1 KHANG TANGTHU MASATE 23 - Tedim Bible

¹ Tu-in David teekin kum tampi pha a, amah in Israel tungah kumpi-in a tapa Solomon koih hi.

Levi mite leh Siampite a Kisehkhenna leh Amau’ Nasepnate

² David in Israel makai khempeuh leh siampi leh Levi mite khawm hi.

³ Levi mite kum sawmthum panin a tungsiah teng kisim a, a vekpi-in pasal tul sawmthum leh tulgiat pha hi.

⁴ David in, “Hihte tul sawmnih leh tulli in Topa’ inn sungah nasep uk ding a, tulguk in mangte leh thukhente hi ding a,

⁵ tulli in kongcingte, leh tulli in phatna ding a, ka bawlsa lasaknate tawh Topa’ tungah phatna pia ding uh hi,” a ci hi.

⁶ Tua ciangin David in Levi mite a beh behin pawl thum suah a, tuate in: Gershon pawl, Kohath pawl, leh Merari pawl ahi uh hi.

⁷ Gershon’ tapate in Ladan leh Shimei ahi uh hi.

⁸ Ladan’ tapate in: A ukpi Jehiel, leh Zetham, leh Joel, thum pha uh hi.

⁹ Shimei’ tapate in: Shelomoth, Haziel, leh Haran, thum pha uh hi. Hihte in Ladan’ beh lutangte ahi uh hi.

¹⁰ Tua ciangin Shimei’ tapate in: Jahath, Zina, Jeush, leh Beriah ahi uh hi. Hih lite in Shimei’ tapate ahi uh hi.

¹¹ Jahath a ukpi hi-in, Zina a nihna ahi hi; ahih hangin Jeush leh Beriah-te in tapa tampi nei lo uh ahih manin innkuan khat kisuak sakin sim khatin kisim khawm hi.

¹² Kohath’ tapate in: Amram, Izhar, Hebron, leh Uzziel, li pha uh hi.

¹³ Amram’ tapate in: Aaron leh Moses ahi uh hi. Amah leh a tapate in Topa’ mai-ah paknamtui a hal tawntung ding leh ama na semin ama min tawh thupha a piak tawntung theih nadingin a siangtho pen nate a ap dingin Aaron kituam koih hi.

¹⁴ Ahih hangin Pasian’ mipa Moses’ tapate ahih leh Levi minamte lakah kisim hi.

¹⁵ Moses’ tapate in: Gershom leh Eliezer ahi uh hi.

¹⁶ Gershom’ tapate lakah Shebuel in a ukpi ahi hi.

¹⁷ Eliezer’ tapate lakah Rehabiah in a ukpi ahi hi; Eliezer in tapa dang nei lo a, ahih hangin Rehabiah’ tapate tam mahmah hi.

¹⁸ Kohath’ tapa nihna Izhar’ tapate lakah Shelomoth in a ukpi ahi hi.

¹⁹ Kohath’ tapa thumna Hebron’ tapate lakah: Jeriah a ukpi, Amariah a nihna, Jahaziel a thumna leh Jekameam a lina ahi hi.

²⁰ Kohath’ tapa lina Uzziel’ tapate lakah: Mikah a ukpi, leh Issiah a nihna ahi hi.

²¹ Merari’ tapate in: Mahli leh Mushi ahi hi. Mahli’ tapate in: Eleazar leh Kish ahi hi.

²² Eleazar in tapa nei loin si a, tanu bek nei hi; amau’ tanau, Kish’ tapate in amaute ten’pih uh hi.

²³ Mushi’ tapate in: Mahli, Eder, leh Jeremoth, thum pha uh hi.

²⁴ Hihte in Topa’ inn nasepna ah na a sem ding, kum sawmnih panin a tungsiah, a mi mi-in a minin a mi phazah zui-in a kiciamtehna bangin beh lutangte, a beh behin Levi’ suante ahi hi.

²⁵ Bang hang hiam cih leh David in, “Israel Pasian, Topa in a mite tungah kilemna pia zo hi; tua ciangin amah in Jerusalem ah om tawntung hi.

²⁶ Tua ahih ciangin Levi mite in puanbuk hita leh tua tawh kisai nasep nading nate khat peuhpeuh hita leh a puak ding uh kisam nawn lo hi,” a ci hi.

²⁷ Bang hang hiam cih leh David’ thupiakna a nunung pen tawh a kisim hihte in kum sawmnih panin a tungsiah Levi mi a phazah ahi hi—

²⁸ “ahih hangin amaute’ nasep in Topa’ inn nasepna ah Aaron’ suante huhin, inntualte leh inndeite kemin, biakna na khempeuh a siangtho sak ding, leh Pasian’ inn nasepna ah hih ding khat peuhpeuh a sem ding ahi uh hi;

²⁹ Ompihna Anlum, an tawh biak nadingin annel, silngo sawh loh anlum moh, a ki-em piakna, sathau tawh a kihel piakna, leh a tam tehna, ahih kei leh a lian tehna nasep khempeuh zong a huh ding ahi uh hi.

³⁰ Tua ciangin amaute zingsang simin ding ding uh a, lungdamna koin Topa phatin, nitakin zong tua mah bangin hih ding uh a,

³¹ a mal zah a kisam bangin sabbath nite, khadet nite, leh pawi nite-in Topa tungah meihal biakna a kipiak peuhpeuh ciangin a tawntungin Topa mai-ah om ding uh hi.

³² Tua bangin Levi mite in kikhopna puanbuk leh biakinn kemin, Topa’ inn nasepna ah amau’ behte ahi Aaron’ suante huh ding uh hi,” a ci hi.