Zacarias 7 - Ti Biblia (1973)

Matubngar ti panagayunar a barengbareng. Ti di panagtulnog isu ti gapu ti pannacacayaw.

¹ Ket naaramid idi maicapat a tawen ni ari Dario, a ti sao ni Jehova immay ken Zacarias iti maicapat nga aldaw ti maicasiam a bulan, ti met laeng Kisleu.

² Idin dagiti taga Bet-el imbaonda da Saraser ken Regem-melech, ken dagiti lallakida, tapno makicaasida iti parabur ni Jehova,

³ Ken tapno isaoda iti padi ti balay ni Jehova dagiti buybuyot, ken cadagiti mammadto, a cunada, Annongec aya ti agsangit iti maicalima a bulan, nga aglasinac, a cas inaramidco cadagitoy adu a tawen?

⁴ Idin ti sao ni Jehova dagiti buybuyot immay caniac, a kinunana,

⁵ Agsaoca cadagiti amin a tattao ti daga, ken cadagiti papadi, a cunaem, Idi a nagayunarcayo ken nagunnoycayo iti maicalima ken maicapito a bulan, bayat ti pitopulo met laeng a tawen, dacayo inaramidyo aya ti aniaman a panagayunar caniac, caniac met laeng?

⁶ Ket no mangancayo ken ni uminumcayo, saancayo aya a mangan nga agpaay cadacayo met laeng, ken uminum nga agpaay cadacayo met laeng?

⁷ Dicayo denggen coma aya dagiti sasao a ni Jehova impuccawna babaen dagidi immun-una a mammadto, idi a ti Jerusalem adda a nanaedan ken iti kinarang-ay, ken dagiti il-ili iti aglawlaw kencuana, ken ti Abagatan ken ti daga a nasagneb isuda idi dagiti nanaedan?

⁸ Ket ti sao ni Jehova immay ken Zacarias a kinunana,

⁹ Castoy ti sinao ni Jehova dagiti buybuyot, a kinunana, Mangocomcayo a sipupudno, ket iparangyo ti kinaimbag ken caasi tumunggal lalaki iti cabsatna;

¹⁰ Ket dicayo parigaten ti balo a babai, uray dagiti ulila, ti gangannaet, uray ti napanglaw; ket awan coma cadacayo ti mangisicat iti pusona iti dakes a maibusor ken cabsatna.

¹¹ Ngem isuda dida kinayat nga impangag, ket imbawingda ti abagada, ken sinullatanda dagiti lapayagda, tapno dida coma dumngeg.

¹² Wen, inaramidda ti pusoda a cas la bato a pamulinawen, tapno saanda a mangeg ti linteg, ken dagiti sasao a ni Jehova dagiti buybuyot imbaonna babaen ti Espirituna a naaramat dagidi immununa a mammadto: gapuna immay ti dackel a pungtot a naggapu ken Jehova dagiti buybuyot.

¹³ Ket napasamac nga isu nagpuccaw, ket dida kinayat nga impangag, iti casta agpuccawdanto, ket diacto ipangag, cuna ni Jehova dagiti buybuyot;

¹⁴ Ngem iwaracto ida babaen ti alawig iti tengnga dagiti amin a nasnacion nga isuda dida naammoan. Iti casta ti daga langalang idi iti licudanda, ngarud awan ti tao a limmasat wenno nagsubli: agsipud ta ti nacaay-ayo a daga pinagbalinda a langalang.