1 SAMUEL MASA 25 - Tedim Bible

David leh Abigail

¹ Tu-in Samuel si hi; Israelte kikhawmin ama hangin kap uh a, amaute in Ramah-a om ama innah amah vui uh hi. Tua ciangin David ding-in Paran gamlakah paisuk hi.

² Karmel mual-ah nasep a nei mi khat Maon khua-ah om hi. Tua-pa hau mahmah hi; amah in tuu tulthum leh keel tulkhat nei hi. Amah in Karmel ah a tuumul met hi.

³ Tu-in tua mipa’ min in Nabal hi a, a zi’ min in Abigail ahi hi, Tua numei in tei leh melhoih a thuah khat hi a, ahih hangin a pasal pen a ki-uk zolo mi leh a gamtat sia khat ahi hi; amah in Kaleb mi ahi hi.

⁴ Nabal in a tuumul a metna David in gamlakah za hi.

⁵ Tua ahih ciangin David in tangval sawm sawl hi; David in tangvalte kiangah, “Karmel ah paito-in Nabal kiangah pai un la, keima min tawh amah hopih un.

⁶ Hih bangin amah na hopih ding uh hi: ‘Nang tungah nopna om ta hen, na innkuan tungah nopna om ta hen, na neih khempeuh tungah nopna om ta hen,

⁷ Ganmul mette na neihna ka za hi; tu-in na tuucingte kote tawh omin amaute tungah siatna ka bawl kei uh a, Karmel ah a om sung teng uh amaute in bangmah man’suah lo uh hi.

⁸ Na tangvalte uh dong in, amaute in nang kiangah hong gen ding uh hi. Tua ahih ciangin na mai-ah ka tangvalte maipha musak in; bang hang hiam cih leh pawi ni-in kong pai uh hi. Na khut sungah na neih peuhpeuh na nasemte leh na tapa David tungah pia in,’ ci un,” a ci hi.

⁹ David tangvalte hong tun’ ciangin amaute in hih thu khempeuh David minin Nabal kiangah gen uh hi; tua ciangin amaute in ngak uh hi.

¹⁰ Tua ciangin Nabal in David’ nasemte dawngin, “David kua ahi hiam? Jessi’ tapa kua ahi hiam? Tu lai-in a tote kiang panin a taikhia nasem tampi om hi.

¹¹ Ka anlum leh ka tui leh ka ganmul mette’ adingin ka gawh ka sate la-in koi lai pan-a hong pai cih ka theih loh mite tungah pia ding ka hi hiam?” a ci hi.

¹² Tua ahih ciangin David’ tangvalte kihei a, ciah kikin hih thu khempeuh ama kiangah gen uh hi.

¹³ Tua ciangin David in ama mite kiangah, “Mi khempeuh in na namsau uh kuah ciat un!” a ci hi. Amaute khempeuh in a namsau uh kuah uh hi; David in zong a namsau kuah hi; mihing zali bang David nungah paito uh a, mihing zanihte van tawh om uh hi.

¹⁴ Ahih hangin Nabal nasem tangvalte khat in Nabal’ zi Abigail kiangah genin, “En in, ka topa uh a hopih dingin gamlak panin David in a kamtaite hong sawlkhia hi; amah in amaute na tai hi.

¹⁵ Ahi zongin kote tungah tua mite hoih mahmahin kote in siatna ka thuak kei uh a, amaute tawh ka pai lai teng uh gamlakah ka om sungun bangmah ka man’suah kei uh hi;

¹⁶ tuute kemin amaute tawh ka om sung khempeuh uh kote adingin sun leh zanin amaute in kulhpi ahi hi.

¹⁷ Tua ahih ciangin hih thu thei in la, na hih ding ngaihsun in; bang hang hiam cih leh ka topa leh a innkuan khempeuh tungah siatna tun’sak ding kingaihsun a, amah a khan’sia ahih manin kuamah in hopih thei lo hi,” a ci hi.

¹⁸ Tua ciangin Abigail kinawhin, anlum lum zanih, leh leenggahzu savun thawl nih, leh a semsa tuu nga, leh ankan lawh nga, leh leenggahkeu bawk zakhat, leh thei moh zanih la-in late tungah tuate guang hi.

¹⁹ Tua nu in a tangvalte kiangah, “Keima mai-ah na paisuak un; en un, note nungah kei kong pai hi,” a ci hi. Ahih hangin amah in a pasal Nabal hilh lo hi.

²⁰ Amah la tungah tuangin mual liah-ah a paisuk lai takin, en in, David leh a mite ama lamah hong paisuk uh hi; amah in amaute dawn hi.

²¹ Tu-in David in, “Ama neihsa khempeuh khat zong a mang lo dingin hih mipa neih khempeuh gamlakah a mawkna-in ka cing hi; amah in hih thuhoihte a sia tawh kei tungah hong thuk hi.

²² Zingsang ciangin ama neihsa khempeuh lakah pasal khat zong ka siit tak leh Pasian in keimah David hong dawm kei ta hen,” na ci khin hi.

²³ Abigail in David a muh ciangin kinawh a, la tung panin tuakin David mai-ah maipuk a, lei lakah kun hi.

²⁴ Ama khe phungah pukin, “Kei tung bekah, ka topa aw, mawhna om ta hen; na kiangah na nasemnu thu hong gensak in la, na nasemnu thugente hong ngai in ci-in kong thum hi.

²⁵ Ka topa in hih a khan’sia mipa Nabal ngaihsun kei in; bang hang hiam cih leh amin mah bangin amah zong ahi hi; Nabal in ama min hi a, haina in amah vukcip hi; ahih hangin na nasemnu keimah in nangma hong sawl na tangvalte ka mu kha kei hi.

²⁶ Tua ahih ciangin tu-in, ka topa aw, Topa nungta-in, nangma nuntakna a hin’mah bangin mithah nading pan leh nangma khut tawh thuhkikna na hih loh nadingin Topa in nang hong kho ahih manin, tu-in na galte leh nangma tungah siat nading a zongte in Nabal bang ta hen.

²⁷ Tu-in na nasemnu keimah in nangmah ka hong puak hih letsong nangma nung hong zui tangvalte hong piasak in.

²⁸ Na nasemnu khialhna hong maisak in ci-in kong thum hi; bang hang hiam cih leh nangmah in Topa’ galte do na hih manin Topa in na innkuan kipsak paisuak ding hi; na nuntak lai teng nang sungah siatna kimu lo ding hi.

²⁹ Nangmah delhin hong that dingin mite hong thawh leh, nangmah in Topa na Pasian kepna sung a hing mite lakah na om ding hi; amah in suang lotna kuang pan lotkhiat bangin na galte lawnkhia ding hi.

³⁰ Topa in nangmah tawh kisai thu a hoih a gente khempeuh tawh kizui-in hong hihin, Israelte tungah ulian-in nang hong koih khit ciangin,

³¹ thu om lopi-in mi thahna ahi a, nangmah mah in phulakna hangin ahi zongin, dah nading thu ahi a, lungsim nat nading thu ahi zongin na nei kei ding hi. Topa in lim takin nang hong bawl ciangin na nasemnu hong phawk in,” a ci hi.

³² Tua ciangin David in Abigail kiangah, “Tu ni-in keimah dawn dingin nang a hong sawl Israelte’ Pasian, Topa in thupha ngah ta hen!

³³ Tu ni-in mithahna leh keima khut tawh phulak nading panin keimah hong kem nangma ngaihsutna in thupha ngah ta hen!

³⁴ Bang hang hiam cih leh nang kong gimsak nading panin hong kho Israelte’ Pasian, Topa in a nungta taktak ahih mah bangin, nang hong kinawhin keimah dawn dingin hong pai lo hi lecin, zingsang ciangin Nabal sung pan pasal khat zong om nawn lo ding hi,” a ci hi.

³⁵ Tua ciangin David in ama tung panin amah a puakte sang hi; amah in tua nu kiangah, “Lung nuamin na inn-ah ciah to ta in; thei in, na thu ka ngai a, nong thuumna kong pia khin hi,” a ci hi.

³⁶ Tua ciangin Nabal kiangah Abigail hong tung hi; en in, kumpipa’ pawi tawh kibangin amah in a inn sungah pawi na kham hi. Nabal lungnuam mahmah hi; bang hang hiam cih leh amah in zu kham mahmah hi; tua ahih ciangin zingsang khuavak mateng ama kiangah bangmah gen peuhmah lo hi.

³⁷ Zingsang ciang, Nabal’ zukhamna a ven’ ciangin a zi in ama kiangah hih thute gen a, thakhatin a lungtang si-in amah suangtum bang hi.

³⁸ Tua khit ni sawm bang ciangin Topa in Nabal vat hi; tua ciangin amah si ta hi.

³⁹ Nabal a sihna thu David in a zak ciangin amah in, “Nabal’ khut tung panin ka ngah zahkona hong thuk sakin, siatna panin a nasempa a lenkik Topa in thupha ngah ta hen; Topa in Nabal’ gamtat siatna ama lu tung mah ah tung kiksak hi,” a ci hi. Tua ciangin David in mi sawlin ama zi dingin Abigail helsak hi.

⁴⁰ David’ nasemte Karmel-a Abigail kiang a tun’ uh ciangin amaute in tua nu kiangah, “David in amah zi dingin a la dingin kote nang kiangah hong sawl hi,” a ci uh hi.

⁴¹ Tua ciangin amah ding-in lei-ah a mai kun a, “En un, na nasemnu in ka topa’ nasemte’ khe a silsak ding nasem ahi hi,” a ci hi.

⁴² Tua ciangin Abigail kinawhin ding-in la tungah tuang a, ama nasem numei nga in amah keem hi; David kamtaite nung zui-in pai a, tua ciangin ama zi suak hi.

⁴³ David in Jezre-el khuami Ahinoam zong la hi; amau tegel ama zi suak uh hi.

⁴⁴ Saul in ama tanu Mikhal, David’ zi pen, Gallim khuami Laish tapa Paltiel tungah na pia khin hi.