Zacarias 5 - Ti Biblia (1973)

Ti sirmata a sangcalucot a pagbasaan nga agtaytayab ken ti babai ken ti efa.

¹ Idin intangadco manen dagiti matac, ket nakitac, ket, adtoy, ti sangcalucot a pagbasaan nga agtaytayab.

² Ket isu kinunana caniac, Ania ti makitam? Ket simmungbatac, Makitac ti sangcalucot a pagbasaan nga agtaytayab; ti caatiddugna duapulo a sico, ket ti caacabana sangapulo a sico.

³ Idin isu kinunana caniac, Daytoy ti lunod nga agsacnap iti rabaw ti amin a daga; ta tumunggal maysa nga agtacaw madadaelto cas mayannurot iti maysa a bangir ti lucot; ket tumunggal maysa nga agsapata madadaelto cas mayannurot iti sabali a bangir ti lucot.

⁴ Siac baonecto, cuna ni Jehova dagiti buybuyot, ket isu sumrecto iti balay ti mannanacaw, ken iti balay daydiay nga agsapata a siuulbod a gapu iti naganco; ket agtaengto iti nagtengngaan ti balayna, ket ibusennanto agraman cayona ken dagiti batbatona.

⁵ Idin ti angel a nakisarita caniac rimmuar, ket kinunana caniac, Itangadmo ita dagita matam, ket kitaem no ania daytoy a rimmuar.

⁶ Ket siac kinunac, Ania daytoy? Ket kinunana, Daytoy ti efa a rimmuar. Ket kinunana pay, Daytoy ti langada iti amin a daga.

⁷ (Ket, adtoy, naingato ti maysa a talento a buli); ket daytoy ti maysa a babai a situtugaw iti nagtengngaan ti efa.

⁸ Ket isu kinunana, Daytoy ti Kinadakes: ket isu impalladawna iti nagtengngaan ti efa; ket imbatona ti panimbeng a buli iti ngarabna.

⁹ Idin intangadco dagiti matac, ket nakitac, ket, adtoy, dua a babbai rimmuarda, ket ti angin adda idi cadagiti payacda: ket addaanda paypayac a cas la cadagiti payac ti cannaway; ket isuda inngatoda ti efa iti nagtangatangan ti langit ken daga.

¹⁰ Idin kinunac iti angel a nakisarita caniac, Sadino ti pangipanan dagitoy iti efa?

¹¹ Ket isu kinunana caniac, Idiay daga ti Sinar, tapno ibangonanda ti maysa a balay: ket intono maisagana, maisimpanto iti dissona met laeng.