2 KHANG TANGTHU NIHNATE 12 - Tedim Bible

Shishak in Judah a Simna

¹ Rehoboam’ ukna kipin a thahat ciangin, amah leh amah tawh a om Israel khempeuh in Topa’ thukham nusia uh hi.

^2-3 Topa’ tungah amaute citak lo uh ahih manin Rehoboam’ kum ngana kumin Jerusalem a sim dingin Izipt kumpipa Shishak, leeng galkap tul-le-za-nih leh sakol tung tuang galkap tulsawm leh tulguk tawh hong kuanto hi. Izipt panin amah tawh hong kuan mite—Libia mi, Sukki-im mi, leh Ethiopia mi hi a, a tamna sim zawh hi lo hi.

⁴ Amah in kulhnei khuapite la-in Jerusalem ciang dong hong tung hi.

⁵ Tua ciangin Shishak’ huhau-in Jerusalem ah a kikhawm Rehoboam leh Judah uliante kiangah kamsang Shemaiah hong pai-in amaute kiangah, “Topa in hih bangin ci hi: ‘Note in kei nong nusia uh hi; tua ahih ciangin Shishak’ khut sungah note kong pia khin hi,’ ci hi,” a ci hi.

⁶ Tua ciangin Israel uliante leh kumpipa kiniamkhiatin “Topa thuman hi,” a ci uh hi.

⁷ Amaute a kiniamkhiatna thu Topa in a muh ciangin Shemaiah tungah Topa’ thu hong tung hi: “Amaute kiniamkhiat ahih manin ka susia kei ding hi; amaute ka suaktasak liai-liai tei ding a, Shishak’ khut tawh Jerusalem tungah ka hehna ka tungsak kei ding hi.

⁸ Ahi zongin amaute in keima nasepna leh gam sung kumpite’ nasepna a theih nadingun amaute in ama nasemte suak ding uh hi,” a ci hi.

⁹ Tua ahih ciangin Jerusalem a simin Izipt kumpipa Shishak hong kuanto hi; amah in Topa’ inn-a vanmanphate leh kumpipa’ inn-a vanmanphate lakhia hi; amah in na khempeuh la khia hi. Amah in Solomon’ bawlsa kham lumte zong lakhia hi;

¹⁰ tua ciangin kumpi Rehoboam in tuate’ taangin sumngo lum bawl a, kumpipa’ kongcing ahi inncing a ukte’ khut sungah tuate ap hi.

¹¹ Topa’ innah kumpipa a pai simin a cingte hong pai-in tuate keng uh a, tua ciangin cin’na inndei sungah tuate koih kik uh hi.

¹² Amah in a kiniamkhiat ciangin siat cimitna a pian’ loh nadingin ama tung panin Topa’ hehna kiheikhia hi; tua tham loin Judah gam sungah thu-paizia zong hoihsak hi.

¹³ Tua ahih ciangin kumpi Rehoboam amahmah Jerusalem ah kikipsakin uk hi. Rehoboam in uk ding a kipatin kum sawmli-le-khat pha a, Israel minam khempeuh sung panin a min koih nadingin Topa in a teelkhiat khuapi Jerusalem ah amah in kum sawm-le-sagih sung uk hi. Ama nu’ min in Naamah hi a, Ammon mi ahi hi.

¹⁴ Amah in Topa zon’ ding a lungsim ah koih lo ahih manin a sia gamta hi.

¹⁵ Tu-in Rehoboam gamtatnate, a kipatna pan a tawpna dong, kamsang Shemaiah leh thu-mupa Iddo’ khang tangthu sungah kigelh hilo ahi hiam? Rehoboam leh Jeroboam kikalah gal kidona om tawntung hi.

¹⁶ Tua ciangin Rehoboam a pate tawh ihmu a, David khuapi sungah kivui hi; tua ciangin a tapa Abijah in ama taangin uk hi.