2 KHANG TANGTHU NIHNATE 3 - Tedim Bible

Solomon in Topa’ Inn Lam

¹ Tua ciangin Solomon in Jerusalem sung Moriah Mual tung a, a pa David tungah Topa a kilahna mun, David in a seh-nasa mun ahi, Jebus mi Ornan ancilna phual-ah Topa’ inn lam ding kipan hi.

² Amah in ama uk a kum lina a kha nihna ni nih ni-in lam ding kipan hi.

³ Pasian’ inn lam nading Solomon’ geelna in: a dung nidanga kizang tong-in, tong sawmguk hi a, a vai tong sawmnih ahi hi.

⁴ Inn mai-a innliim in inn vai tawh kikimin tong sawmnih sau hi; tua ciangin a san’na in tong sawmnih ahi hi.

⁵ Amah in taaksan tawh a innpi kawm dapin kham hoih tawh zut a, tua tungah nisuh leh khainiang bawl hi.

⁶ Amah in suang manpha phutin a inn zeem hi. A kham in Parvaim kham ahi hi.

⁷ Tua ahih ciangin amah in a inn—a innsunte, a sangkilte, a kawmte, leh a kongkhakte, kham tawh zut hi; tua ciangin a kawmte tungah kherubte bawl hi.

⁸ Tua ciangin amah in siangthopen mun bawl hi; a dung in inn vai tawh kizui-in tong sawmnih hi a, a vai in tong sawmnih mah ahi hi; amah in kham hoih talen zaguk tawh zut hi.

⁹ A kilhnate a gihna in kham shekel sawmnga ahi hi. Tua ciangin amah in a inn dawl tungnungte kham tawh zut hi.

¹⁰ Amah in siangtho pen mun sungah sing kherub nih bawlin kham tawh tuate zut hi.

¹¹ Tua kherub tegel kha a kizalin tong sawmnih ahi hi; a khat’ kha khat in tong nga hi-in inn kawm ban a, tua ciangin a kha lang khat tong nga in a kherub dang khat’ kha ban hi.

¹² Tua mah bangin a kherub dang khat’ kha lang khat in tong nga hi-in inn kawm lang khat ban a, tong nga mah a sau a kha lang khat in a kherub masa’ kha tawh kizom hi.

¹³ Hih kherubte’ khate in tong sawmnih huam hi; kherubte amau’ khe-in ding-in innpi sung lam nga uh hi.

¹⁴ Tua ciangin amah in a dum leh a ausan leh a dupsan puante leh saihadial tawh a dalna puan bawl a, tua tungah kherubte bawl hi.

Biakinn sungah Huram’ Nasep

¹⁵ Amah in inn mai san-ah tong sawmthum-le-nga a sang, a dawn tuakah tong nga a pha khuamluzepna a nei khuampi nih bawl hi.

¹⁶ Amah in ngawng-a awhte bangin khainiangte bawlin khuampite dawnah koih hi; tua ciangin amah in mangkawlsing zakhat bawlin khainiangte tungah koih hi.

¹⁷ Amah in tua khuamte, khat leitaw lam, a khat leilu lam, biakinn mai-ah phut hi; amah in leitaw lam-a om pen Jakhin phuakin, leilu lam-a om pen Boaz phuak hi.