Zacarias 6 - Ti Biblia (1973)

Sirmata a luglugan ken cabcabayo. Ni Josue cayariganna ti Ari a padi.

¹ Ket intangadco manen dagiti matac, ket nakitac, ket, adtoy, rimmuar dagiti uppat a lugan a naggapuda iti baet dagiti dua a bantay; ket daydiay a bantay gambangda.

² Iti daydi umuna a lugan addada idi dagiti nalabaga a cabayo; ket iti maicadua a lugan dagiti nangisit a cabayo;

³ Ket iti maicatlo a lugan dagiti puraw a cabayo; ket iti maicapat a lugan dagiti napigsa a cabayo a moro.

⁴ Idin simmungbatac ket kinunac iti angel a nakisarita caniac, Aniada dagitoy, apoc?

⁵ Ket ti angel simmungbat ket kinunana caniac, Dagitoy isuda dagiti uppat nga angin ti langit, a mapanda iti amin a daga manipud iti panagtacderda iti saclang ti Apo.

⁶ Ti lugan a yan dagiti nangisit a cabayo mapanda iti daga ti amianan; ket dagiti puraw napanda iti malicudanda; ket dagiti moro napanda iti daga ti abagatan.

⁷ Ket dagiti napigsa napanda, ket inagawaanda ti mapan tapno masursurda ti daga: ket isu kinunana, Incayo, sursurenyo ti daga. Iti casta sinursurda ti daga.

⁸ Idin isu pinuccawannac, ket sinaona caniac, a kinunana, Adtoy, dagidiay a mapan iti daga ti amianan pinagtalnada ti espirituc iti daga ti amianan.

⁹ Ket ti sao ni Jehova immay caniac a kinunana,

¹⁰ Mangalaca cadagiti naggapu iti pannacacayaw, uray ken Holdai, ken ni Tobias, ken ni Jedaia; ket umayca iti daydiay met laeng nga aldaw, ket inca iti balay ni Josias nga anac ni Sefonias, a papanan dagidiay aggapu sadi Babilonia;

¹¹ Wen, mangalaca cadacuada iti pirac ken balitoc, ket mangaramidca cadagiti balangat, ket isaadmo ida iti olo ni Josue nga anac ni Josadac, a cangatoan a padi;

¹² Ket agsaoca kencuana, a cunam, Castoy ti sinao ni Jehova dagiti buybuyot, a cunana, Adtoy, ti tao, a ti naganna Saringit: ket isu dumackelto manipud iti dissona; ket isu bangonennanto ti templo ni Jehova;

¹³ Isu met laeng bangonennanto ti templo ni Jehova; ken awitennanto ti dayag ken agturayto ket tumugawto iti tronona; ket isunto ti maysa a padi iti tronona; ket ti patigmaan ti cappia addanto iti baetda a dua.

¹⁴ Ket dagiti balangat addadanto ken ni Helen, ken ni Tobias, ken ni Jedaia, ken ni Hen nga anac a lalaki ni Sefonias, agpaay a pacalaglagipan iti templo ni Jehova.

¹⁵ Ket dagiti adda iti adayu umaydanto ken bangonendanto ti templo ni Jehova; ket dacayo mabigbigyonto a ni Jehova dagiti buybuyot imbaonnac cadacayo. Ket daytoy maaramidto, no sipapasnec ti panagtulnogyo iti timec ni Jehova a Diosyo.