Zacarias 8 - Ti Biblia (1973)

Dumteng ti talna ken irarang-ay ti Sion. Ti kinapudno ken kinalinteg maibilin. Dagiti sabali a nasnacion sapulendanto ni Jehova.

¹ Ket ti sao ni Jehova dagiti buybuyot immay caniac, a cunana,

² Castoy ti cuna ni Jehova dagiti buybuyot: Siac agimonac gapu iti Sion iti dackel nga imon, ket agimonac gapu kencuana iti dackel a pungtot.

³ Castoy ti cuna ni Jehova: Siac agsubliac iti Sion, ket agnaedacto iti nagtengngaan ti Jerusalem: ket ti Jerusalem managanto, Ti ili ti kinapudno; ken ti bantay ni Jehova dagiti buybuyot, Ti nasantoan a bantay.

⁴ Castoy ti cuna ni Jehova dagiti buybuyot: Agnaeddanto manen dagiti lallacay ken babaket cadagiti calcalsada ti Jerusalem, tunggal maysa addaan sarucod iti imana a gapu iti kinalacayna.

⁵ Ket dagiti calcalsada ti ili mapnodanto cadagiti ububbing a lallaki ken ububbing a babbai nga agayayamda cadagiti calcalsadana.

⁶ Castoy ti cuna ni Jehova dagiti buybuyot: No daytoy nacascasdaaw iti imatang ti matda itoy nga ili cadagidiay nga al-aldaw, isu nacascasdaaw met coma aya iti imatangco? cuna ni Jehova dagiti buybuyot.

⁷ Castoy ti cuna ni Jehova dagiti buybuyot: Adtoy, siac ispalecto ti ilic iti daga ti daya ken iti daga ti laud;

⁸ Ket yegconto ida, ket agnaeddanto iti nagtengngaan ti Jerusalem: Ket isudanto ti ilic, ket siacto ti Diosda, iti kinapudno ken iti kinalinteg.

⁹ Castoy ti cuna ni Jehova dagiti buybuyot: Pumigsada coma dagita im-imayo, dacayo a mangipangag cadagitoy nga aldaw cadagitoy a sao nga agtaud iti ngiwat dagidi mammadto nga addada iti daydi nga aldaw a ti pamuon ti balay ni Jehova dagiti buybuyot naisaad, ti templo met laeng, tapno mabangon coma.

¹⁰ Ta iti sacbay dagidiay nga al-aldaw awan ti tangdan iti lalaki, uray ania a tangdan nga agpaay iti animal; awan idi ti uray ania a talna iti daydiay a rimmuar wenno simrec, a maipuon iti cabusor; ta siac incabilco amin a lallaki tunggal maysa a maibusor ken caarrubana.

¹¹ Ngem ita saanacto a cas cadagiti immun-una nga aldaw, iti matda iti daytoy nga ili, cuna ni Jehova dagiti buybuyot.

¹² Ta addanto bin-i ti talna; ti uvas itednanto ti bungana, ket ti daga itednanto ti apitna, ket dagiti langlangit iteddanto ti linnaawda; ket pagtawidecto ti matda iti daytoy nga ili cadagitoy amin a banbanag.

¹³ Ket maaramidto nga idinto a dacayo idi ti cas maysa a lunod iti tengnga dagiti nasnacion, O balay ti Juda ken balay ti Israel, casta ti panangisalacanconto cadacayo, ket dacayonto ti maysa a bendicion. Dicayo agbuteng, no di ket papigsaenyo coma dagita im-imayo.

¹⁴ Ta castoy ti cuna ni Jehova dagiti buybuyot: Cas idi pinanggepco ti mangaramid iti dakes cadacayo, idi a dagiti ammayo ginargaridac nga agpungtot, cuna ni Jehova dagiti buybuyot, ket diac imbabawi.

¹⁵ Casta manen pinanggepco cadagitoy nga aldaw ti mangaramid iti imbag iti Jerusalem ken iti balay ti Juda: dicayo agbuteng.

¹⁶ Dagitoy dagiti banbanag nga aramidenyonto: Tumunggal maysa cadacayo agsaonto iti pudno ken caarrubana; Mangocomcayo a sipupudno ken sitatalna cadagiti ruanganyo;

¹⁷ Ket awan coma cadacayo ti mangisicat iti dakes cadagiti pusoyo a maibusor ken caarrubana; ket dicayo ayaten ti naulbod a sapata: ta amin dagitoy dagiti banbanag a guraec, cuna ni Jehova.

¹⁸ Ket ti sao ni Jehova dagiti buybuyot immay caniac, a kinunana,

¹⁹ Castoy ti cuna ni Jehova dagiti buybuyot: Ti panagayunar iti maicapat a bulan, ken ti panagayunar iti maicalima, ken ti panagayunar iti maicapito, ken ti panagayunar iti maicapullo, agbalindanto a ragragsac ken ragrag-o naragsac a fiesta iti balay ti Juda: gapuna ayatenyo ti pudno ken talna.

²⁰ Castoy ti cuna ni Jehova dagiti buybuyot: No umayto manen dagiti tattao, ken dagiti agnaed cadagiti adu nga il-ili;

²¹ Ket ti agnaed iti maysa nga ili mapanto iti sabali, a cunana, Intayo a sipapardas a dumawat iti parabur ni Jehova, ken agsapul ken Jehova dagiti buybuyot: siac innacto met.

²² Wen, adu nga il-ili ken napipigsa a nasnacion umaydanto a mangsapul ken Jehova dagiti buybuyot iti Jerusalem, ken dumawat iti parabur ni Jehova.

²³ Castoy ti cuna ni Jehova dagiti buybuyot: Cadagidiay nga aldaw mapasamacto, a sangapulo a lallaki a naggapuda cadagiti amin a pagsasao dagiti nasnacion, cumpetdanto, wen cumpetdanto iti pingir ti cawes daydiay Judio, a cunada, Dacami cumuyogcaminto kenca, ta nangegmi a ti Dios adda kenca.