1 KHANG TANGTHU MASATE 27 - Tedim Bible

Kumpi gam Uliante

¹ Tu-in Israel mite, beh lutangte, a tul leh a za-a a ukte, leh khen khatah mi tul sawmnih leh tulli a om, kum tawntung kha khat khit kha khat hong tungin a kuankhia a khente tawh kisai-in na khempeuh ah kumpipa’ na a sem a uliante in:

² Zabdiel’ tapa Jashobeam in a kha masa sungin a khen masa a uk ahi hi; ama khen sungah tul sawmnih leh tulli om hi.

³ Amah in Perez’ suan leh khak hi a, a kha masa sungin galkap a ukte khempeuh a ukpi ahi hi.

⁴ Ahoah-te beh Dodai in a kha nihna sunga a khen a ukpi ahi hi; ama khen sungah tul sawmnih leh tulli om hi.

⁵ A kha thumna adingin a uk a thumna-pa, siampi Jehoiada’ tapa Benaiah in a ukpi ahi hi; ama khen sungah tul sawmnih leh tulli om hi.

⁶ Hihpa in mihing sawmthumte sungah a thahat, mihing sawmthumte a uk Benaiah ahi hi; ama tapa Ammizabad in ama khen a ukpa ahi hi.

⁷ Joab sanggampa Ashahel in a kha lina adingin a lina hi a, ama nungah amah a liah dingin a tapa Zebadiah om hi; ama khen sungah tul sawmnih leh tulli om hi.

⁸ A kha ngana adingin a uk a ngana-pa in Izrah-te beh Shamhuth ahi hi; ama khen sungah tul sawmnih leh tulli om hi.

⁹ A gukna, a kha gukna adingin Tekoa khua mi Ikkesh’ tapa Ira ahi hi; ama khen sungah tul sawmnih leh tulli om hi.

¹⁰ A sagihna, a kha sagihna adingin Efraim’ suante sung panin Pelon khua mi Helez ahi hi; ama khen sungah tul sawmnih leh tulli om hi.

¹¹ A giatna, a kha giatna adingin Jerah mi sung panin Hushan khua mi Sibbekai ahi hi; ama khen sungah tul sawmnih leh tulli om hi.

¹² A kuana, a kha kuana adingin Benjamin mi sung panin Anathoth khuami Abiezer ahi hi; ama khen sungah tul sawmnih leh tulli om hi.

¹³ A sawmna, a kha sawmna adingin Zerah mi sung panin Netofah khua mi Maharai ahi hi; ama khen sungah tul sawmnih leh tulli om hi.

¹⁴ A sawm-le-khatna, a kha sawm-le-khatna adingin Efraim suante’ sung panin Pirathon khuami Benaiah ahi hi; ama khen sungah tul sawmnih leh tulli om hi.

¹⁵ A sawm-le-nihna, a kha sawm-le-nihna adingin Othniel suante’ sung panin Netofah khuami Heldai ahi hi; ama khen sungah tul sawmnih leh tulli om hi.

¹⁶ Israel minamte tungah a ukpite in: Reuben mite’ adingin Zikri’ tapa Eliezer ahi hi; Simeon mite’ adingin Ma-akah’ tapa Shefatiah ahi hi;

¹⁷ Levi adingin Kemuel’ tapa Hashabiah ahi hi; Aaron adingin Zadok ahi hi;

¹⁸ Judah’ adingin David, sanggamte’ sung panin Elihu ahi hi; Issakhar’ adingin Mikhael’ tapa Omri ahi hi;

¹⁹ Zebulun’ adingin Obadiah’ tapa Ishmaiah ahi hi; Naftali adingin Azriel’ tapa Jeremoth ahi hi;

²⁰ Efraim mite’ adingin Azaziah’ tapa Hoshea ahi hi; Manasseh minam a langte’ adingin Pedaiah’ tapa Joel ahi hi;

²¹ Gilead gam sunga Manasseh minam a langte adingin Zekhariah’ tapa Iddo ahi hi; Benjamin adingin Abner’ tapa Ja-asiel ahi hi;

²² Dan adingin Jeroham’ tapa Azarel ahi hi. Hihte in Israel minamte’ makaite ahi uh hi.

²³ Israel mite vantung aksi zahin a tamin a bawl nading Topa in thuciam khin ahih manin David in kum sawmnih nuaisiah a pha mite sim lo hi.

²⁴ Zeru-iah’ tapa Joab in sim ding kipan a, ahih hangin zo man lo hi; bang hang hiam cih leh hih thu hangin Israel tungah Pasian’ hehna hong tung a, Kumpi David’ khang tangthu sungah tua a kisimte kikhum lo hi.

²⁵ Kumpipa’ van manpha a ukte in: Kumpipa’ van manpha koihnate ah Adiel’ tapa Azmaveth ahi hi; tua ciangin gam sunga van manpha koihnate, khuapi sungate, khuaneute leh tausangte, sunga omte tungah Uzziah’ tapa Jonathan ahi hi;

²⁶ tua ciangin lo kho dingin lo nasep a sem mite tungah Khelub’ tapa Ezri ahi hi;

²⁷ tua ciangin leenggui lote tungah Ramah khuami Shimei ahi hi; tua ciangin leenggui lo panin a piang leenggahzu koihnate’ adingin Shifmoth khuami Zabdi ahi hi.

²⁸ Shefelab gam sunga om Oliv leh theiba kungte tungah Gederah khuami Baalhanan ahi hi; tua ciangin sathau koihnate tungah Joash ahi hi.

²⁹ Sharom gam sungah a gamta ganhonte tungah Sharon khuami Shitrai ahi hi; kuam sunga om ganhonte tungah Adlai’ tapa Shafat ahi hi;

³⁰ Kalaohte tungah Ishmael mi Obil ahi hi; tua ciangin la a nute tungah Meronoth khuami Jehdeiah ahi hi.

³¹ Tuuhonte tungah Hagri mi Jaziz ahi hi. Hihte khempeuh in Kumpi David’ neihsa a kemte ahi uh hi.

³² David’ pano Jonathan in thu thei mi leh lai thei mi ahih manin thu-lam-lakpa ahi hi; amah leh Hakmoni’ tapa Jehiel in kumpipa’ tapate cing uh hi.

³³ Ahithofel in kumpipa’ thu-lamlakpa hi a, Arkhi mi Hushai in kumpipa’ lawmpa ahi hi.

³⁴ Ahithofel a sih ciangin Benaiah’ tapa Jehoiada leh Abiathar in laih uh hi. Joab in kumpipa’ galkapte a ukpa ahi hi.