1 KHANG TANGTHU MASATE 13 - Tedim Bible

Thuciamna-singkuang Jerusalem ah Paipih ding David in Pulak

¹ David in a tul-a ukte leh a za-a ukte leh makai khempeuh tawh kikupna khat nei hi.

² Tua ciangin David in Israel a kikhawm khempeuhte kiangah, “Note in kilawm na sak uh a, Topa i Pasian’ deihna ahih leh, amaute eite kiangah hong pai khop theih nadingun Israel gam sungah a om lai i sanggamte leh lonona gam a nei khuapi sunga om siampite leh Levi mite kiangah mi sawl ni.

³ Tua ciangin thuciamna singkuang eite kiangah la kik ni; bang hang hiam cih leh Saul’ hun lai-in i don kei hi,” a ci hi.

⁴ Tua thu mi khempeuh in hoih sa ahih manin tua bangin hih ding a kikhawm khempeuh thukim uh hi.

Thuciamna-singkuang a La dingin David Pai

⁵ Tua ahih ciangin Kiriath-jearim panin Pasian’ thuciamna singkuang a ciahpih dingin David in Izipt gam Shihor lui panin Hamath lutna ciang dong Israel khempeuh khawm hi.

⁶ Tua ciangin David leh Israel khempeuh, kherubte tungah a tu Topa’ min tawh a kilo Pasian’ thuciamna singkuang a paipih to dingin, Kiriath-jearim a kici Baalah ah paito uh hi.

⁷ Amaute in Abinadab’ inn panin leeng thak khat tungah Pasian’ thuciamna singkuang pua uh a, Uzza leh Ahio in leeng hawl uh hi.

⁸ Tua ciangin David leh Israel khempeuh in Pasian’ mai-ah la leh laiza lasakna leh harp lasakna leh khuangneute leh daltuahte leh peengkulte leh a tha neih zah uh tawh gualnopna bawl uh hi.

⁹ Amaute Khido’ ancilna phual a tun’ uh ciangin bawngtalte muktu ahih manin Uzza in thuciamna singkuang len dingin a khut va zan kha hi.

¹⁰ Tua ciangin Uzza tungah Topa heh hi; amah in a khut tawh thuciamna singkuang su-kha ahih manin Topa in amah vat hi; tua ciangin Pasian’ mai tua lai-ah amah si hi.

¹¹ Uzza tungah Topa hehin daan pia ahih manin David zong a heh suak hi; tua mun in tu ni dongin Perez-uzza kici hi.

¹² Tua ni-in David in Pasian kihta hi; amah in, “Pasian’ thuciamna singkuang kei kiang innah bangci ciahpih theih ding ka hi hiam?” a ci hi.

¹³ Tua ahih ciangin David in a inn David khuapi ah thuciamna singkuang ciahpih lo a, Gath mi Obededom’ innah va koih hi.

¹⁴ Tua ciangin Pasian’ thuciamna singkuang Obededom’ innkuan tawh kha thum sung om hi; Topa in Obededom’ innkuan leh a neih khempeuh thupha pia hi.