1 SAMUEL MASA 4 - Tedim Bible

¹ Tua ciangin Israel khempeuh in Samuel thu zui uh hi. Tu-in Israel in Filistia mite a do dingin kuankhia uh hi; amaute in Ebenezer-ah phual sat uh a, Filistia mite in Afek-ah phual sat uh hi.

Filistia mite in Thuciamna singkuang Man

² Israel a do dingin Filistia mite kigual uh a, gal a kido uh ciangin Filistia mite in Israelte zoin galphual sungah mi tulli bang that uh hi.

³ Mihonte giahphualah hong ciah ciangin Israel upate in, “Bang hangin Topa in tu ni-in Filistia mite mai-ah eite hong taisak ahi hiam? Amah in eite lakah hong pai-in i galte’ vangliatna panin eite hong hotkhiat theih nadingin Topa’ thuciamna singkuang Shiloh panin paipih ni,” a ci uh hi.

⁴ Tua ahih ciangin mite in Shiloh-ah mi paisak uh a, Kherubte tungah a tu Vanglianpen Topa’ thuciamna singkuang tua lai panin hong pua uh hi; Eli’ tapa nihte, Hofni leh Finehas Pasian’ thuciamna singkuang tawh tua lai-ah om uh hi.

⁵ Topa’ thuciamna singkuang giahphual sung hong tun’ ciangin Israelte khempeuh nakpi takin awng uh a, lei thawn hi.

⁶ Filistia mite in awtna gamlumna a zak uh ciangin amaute in, “Hebru mite’ giahphual-ah nakpi-a hih bang otna bang a cih nopna ahi hiam?” a ci uh hi. Topa’ thuciamna singkuang giahphual a tun’ khitna a theih uh ciangin,

⁷ Filistia mite lau uh hi; bang hang hiam cih leh amaute in, “Giahphual ah a pasiante uh tung zo hi,” a ci uh hi. Amaute in, “Gimna ngah hi ta hang!. Bang hang hiam cih leh ni dangin hih bang piang ngei lo hi.

⁸ Gimna ngah hi ta hang! Kua in hih a thahat pasiante’ vangliatna panin eite hong honkhia zo ding ahi hiam? Hihte in gimna a tuamtuamte tawh Iziptte gamlakah a vat gawp pasiante ahi hi.

⁹ Hang un la, pasal bangin gamta un, Filistia mite aw, tua hi kei leh amaute in note’ sila hong hih mah bangin Hebru mite’ sila na suak ding uh hi; pasal lungsim nei-in do un,” a ci uh hi.

¹⁰ Tua ahih ciangin Filistia mite in do a, Israelte kizo in, mi khempeuh a inn ciat uhah tai uh hi; mi tampi tak kithat hi; bang hang hiam cih leh Israelte’ khe galkap mi tulsawmthum puk hi.

¹¹ Tua ciangin Pasian’ thuciamna singkuang zong kiman hi; Eli’ tapa nihte, Hofni leh Finehas zong kithat hi.

¹² Galphual panin Benjamin mi khat hong tai-in a puan kikeek leh a lu tungah lei khu-in Shiloh hong tung hi.

¹³ Amah a tun’in, lampi gei-ah a vilin ama tutna-ah Eli na tu hi, bang hang hiam cih leh Pasian’ thuciamna singkuang hangin a lungsim liing hi. Mipa khuapi sung hong tungin a thu teng a gen ciangin khuapi mi khempeuh kiko uh hi.

¹⁴ Eli in kikona awging a zak ciangin amah in, “Hih gamlumna bang ahi hiam?” a ci hi. Tua ciangin mipa manlangin hong pai-in Eli kiangah gen hi.

¹⁵ Tu-in Eli kum sawmkua leh kum giat pha a, a mitte mangin khua mu thei lo hi.

¹⁶ Mipa in Eli kiangah, “Keimah in galphual panin hong ciahpa ka hi hi; tu ni-in galphual panin kong tai hi,” a ci hi. Tua ciangin amah in, “Ka tapa aw, bangci ahi hiam?” a ci hi.

¹⁷ A thu hong puakpa in dawngin, “Filistia mite mai-ah Israelte tai uh a, mi tampi tak zong kithat hi; na tapa nihte, Hofni leh Finehas zong si uh a, Pasian’ thuciamna singkuang kiman khin hi,” a ci hi.

¹⁸ Amah in Pasian’ thuciamna singkuang a gen ciangin kulh kongpi gei a tutna mun panin Eli thalpuk hi; a ngawng kitanin si hi; bang hang hiam cih leh amah puteek hi-in gik hi. Amah in Israelte kum sawmli sung thukhen hi.

¹⁹ Tu-in a monu, Finehas’ zi, nau paai-in suak dektak hi. Pasian’ thuciamna singkuang a kimatna leh a teekpa leh a pasal a sihna thu a zak ciangin amah kunin nau suak hi; bang hang hiam cih leh a nat hun tung hi.

²⁰ Amah si dektak a, ahi zongin amah a don numeite in ama kiangah, “Lau kei in, tapa khat na nei hi,” a ci hi. Ahih hangin amah in dawng lo a, zong don lo hi.

²¹ Tua ciangin amah in, “Israelte sung panin minthan’na paikhia khin ta!” ci-in a naungek Ikhabod phuak hi; bang hang hiam cih leh Pasian’ thuciamna singkuang a kimat hang leh a teekpa leh a pasal’ hang ahi hi.

²² Amah in, “Pasian’ thuciamna singkuang kiman khin ahih manin Israelte sung panin minthan’na paikhia khin ta hi,” a ci hi.