1 KHANG TANGTHU MASATE 18 - Tedim Bible

David in A Kumpi gam Khan

¹ Hih thu khit ciangin David in Filistiate zoin nuaisiah a, Filistiate’ khut sung panin Gath leh a khuaneute la hi.

² Tua ciangin amah in Moab mite zo a, Moab mite David’ nasem suakin siah hong puak uh hi.

³ Zobah leh Hamath gam kumpipa Hadadezer-in Eufrates gun kuam gamte ngah kik nuamin kuan ahih manin, David in amah doin zo hi.

⁴ Tua ciangin David in ama tung panin leeng galkap tulkhat, sakol tuang galkap tulsagih, leh khe galkap tul sawmnih la hi; tua ciangin David in leengkai sakol galkap khempeuh a zagui atsat sak a, ahih hangin leeng za khat’ adingin a kicing siit hi.

⁵ Zobah kumpipa Hadadezer huh dingin Damaskas-a Siria mite hong pai ciangin David in Siria mite tul sawmnih leh tulnih that hi.

⁶ Tua ciangin David in Siria gam Damakas ah khuacingte koih hi; tua ciang Siria mite David’ nasem suak uh a, siah puak uh hi. David a paina peuhpeuh ah Topa in gual zawhna pia hi.

⁷ Tua ciangin David in Hadadezer’ nasemte in a puak kham kibawl lumte la-in Jerusalem ah ciahpih hi.

⁸ Tua ciangin Hadadezer khuapite Tibhath leh Kun panin David in sumngo tampi tak la hi; Solomon in tuate tawh sumngo tuikuangpi leh khuampite leh sumngo um-le-beelte a bawl hi.

⁹ David in Zobah kumpipa Hadadezer’ galkap buppi a zawhna thu Hamath kumpipa To-u in a zak ciangin,

¹⁰ Hadadezer simin a zawhna hangin a hopih ding leh a lungdampih dingin Kumpi David kiangah a tapa Hadoram sawl hi; bang hang hiam cih leh Hadadezer in To-u tawh kido zel hi. Amah in kham ngun, leh sumngo tawh kibawl na namkim khempeuh puak hi;

¹¹ Kumpi David in hihte zong, Edom, Moab, Ammon mite, Filistiate, leh Amalek, minam khempeuh kiang panin a puak khiat ngun leh kham tawh Topa’ tungah ap khawm hi.

¹² Tua ciangin Zeru-iah’ tapa Abishai in Ci Kuamah Edom mite tulsawm leh tulgiat that hi.

¹³ Tua ciangin amah in Edom ah khuacingte koih hi; tua ciangin Edom mite khempeuh David’ nasem suak uh hi. Topa in David a paina peuhpeuh ah gualzawhna pia hi.

David’ Maangte

¹⁴ Tua ahih ciangin David in Israel khempeuh tungah uk hi; amah in a mite khempeuh tungah thuman leh thutang zang hi.

¹⁵ Zeru-iah’ tapa Joab in galkapte a uk ahi hi; Ahilud’ tapa Jehoshafat in thuciamtehpa ahi hi;

¹⁶ Ahitub’ tapa Zadok leh Abiathar’ tapa Ahimelek in siampite ahi uh hi; Shavsha in lai-atpa ahi hi;

¹⁷ Jehoiada’ tapa Benaiah in Khereth mite leh Peleth mite tungah a uk ahi hi; David’ tapate in kumpipa’ nasepna-ah maang liante ahi uh hi.