1 KHANG TANGTHU MASATE 12 - Tedim Bible

Ziklag-ah David a Huhte

¹ Tu-in Kish’ tapa Saul’ hangin a ut utin a tat theih loh lai takin Ziklag a, David kiangah hong paite in hih mite ahi hi; gal sungah amah a huh a thahatte lakah amaute a kihelte ahi uh hi.

² Amaute in thaltawite hi uh a, tak lam khut ahi a, vei lam khut tawh ahi zongin thaltang leh suangte lawn thei uh hi: amaute in Saul’ behte Benjamin mi ahi uh hi.

³ A ukpi in Ahiezer hi a, tua ciangin Joash ahi hi, amaute gel in Gibeah khuami Shema-ah’ tapate ahi uh hi; Azamveth’ tapate Jeziel leh Pelet zong ahi hi; Anathoth khuami Berakah leh Jehu zong ahi hi.

⁴ Gibeon khuami Ishmaiah in mihing sawmthumte lakah a thahatpa leh sawmthumte a makaipa ahi hi; Gederah khuami Jeremiah, Jahaziel, Johanan, leh Jozabad zong ahi uh hi;

⁵ Harif mi Eluzai, Jerimoth, Bealiah, Shemariah, leh Shefatiah zong ahi uh hi;

⁶ Korah mi Elkanah, Issaiah, Azarel, Joezer, leh Jashobeam zong ahi uh hi.

⁷ Tua ciangin Gedor khuami Jeroham tapate Joelah leh Zebadiah ahi uh hi.

⁸ Gad minam sung panin gamlak a, mun muanhuai a, David kiangah a thahat a siam galhangte, lum leh teipi zat a siam, a maitang uh humpinelkai maitang bangin, mual tunga om sakhi bangin a manlang mi hong paite in:

⁹ A ukpi Ezer, a nihna Obadiah, a thumna Eliab,

¹⁰ a lina Mishamannah, a ngana Jeremiah,

¹¹ a gukna Attai, a sagihna Eliel,

¹² a giatna Johanan, a kuana Elzabad,

¹³ a sawmna Jeremiah, a sawm-le-khatna Makbannai ahi uh hi.

¹⁴ Hih Gad mite in galkap uliante hi a, a neuzawte in zakhat val, a golzawte in tulkhat val uk uh hi.

¹⁵ Hihte in Jordan a piau khempeuh a dimlet laitak kha masa sungin Jordan kantanin kuam sunga om mite nisuahna lam leh nitumna lamah a taisak mite ahi uh hi.

¹⁶ Tua ciangin Benjamin mi leh Judah mi pawlkhat David kiang mun muanhuai ah hong pai uh hi.

¹⁷ Amaute dawntuah dingin David pai khia-in amaute kiangah, “Kei kiangah kilawmtatna tawh keimah huh dingin hong pai na hih uh leh note tawh ka lungsim kihual khawm ding hi; ahih hangin keimah in bangmah khialhna nei lo napi-in ka langte tungah kei a lehhek dingin hong pai na hih uh leh, i pu i pate’ Pasian in thei hen la, note hong tai hen,” a ci hi.

¹⁸ Tua ciangin mihing sawmthum a ukpipa Amasai tungah Pasian Kha Siangtho hong tung a, amah in, “Kote in nangma’ aa hi ung, David aw; nang tawh om ung, Jessi’ tapa aw! Nopna, nopna nang tungah om hen la, nang hong huhte tungah nopna om ta hen! Bang hang hiam cih leh na Pasian in nang hong huh hi,” a ci hi. Tua ciangin David in amaute sang a, ama galkap uliante-in bawl hi.

¹⁹ Saul a do dingin Filistiate tawh David a kuan lai takin Manasseh mi pawlkhat tai-in David beel hi. (Ahi zongin David in Filistiate huh thei lo hi; bang hang hiam cih leh Filistiate a ukte in thu kikupna khat nei uh a, “Eite’ makaite’ siat nadingin a topa Saul kiangah David tai ding hi,” ci-in amah sawl khia uh hi.)

²⁰ David Ziklag ah a pai lai takin Manasseh sung panin tai-in amah a beelte in: Adnah, Jozabad, Jediael, Mikhael, Jozabad, Elihu, leh Zillethai, Manasseh sungah mi a tul-in a ukte ahi uh hi.

²¹ Amaute in mi’ na a sut thei mite panin David huh uh hi; bang hang hiam cih leh amaute in a thahat a vanglian mi hi uh a, galkap sungah a ukte ahi uh hi.

²² Pasian’ galkap hon bangin galkap hon tampi a phak dongin a ni ni-in David huh dingin mi hong pai pai hi.

Hebron-a David’ Galkapte

²³ Hihte in Topa’ thugen bangin Saul’ kumpi gam ama tungah a hei dingin Hebron a, David kiangah a pai galkap a khen phazah ahi uh hi.

²⁴ Judah mi lum leh tei a pua galkap tulguk leh zagiat ahi hi.

²⁵ Simeon mite sung panin galdo dingin a thahat a vanglian mihing tulsagih leh zakhat ahi hi.

²⁶ Levi mite sung panin tulli leh zaguk ahi hi.

²⁷ Aaron’ suante ulian Jehoiada, leh amah tawh mi tulthum leh zasagih ahi hi.

²⁸ A thahat a vanglian a khangto Zadok, leh ama beh sung panin galkap a ukte mi sawmnih-le-nih ahi hi.

²⁹ Tua hun ciang dong mi a tamzaw Saul tawh a kipawl, Saul’ behte ahi Benjamin mite sung panin mihing tulthum ahi hi.

³⁰ Efraim mite sung panin a thahat a vanglian, amau’ beh sungah a minthang mi tul sawmnih leh zagiat ahi hi.

³¹ Manasseh minam a lang sung panin, hong pai-in David kumpi-in a bawl dingin a min a kilo mihing tulsawm leh tulgiat ahi hi.

³² Issakhar sung panin Israel in bang a sep dingin kilawm cih a thei, hun pai zia a thei ukpi zanih leh amau’ ukna nuai-ah a om amau’ behte khempeuh ahi hi.

³³ Zebulun sung panin David huh dingin lungsim a kikhat, hun khempeuh ah gal a kap thei galdo nadingin galhiam khempeuh a nei mihing tul sawmnga ahi hi.

³⁴ Naftali sung galkap a ukte tulkhat leh amaute tawh a om lum leh tei a tawi mihing tul sawmthum leh tulsagih ahi hi.

³⁵ Dan mite sung panin gal do dingin a kitawi mihing tul sawmnih leh tulgiat leh zaguk ahi hi.

³⁶ Asher sung panin galdo dingin a baihsa-in a om hun khempeuhah gal a kap thei mihing tul sawmli ahi hi.

³⁷ Jordan gal khat a, om Reuben mite leh Gad mite leh Manasseh minam a langte sung panin galhiam khempeuh tawh a kithawi mihing tul zakhat leh tul sawmnih ahi hi.

³⁸ Galkap mi ahi; galsim ding a kithawi hih mite khempeuh, Israel tungah David kumpi-in koih ding ngaihsutna takpi tawh Hebron ah hong pai uh hi; tua mah bangin Israel a om laite khempeuh in zong David kumpi-in a bawl ding uh ngaihsutna kikhat uh hi.

³⁹ A sanggamte un amaute’ adingin na vaihawm khol uh ahih manin amaute tua lai-ah David tawh nithum sung an ne tui dawnin omkhawm uh hi.

⁴⁰ Israel sungah lungdamna om ahih manin a vengte uh Issakhar leh Zebulun leh Naftali ciang dong panin zong hong pai-in late leh kalaote leh la-sakolte leh bawngtalte tawh an hong pua-in, an tampi tak, thei mohte, leenggahkeu bawkte, leh leenggahzu leh sathau, bawngtalte leh tuute hong puak uh hi.