2 KHANG TANGTHU NIHNATE 2 - Tedim Bible

Kumpi Huram tawh Solomon’ Thukimna

¹ Tu-in Solomon in Topa’ min dingin biakinn khat leh ama adingin kumpi inn khat lam ding sawm hi.

² Tua ciangin Solomon in van pua ding mi tul sawmsagih leh mual tung gamah suang to ding mi tul sawmgiat, leh tuate a vaan dingin mi tulthum leh zaguk seh hi.

³ Tua ciangin Solomon in Tai-ar kumpi Huram’ kiangah thu puak a: “Teen nading inn khat a lam nadingin ka pa David tungah taamtaak sing na puak mah bangin kei tungah zong hong puak in.

⁴ En in, Israelte’ adingin a tawntung ading a kikipsaksa bangin, ama mai-ah a namtui nate ahi paknamtui hal nading leh Ompihna Anlum piak tawntung nading, leh sabbath nite leh khadet nite leh Topa i Pasian’ adingin a kisehsa pawi nite-in zing leh nitakin meihal biaknate piak nadingin Topa ka Pasian’ minin inn khat lamin ama tungah a ap ding ka hi hi.

⁵ Kote’ Pasian in pasian khempeuh sangin lianzaw ahih manin ka lam ding inn in lian ding hi.

⁶ Ahih hangin vantung, a sangpen vantung nangawn in amah huam zo lo ahih manin ama adingin kua in inn lam zo ding ahi hiam? Ama mai-ah paknamtui hal nading cih sim loh ama adingin inn a lamsak dingin kei in kua ka hi hiam?

⁷ Tua hi a, tu-in ka pa David in a sehsa, Judah leh Jerusalem ah kei tawh a om nasep siamte tawh a semkhawm dingin kham, ngun, sumngo, leh sik, leh a ausan, a dupsan, puandumte, leh na sepna-ah zong siamna a nei mi khat hong puak in.

^8-9 Taamtaak, taaksan, leh cingsing zong, Lebanon panin hong puak in; bang hang hiam cih leh na nasemte in Lebanon sing phuk ding zia a theihna ka thei hi. Tua ciangin kei adingin sing tampi a sem dingin nangma nasemte in keima nasemte tawh om ding uh hi; bang hang hiam cih leh ka lam ding inn in lianin lamdang ding hi.

¹⁰ Sing nasem sing a phukte’ adingin a kisuvui mangbuh beem tul sawmnih, mangbuhham beem tul sawmnih, leenggahzu tambong tul sawmli, leh sathau tambong tul sawmli ka pia ding hi,” a ci hi.

¹¹ Tua ciangin Tai-ar kumpi Huram in lai-in thuk-in Solomon kiangah khak a, “Topa in a mite it ahih manin amaute tungah kumpi-in nang hong koih hi,” a ci hi.

¹² Tua ciangin a lai sungah gen thuah lai a, “Topa adingin biakinn khat, leh ama adingin kumpi inn khat a lam ding, thu theihna leh thu telna tawh a kidim tapa pil, David tungah pia-in, van leh lei a bawl Israel Topa Pasian in thupha ngah ta hen.

^13-14 “Tu-in Dan minam numei khat’ tapa, thutelna tawh a kidim, siamna a nei, siapa Huram kong puak hi; ama pa in Tai-ar khuami ahi hi. Amah in kham, ngun, sumngo, sik, suang leh sing, leh a ausan, a dum, leh a dupsan puante leh saihadial puan, leh zepna nam khempeuh sem ding leh ka topa ahi na pa David’ mi khutsiamte ahi nangma mi khutsiamte tawh a semkhawm dingin ama tunga a kipia nasep khatpeuh peuh a sem dingin sinna neisa ahi hi.

¹⁵ Tua ahih ciangin tu-in ka topa in a gensa mangbuh leh mangbuhham, sathau leh leenggahzute, na nasemte tungah puak in;

¹⁶ tua ciangin na kisap sing peuhmah Lebanon panin kong phuk ding uh a, nangmah in Jerusalem ah na puaktoh theih nadingin phong-in tuipi tungah Joppa dong nang kiangah kong paipih ding uh hi,” zong ci lai hi.

¹⁷ Tua ciangin a pa David in mi phazah a sim mah bangin, Solomon in Israel gam sunga om gamdang mi khempeuh mi phazah simna bawl hi; mi tulza khat leh tul sawmnga leh tulthum, leh zaguk pha hi.

¹⁸ Amah in van pua dingin amaute tul sawmsagih, mual tung gamah suang to dingin tul sawmgiat, leh mite’ nasep a vaan dingin tulthum leh zaguk seh hi.