1 KHANG TANGTHU MASATE 20 - Tedim Bible

David in Rabbah khua La

¹ Kumpite in khuakhal sungin galsimin kuankhia zel uh hi. Tua hun hoih khuakhal hong tun’ ciangin Joab in galkapte pai khiatpihin Ammon mite’ gam sugawp a, hong pai-in Rabbah khua umcih hi. Ahih hangin Jerusalem ah David om hi. Tua ciangin Joab in Rabbah khua vatin lumlet hi.

² Tua ciangin David in amau’ kumpipa’ kumpi lukhu ama tung panin lak khiatsak hi; tua lukhu kham talen khat gikin a sungah suangmanpha khat a omna amah in thei hi; tua hi a, David in tua lukhu ama lu tungah khu hi. Tua ciangin amah in tua khuapi panin van kinusiate tampi tak pai khiatpih hi.

³ Tua ciangin amah in tua sunga om mite pai khiatpihin sing-atnate leh tuzumte leh heite tawh na a sem dingin koih hi; tua bangin Ammon mite’ khuapite khempeuh ah David in hih hi. Tua ciangin David leh mi khempeuh Jerusalem ah ciah uh hi.

David’ Mite’ Thah Mithagolte

⁴ Hih thu khit ciangin Gezer ah Filistiate tawh kidona hong om hi; tua ciangin Hushah khua mi Sibbekai in mithagolte’ suan leh khakte khat ahi Sippi that hi; tua ciangin Fillistiate kinuaisiah hi.

⁵ Tua ciangin Filistiate tawh kidona om kik leuleu hi; tua hi a, Jair’ tapa Elhanan in a teipi kung siamlawngpi cia a pha, Gath khuami Goliath’ sanggampa Lahmi that hi.

⁶ Tua ciangin a khut lang tuakah khutme guk a nei, a khe lang tuakah zong kheme guk mah a nei, a vekpi-in sawmnih-le-li a nei, mi thalian khat a omna Gath ah gal om kik hi; amah zong mi thagolte’ sung pana hong piang ahi hi.

⁷ Amah in Israel a to ciangin David’ sanggampa Shimea’ tapa Jonathan in amah that hi.

⁸ Hihte in Gath a, mithagolte sung pana hong piang ahi uh hi; David leh a nasemte’ khutin amaute puk uh hi.