1 JOHAN MASA 5 - Tedim Bible

Upna In Leitung Zawhna Hi

¹ Zeisu in Khazih ahi ci-a a um mi in Pasian’ pian’sak mi ahi hi. Pa a it mi in Pa’ pian’sak mi zong a it ding hi.

² Eite in Pasian itin a thupiaknate bangin i gamtat lai takin Pasian’ tate i it hi ci-in i thei hi.

³ Bang hang hiam na cih uh leh, Pasian’ itna in ama thupiaknate zuihna ahi hi. Pasian’ thupiaknate zong a haksa lua ahi kei hi.

⁴ Bang hang hiam na cih uh leh, Pasian’ pian’sak peuhpeuh in leitung a zo thei hi. Eite upna in leitung zawhna ahi hi.

⁵ Zeisu in Pasian’ Tapa ahi ci-in a um mi sim loh, leitung a zo kua mi ahi hiam?

Tapa’ Thu-ah Teci

⁶ Tui leh sisan tawh hong pai Topa in Zeisu Khazih ahi hi. Tui bek tawh hi loin, tui tawh ahi zongin, sisan tawh ahi zongin a hong pai hi.

⁷ Kha Siangtho in teci hong pang hi. Bang hang hiam na cih uh leh, Kha Siangtho in thuman thutak ahi hi.

⁸ Bang hang hiam na cih uh leh, teci a pang thum ahi Kha Siangtho, tui leh sisan-te om a, tua thumte in pumkhat bek ahi uh hi.

⁹ Mite teci pan’na eite in i man’ leh, Pasian’ teci pan’na a lianzaw hi. Bang hang hiam na cih uh leh, Paisan’ teci pan’na in a Tapa ading teci a pan’ zawhna thu ahi hi.

¹⁰ Pasian’ Tapa a um mi in ama sungah teci pan’na a ngah hi. Pasian a um lo mi in Pasian pen zuau gen mi hi cih a suaksak hi. Bang hang hiam na cih uh leh, Pasian in ama Tapa ading a teci pan’na thu, tua mi in a um kei hi.

¹¹ Tua teci pan’na in, Pasian in eite nuntak tawntungna hong pia a, tua nuntakna in Tapa sungah a om hi.

¹² Tapa a nei mi in nuntakna a nei hi, Pasian’ Tapa a nei lo mi in nuntakna a nei kei hi.

Nuntak Tawntungna Theihna

¹³ Pasian’ Tapa’ min a um note in nuntak tawntungna na ngahna thu uh na theih nadingun, hih thute kong gelh zo hi.

¹⁴ Ama mai-ah eite in i ngah lau loh nading thu in, ama deihna bangin na khempeuh thuumin i nget leh, a hong ngaih nading thu ahi hi.

¹⁵ Thu i ngetna khempeuh a hong ngai hi ci-a i theih leh, ama kiangah i nget khempeuh i ngah ding i thei hi.

¹⁶ Mi khatpeuh in a sanggampa in sihna thuak ding a kilawm lo mawhna a bawl a muh leh, thungen ta hen. Sihna a thuak ding a kilawm lo mawhna a bawl mite ading Pasian in nuntakna a pia ding hi. Sihna thuak ding a kilawm mawhna a om hi. Tua bang mawhna maisak nading thungen ding ka ci kei hi.

¹⁷ A dik lo na khempeuh in mawhna ahi hi. Ahih hangin sihna thuak dinga kilawm lo mawhna a om hi.

¹⁸ Pasian’ pian’sak mi khempeuh in mawhna ahih zom kei hi ci-in i thei hi. Pasian’ pian’sak mi in ama pumpi kem a, a gilo mi in tua mi a sukha thei kei hi.

¹⁹ Eite in Pasian’ tate i hi hi cih thu i thei hi, leitung khempeuh in a gilo mi’ khut sungah a om thu zong i thei hi.

²⁰ Tua banah Pasian’ Tapa hong pai a, thuman thutak Topa i theih nadingin pilna eite a hong piak thu zong i thei hi. Tua tham loin, a Tapa Zeisu Khazih ahi tua thuman Topa sungah i om hi ci-in i thei hi. Hih Topa in Pasian taktak ahi hi; nuntak tawntungna zong ahi hi.

²¹ Ka ta neute aw, milimte na tang un.