1 JOHAN MASA 3 - Tedim Bible

Pasian’ Tate

¹ Eite in Pasian’ tate cihna i ngah nadingin Pa in eite tungah bang zah itna hong pia hiam ci-in ngaihsun un. Eite in tate taktak i hi hi. Tua hangin leitungmite in amah a theih loh manunah eite zong hong thei kei uh hi.

² Ka itte aw, tu-in Pasian’ tate i hi hi. A nung ciangin bang ci mi i hi ding a kilang nai kei hi. Ahih hangin amah hong kilat ciangin eite in amah tawh i kibang ding hi ci-in i thei hi. Bang hang hiam na cih uh leh, ama pum a om bangin amah i mu ding hi.

³ Hih bang a lamen mi khempeuh in Topa a sian’tho bangin amau pumpi uh zong a kisiangthosak uh hi.

⁴ Mawhna ahih mi khempeuh in thukham a kan uh hi. Khialhna in thukham kanna ahi hi.

⁵ Topa in mawhna a pua dingin a hong kilang na thei uh hi. Ama sungah mawhna khialhna a om thei kei hi.

⁶ Ama sungah a om mi in mawhna ah a zongsang kei hi. Mawhna ahih zom mi in amah a mu ngei lo, amah a thei ngei lo ahi hi.

⁷ Ka ta neute aw, lam hong khialsak thei dingin kuamah kizolsak kei un. A diktat mi in Topa a dik mah bangin a dik hi.

⁸ Mawhna a bawl mi in Dawimangpa tawh a kipawl hi. Bang hang hiam na cih uh leh, a cil panin Dawimangpa in mawhna a bawl zo hi. Dawimangpa’ bawl nate a siasak dingin Pasian’ Tapa hong kilang zo hi.

⁹ Pasian’ pian’sak mi in ama sungah Pasian’ khaici a om man-inah mawhna a bawl zom thei kei hi. Amah in Pasian’ pian’sak mi ahih maninah a mawh nuam kei hi.

¹⁰ Tua bangin Pasian’ tate leh Dawimangpa’ tate a kikhen uh hi. Dikin gamta lo mi ahi zongin, a u a nau a it lo mi ahi zongin Pasian tawh a kipawl lo mi ahi hi.

Khat leh Khat Ki-it Un

¹¹ Note in a cil panin na zak uh thu in, Dawimangpa tawh a kipawl a nau a that Kain bang hi loin eite khat leh khat ki-it ding ci-in hong kigen hi.

¹² Kain in bang hangin a nau a that hiam na cih uh leh, ama gamtatnate hoih lo a, a naupa’ gamtatnate a dik hi.

¹³ Ute naute aw, leitungmite in note hong muhdah uh leh, lamdangsa kei un.

¹⁴ Eite in ute naute khat leh khat ki-it i hih man-inah sihna panin nuntakna ah i galkah zo hi cih i thei hi. A it lo mi in sihna sungah a om lai hi.

¹⁵ A u a nau a mudah mi in mi that mi ahi hi. Mi that mi khat peuhmah sungah nuntak tawntungna a om kei hi ci-in na thei uh hi.

¹⁶ Khazih in eite tangding a nuntakna a paih maninah eite in itna i thei hi. Eite in zong ute naute tangding i nuntakna paih ding a kilawm hi.

¹⁷ Mi khat in leitung sumte nei-in a u a nau a zawngte a muh hangin hehpihna lungsim a neih kei leh, tua mi sungah Pasian itna bang ci om ahi hiam?

¹⁸ Ka ta neute aw, eite in kampau bek tawh ahi zongin, leii bek tawh ahi zongin ki-it loin, sepna bawlna tawh a mantak ki-it ni.

Pasian’ Mai-ah Lungmuan’na

¹⁹ Tua bangin i hih leh, thuman tawh kipawlin i om kithei-in, eima lungsim kimawhsakna bangmah om loin, a mai-ah lungnopna thu i ngah ding hi.

²⁰ Bang hang hiam na cih uh leh, i lungsim in hong mawhsak leh, i lungsim sangin Pasian lian zaw a, amah in na khempeuh a thei hi.

²¹ Ka itte aw, eite lungsim in eite hong mawhsak kei leh, Pasian mai-ah launa a om kei ding hi.

²² A piak thupiaknate zui-in, amah a lungdamsak ding nate i bawl maninah i ngetna peuhmah ama kiang pan i ngah hi.

²³ Ama thupiakna in a Tapa Zeisu Khazih’ min eite in umin, ama hong piaksa thu bangin khat leh khat ki-it nading ahi hi.

²⁴ Ama thupiakna a zui mi in ama sungah kipin om a, amah in zong tua mi sungah a om hi. Tua tham loin, amah in eite sungah a om thu a hong piak Kha Siangtho hangin eite in i thei hi.