topa’ inn sungah meihal biaknate hong paipih uh hi.

¹⁶ Pasian’ mipa Moses’ thukham hangin amaute in amau’ panmun ngei hong la uh hi; siampite in Levi mite khut tung panin a ngah uh sisan theh uh hi.

¹⁷ Bang hang hiam cih leh a kikhawm lakah amau mah a kisian’suah nai lo tampi om uh hi; tua ahih ciangin Topa tungah a siangtho-in a kibawl nadingin a nin khempeuh adingin Levi mite in Paisan Pawi tuuno a gawh ding uh kisam hi.

¹⁸ Bang hang hiam cih leh mi tampi tak, Efraim, Manasseh, Issakhar, leh Zebulun sung pan tampi tak, amau mah kisiangthosak nai lo uh a, ahi zongin ngeina lopi-in amaute in Paisan Pawi ne uh hi. Bang hang hiam cih leh Hezekiah in amaute adingin thungenin, “Ka pute ka pate uh’ Pasian a dik Topa aw,

¹⁹ biakinn siangthona ngeina om bangin a sian’ loh uh hangin lungsim tak tawh nang hong biate khempeuh’ mawhna maisak in,” a ci hi.

²⁰ Tua ciangin Topa in Hezekiah’ thungetna pia-in mite mawhna maisak a, gimna ngahsak lo hi.

²¹ Tua ciangin Jerusalem ah a om Israel mite in lungdamna lianpi tawh ni sagih sung silngo sawhloh anlum pawi bawl uh hi; tua ciangin Levi mite leh siampite in a hatna khempeuh uh tawh Topa la sak uh a, a ni ni-in Topa phat uh hi.

²² Tua ciangin Hezekiah in Topa’ nasepna ah a siamna hoih uh a lak Levi mite khempeuh tungah hanthotna thugen hi. Tua ahih ciangin mite in pawi an ni sagih sung ne uh a, thu-nuama biakna pia-in a pu a pate uh Pasian, Topa tungah lungdamna ko uh hi.

²³ Tua ciangin a dang ni sagih sung mah tua pawi a bawl thuah lai ding uh a kikhawm khempeuh thukim uh hi; tua ahih ciangin amaute in lungdamna tawh adang ni sagih sung mah bawl thuah uh hi.

²⁴ Bang hang hiam cih leh Judah kumpipa Hezekiah in biakpiak nadingin a kikhawmte tungah bawngtal tulkhat leh tuu tulsagih pia a, uliante in a kikhawmte tungah bawngtal tulkhat leh tuu tulsawm pia uh hi. Siampite in tampi tak amau mah kisian’suah uh hi.

²⁵ Judah mi a kikhawm khempeuh, leh siampite leh Levi mite, leh Israel panin hong paikhia a kikhawm khempeuh, leh Israel gam panin hong paikhia leh peemtate, leh Judah gam sungah a teng peemtate, lungdam uh hi.

²⁶ Israel kumpi David’ tapa Solomon’ huna kipanin Jerusalem ah hih bang om ngeilo ahih manin Jerusalem ah lungdamna lianpi om hi.

²⁷ Tua ciangin siampite leh Levi mite ding-in mite thupha pia uh a, amau’ awging kiza-in, amau’ thungetna in vantung a, a siangtho ama teen’na banto hi.