2 KHANG TANGTHU NIHNATE 15 - Tedim Bible

Asa’ Puahphatte

¹ Oded’ tapa Azariah tungah Pasian’ Kha hong tung a,

² tua ciangin Asa dawntuah dingin amah pai-in ama kiangah, “Ka thu ngai un, Asa leh Judah mite leh Benjaminte aw: Note in amah tawh na om lai teng uh Topa in note tawh om hi. Amah na zon’ uh leh amah na mu ding uh a, ahih hangin amah na nusiat uh leh amah in note hong nusia ding hi.

³ Hun saupi sung Israel in Pasian man tawh om lo, thu a hilh siampi tawh om lo, thukham tawh om lo hi;

⁴ ahih hangin a lungkham uh ciangin Israel Pasian, Topa’ lamah kihei uh a, amah zongin amaute in amah mu uh hi.

⁵ Tua hun lai-in mite’ nasemin a zinsuk a zintohna uhah lungmuanna om lo hi; gam khempeuh ah buaina om hi.

⁶ Pasian in lungkhamna nam khempeuh tawh buaisak ahih manin minam khat leh minam khat, khuapi khat leh khuapi khat kido-in amaute kitamkham uh hi.

⁷ Ahih hangin nang, hang in! Na sepna thaman hong kipia ding ahih manin na khut zawsak kei in,” a ci hi.

⁸ Asa in Oded’ tapa Azariah’ thugenkholh, hih thute a zak ciangin amah hong hangin, Judah gam khempeuh leh Benjamin leh Efraim mualtung gam panin a laksa khuapite panin a kihhuai milimte lakhia a, Topa’ innlim mai-a om Topa’ biaknatau puah hi.

⁹ Tua ciangin amah in ‘Judah leh Benjamin mi khempeuh, leh Efraim, Manasseh, leh Simeon sung panin amaute kiangah a peemte khawm hi; bang hang hiam cih leh Topa a Pasian amah tawh a omna thu amaute in a muh uh ciangin Israelte kiang panin mi tampi tak ama kiangah tai uh hi.

¹⁰ Asa’ uk kum sawm-le-ngana a kha thumna sungin Jerusalem ah amaute kikhawm uh hi.

¹¹ Tua ni-in amaute in gal sung panin a ciahpih uh nate sung panin bawngtal za sagih leh tuu tul sagih tawh Topa tungah biakna pia uh hi.

¹² Tua ciangin a lungsim khempeuh uh leh a nuntakna khempeuh uh tawh a pu a pate uh’ Pasian, Topa a zon’ nading uh,

¹³ leh Pasian, Topa a zong lo peuhmah, a moi ahi a, a ham ahi a, numei ahi a, pasal ahi zongin a kithah nading uh thuciamna khat bawl uh hi.

¹⁴ Amaute in awging pha, leh otna, leh peengkulte, leh sakite tawh Topa’ tungah kiciamna bawl uh hi.

¹⁵ Tua ciangin Judah mi khempeuh tua kiciamna ah lungdam uh hi; bang hang hiam cih leh amaute in a lungsim khempeuh uh tawh kiciamin deihna taktak tawh amah zong a, tua ciangin amaute in amah mu uh a, Topa in a kiim uhah amaute gal daihna pia hi.

¹⁶ Ama nu Ma-akah in Asherah milim dingin a kihhuai milim khat a bawlna hangin kumpipa’ nu hihna za panin kumpi Asa in a nu lakhia hi. Asa in a nu’ milim phuksakin satnen a, Kidron lui-ah hal hi.

¹⁷ Ahih hangin Israel gam sung panin mualdawn a, biak piaknate kila khia lo hi. Ahi zongin ama hun sung tawntung Asa’ lungsim paubaang lo hi.

¹⁸ Tua ciangin amah in a pa’ apsa letsongte leh ama apsa letsongte, ngun, leh kham, leh nazatte, Topa’ innah paipih hi.

¹⁹ Asa’ uk kum sawmthum-le-nga ciang dong gal kidona om nawn lo hi.