1 SAMUEL MASA 7 - Tedim Bible

¹ Tua ciangin Kiriath-jearim mite hong pai-in Topa’ thuciamna singkuang puato uh a, mual tungah a om Abinadab’ inn-ah paipih uh hi; Topa’ thuciamna singkuang a en dingin amaute in ama tapa Eleazar ap uh hi.

Samuel in Israel Thukhen

² Kiriath-jearim-ah thuciamna singkuang a om a kipan, hun saupi, kum sawmnih bang pha a, Israel mite khempeuh in Topa ngai-in thuum uh hi.

³ Tua ciangin Samuel in Israel mite khempeuh kiangah, “Na lungsim khempeuh uh tawh Topa lamah a kihei kik na hih uh leh note lak panin gamdang pasiante leh Ashtaroth milim koih khia-in Topa lamah na lungsim uh ngat un la, ama’ na bek sem un; tua ciangin amah in Filistiate khut sung panin note hong honkhia ding hi,” a ci hi.

⁴ Tua ahih ciangin Israelte in Baalte leh Ashtaroth koih khia-in Topa’ na bek sem uh hi.

⁵ Tua ciangin Samuel in, “Israelte khempeuh Mizpah-ah khawm un, note adingin Topa tungah thu ka ngen ding hi,” a ci hi.

⁶ Tua ahih ciangin amaute Mizpah-ah kikhawm uh a, tui tawi-in Topa mai-ah sungkhia uh a, tua ni-in an tangin tua lai munah, “Topa tungah i khial khin zo hi,” a ci uh hi. Samuel in Israel mite Mizpah-ah thukhen hi.

⁷ Israel mite Mizpah-ah a kikhopna thu Filistiate in a zak uh ciangin Israelte a do dingin Filistia uliante paito uh hi. Israel mite in tua thu a zak uh ciangin amaute in Filistiate kihta uh hi.

⁸ Tua ciangin Israel mite in Samuel kiangah, “Filistiate khut sung panin amah in eite hong hotkhiat theih nadingin Topa i Pasian tungah eite adingin thunget na khawl kei in,” a ci uh hi.

⁹ Tua ahih ciangin Samuel in nawi a ne lai tuuno khat la-in Topa tungah a bup-a meihal biakna-in pia hi; Israelte’ adingin Topa tungah Samuel kiko a, Topa in amah na dawng hi.

¹⁰ Samuel in meihal biakna a piak lai takin Filistiate in Israelte a do dingin hong naih uh hi; ahih hangin Topa in aw lianpi tawh tua ni-in Filistiate thawn gawpin amaute buaigawp sak hi; Israelte mai-ah amaute kinotkhia hi.

¹¹ Tua ciangin Mizpah panin Israel mite paikhia-in Filsitiate delh uh a, Bethkar nuai ciang dong amaute vatgawp uh hi.

¹² Tua ciangin Samuel in suangtum khat la-in Mizpah leh Jeshanah kikalah phut a, a min Ebenezer phuak hi; bang hang hiam cih leh amah in, “Tu ciangciang Topa in eite hong huh hi,” a ci hi.

¹³ Tua ahih ciangin Filistiate kizo a, Israelte’ gam sungah tumkik nawn lo uh hi. Samuel’ hun sung khempeuh Topa in Filsitiate lang pang hi.

¹⁴ Israelte tung panin Filistiate in a laksa khuapite, Ekron panin Gath ciang kikal sung teng, Israelte tungah kipia kik hi; Israelte in Filistiate khut sung panin a gam uh la kik uh hi. Israelte leh Amor mite kikalah zong kilemna om hi.

¹⁵ Samuel in a nuntak sung tawntung Israelte thukhen hi.

¹⁶ A kum kumin Bethel, Gilgal, leh Mizpah-ah kot pai hi; amah in hih munte khempeuh ah Israelte thukhen hi.

¹⁷ Tua ciangin Ramah-ah amah ciahkik zel hi; bang hang hiam cih leh tua lai-ah ama inn om a, tua lai-ah zong Israelte tungah thukhen na sem hi. Amah in tua lai-ah Topa ading biakna tau khat lam hi.