1 PETER MASA 2 - Tedim Bible

Nuntakna Suang Leh Mi Siangtho Pawl

^1-3 Tua ahih ciangin Topa in a pha hi ci-in note in na ciam zo uh ahih leh, gitlohna khempeuh, mi kheemna leh simtatna leh en’na khempeuh, gensiatna apawl apawl khempeuh note in paaikhia-in hong gupkhiatna ah na khan’toh nadingun Pasian’ thu nawizu siangtho a duh a suak tung naupangte bangin lungsim na nei un.

⁴ Mite in a nilkhiat hangin Pasian’ teel nuntakna suangpi ahi, tua Topa kiangah pai-in,

⁵ note in zong a nungta suangte bangin a kilam, Kha inn na hi uh hi; Zeisu Khazih hangin Pasian san’ theih ding akilawm biakna a pia thei, a siangtho siampi pawl-in zong a piang na hi uh hi.

⁶ Bang hang hiam na cih uh leh: “A kiteel a manpha inn kiu khuam bul suangpi, Zion mual tungah ka koih hi. Tua suangpi a beel mi in, Zumna a thuak kei ding hi,” ci-in Lai Siangtho sungah a kigen hi.

⁷ Tua ahih ciangin a um note adingin tua suangpi in a manpha mahmah hi. A um lote ading ahih leh: “Inn lamte’n a nilkhiat suang in, Anung ciangin inn kiu suang a piang hi,” cih ahi zongin,

⁸ “A puksak nading suangpi, a khialhsak nading suangpi zong ahi hi,” ci-in a kigelh zo hi. Bang hang hiam na cih uh leh, amaute in ngai loin, Pasian’ thu suikha-in a puk uh hi. Tua thu tawh a kituak nadingun tua mite a kikoih uh hi.

⁹ Note na hih uh leh, khuamial sung pan a lamdang khuavak sungah a hong sampa’ vanglian hehpihna na lahkhiat nadingun, a hong teel mi pawl, man’na nuam a nei siampi pawl, mi siangtho pawl, Pasian in a uk, a neih mi pawlte na hi uh hi.

¹⁰ Note in nidang lai-inah a mi pawlte na hih loh uh hangin tu-in Pasian’ mi pawlte na hi uh hi. Nidang lai-inah hehpihna na ngah loh uh hangin tu-in na ngah zo uh hi.

Pasian’ Sila Bangin Gamta Un

¹¹ Ka itte aw, kha tawh a kido thei pumpi tawh kipawl deihgawhnate khempeuh na tan’ nadingun, khualzinte, mi peemte bang ahi note ka hong thuum hi.

¹² Gentailte in gitlohna a bawl mite ci-in note hong kosiat uh hangin Pasian in hong en a, thu a khen ni ciangin na gamtatna uh a pha amaute in a muh uh ciangin Pasian’ min a phat nadingun, amaute mai-ah a kilawm a kituakin na gamta un.

^13-14 Topa ading a lian bel kumpipa ahi zongin, a pha lo gamta mite daan pia ding leh a pha gamta mite pahtawi dingin kumpipa in a koih mangte ahi zongin, mite in a koih ukna nei khempeuh ahi zongin na mang un.

¹⁵ Bang hang hiam na cih uh leh, note in a pha na gamtat uh leh, mi haite a lungpil lohna kam na thukkik theih nadingun Pasian in tua bangin a deih hi.

¹⁶ To neilo na hih uh hangin to nei lo na hihna uh tawh gitlohna a seel mite bangin na gamta kei un; Pasian’ sila bangin na gamta un.

¹⁷ Mikhempeuh zahtak un. Ute naute na it un. Pasian na kihta un. Kumpipa na zahtak un.

Khazih’ Thuakna Lim

¹⁸ Silate aw, kihtakna tawh na tote uh ukna na mang un. Na tote un mi gi a, lungnemna hoih nei uh ahi zongin, lungkhauh nei uh ahi zongin na mang un.

¹⁹ Mi khat in ahi lo bawlsiatna a thuak ciangin Pasian maitang ngaihsunin a thuak zawh leh, thupha a ngah ding hi.

²⁰ Mawhna na bawl manunah daan na thuak uh ciangin lungnemin na thuak uh leh, bang phattuamna a om hiam? A pha na bawl uh a, gimna na thuak uh ciangin lungnemin na thuak uh leh, Pasian mai-ah phatna na ngah ding uh hi.

²¹ Bang hang hiam na cih uh leh, tua bang deihna in note hong sam zo hi. Khazih in zong note ading gimna thuak a, ama khekhap na zuih nadingun a lim a koih zo hi.

²² Amah in mawhna ahih kei hi, a kam panin zong thu zuau a kimu kei hi.

²³ Kosiatna a thuak lai takin a kosia kik kei hi, gimna a thuak lai takin lau nadingin tawngkik loin, thuman a khenpa’ khut sungah ama pumpi a pia hi.

²⁴ Eite in mawhna lamah a si i hih khit ciangin dikna lamah i nuntak nadingin, eite mawhnate amahmah in singkhuam tungah ama pumpi-in a thuak hi; ama liamnate hangin damna i ngah zo hi.

²⁵ Nidang lai-inah note in tuute bangin lam na khialh uh hangin tu-in ahih leh, note kha uh hong Ukpa leh Tuucingpa kiangah na tungkik zo uh hi.