Zacarias 9 - Ti Biblia (1973)

Ti padto a maibusor cadagiti nasnacion a caparanget ti Israel. Ti napacumbaba nga ari ti Sion ken ti nalawa a pagturayanna. Ni Jehova bendicionannanto ti Juda.

¹ Ti awit a sao ni Jehova iti daga ni Hadrac, ket ti Damasco ti disso a paginanaannanto (ta ti mata ti lalaki ken dagiti amin a caputotan ti Israel agturong ken Jehova);

² Ket ti Hamath, casta met, a maibeddeng kencuana, ti Tiro ken ti Sidon, ta nasiribda unay.

³ Ket ti Tiro binangonna kencuana met laeng ti sarikedked, ket nagurnong iti pirac a cas la iti tapuc, ken iti nasudi a balitoc a cas la iti pitac dagiti calsada.

⁴ Adtoy, ti Apo iccatennanto kencuana ti panagtagicuana, ket dadaelennanto ti pigsana iti taaw; ket isu maikisapto iti apuy.

⁵ Ti Ascalon makitananto, ken agbutengto ti Gaza casta met, ket mapaldaangto unay; ken ti Ecron, ta ti panagtalgedna maibabainto; ket ti ari mapucawto manipud iti Gaza, ket ti Ascalon saanto a manaedan.

⁶ Ket maysa a sapsing agnaedto idiay Asdod, ket dadaelecto ti kinatangsit dagiti Filisteos.

⁷ Ket iccatecto ti darana iti ngiwatna, ken ti kinarimonna iti baet dagiti ngipenna; ket isu met laeng ti matdanto nga agpaay iti Diostayo; ket isunto ti cas maysa a pangulo idiay Juda, ken Ecron a cas la Jebuseo.

⁸ Ket siac agpacarsaoacto iti aglicmut iti balayco a maibusor iti buyot, tapno awan ti lumasat wenno agsubli; ket ti mamarigat saanton a lumasat iti nagtengngaanda; ta ita nakitacon cadagiti matac met laeng.

⁹ Agragsacca la unay, O babai nga anac ti Sion; dumir-ica, O anac a babai ti Jerusalem: adtoy; ti arim umay kenca; isu nalinteg, ken addaan panangisalacan; napacumbaba, ket agsakay iti maysa nga asno, iti rabaw met laeng ti maysa nga urbon ti asna.

¹⁰ Ket siac iccatecto ti lugan iti Efraim, ken ti cabayo iti Jerusalem; ket ti ba-i a pakigubat maiccatto; ket isu saoennanto ti cappia cadagiti nasnacion; ket ti pagturayannanto manipud iti taaw agingga iti taaw, ken manipud iti Carayan agingga cadagiti pungto ti daga.

¹¹ No maipapan kenca met, ta gapu iti dara ti tulagmo linuc-atac dagiti baludmo manipud iti bito nga awan ti danumna.

¹² Agsublicayo iti sarikedked, dacayo a balud ti inanama: ita nga aldaw met laeng ipalawagco nga isublicto kenca nga mamindua.

¹³ Ta binaccugco a cas ba-i ni Juda nga agpaay caniac, nakipagbiatac iti ba-i ken Efraim; ket dagdagecto dagiti annacmo a lallaki, O Sion, a maibusor cadagiti annacmo a lallaki, O Grecia, ket aramidencanto a cas la iti campilan ti maingel a lalaki.

¹⁴ Ket ni Jehova makitanto iti ngatoenda: ket ti panana mapanto a cas iti kimat; ket ni Apo Jehova paguniennanto ti tangguyob, ket mapanto a buyogan ti alipugpog ti abagatan.

¹⁵ Ni Jehova dagiti buybuyot salacnibannanto ida; ket alun-unendanto, ken payatendanto dagiti batbato ti pallatibong; ket uminumdanto, ken agickisdanto a cas iti pannacaaramat ti arac; ket mapunnodanto a cas cadagiti malucong, a cas la cadagiti suli ti altar.

¹⁶ Ket ni Jehova a Diosda ispalennanto ida iti daydiay nga aldaw a cas la iti arban ti ilina; ta casladanto cadagiti tampoc ti balangat, a naitag-ay iti ngato iti ngatoen ti dagana.

¹⁷ Ta anian a nagdackel ti imbagna, ken anian a nagdackel ti imnasna! dagiti trigo parang-ayendanto dagiti babbaro ken ti baro nga arac cadagiti babbalasang.