Zacarias 4 - Ti Biblia (1973)

Ti sirmata a candelero ken cayo nga olivo.

¹ Ket ti angel a nakisarita caniac immay manen, ket riiniingnac, a cas iti tao a riingen iti turogna.

² Ket isu kinunana caniac, Ania ti makitam? Ket kinunac, Nakitac, ket adtoy, ti maysa a candelero a biig a balitoc, agraman liccocongna iti rabawna, ken pito a pagsilawan kencuana; adda pito a tubo iti tumunggal pagsilawan, nga adda iti rabawna,

³ Ken dua a cayo ti olivo iti dennana, maysa iti akincanawan a sikigan ti liccocong, ket ti sabali iti akincatigid a sikiganna.

⁴ Ket siac simmungbatac ket nagsaoac iti angel a nakisarita caniac, a kinunac, Aniada dagitoy, apoc?

⁵ Idin ti angel a nakisarita caniac simmungbat ket kinunana caniac, Saanmo nga ammo aya no aniada dagitoy? Ket kinunac, Saan, apoc.

⁶ Idi casta isu simmungbat ket nagsao caniac, a kinunana, Daytoy ti sao ni Jehova ken Zorobabel, a cunana, Saan a maipuon iti kinamaingel, wenno iti pannacabalin, no di ket babaen ti Espirituc, cuna ni Jehova dagiti buybuyot.

⁷ Siasinoca, O dackel a bantay? iti sango ni Zorobabel agbalincanto a tanap; ket isu yegnanto ti akinngato a bato a buyogen dagiti ariwawa ti Parabur, parabur, kencuana.

⁸ Immay manen caniac ti sao ni Jehova, a kinunana,

⁹ Dagiti im-ima ni Zorobabel insaadda ti pamuon daytoy a balay; dagiti im-imana met laeng ti mangleppasto kencuana; ket sica mabigbigmonto a ni Jehova dagiti buybuyot imbaonnac cadacayo.

¹⁰ Ta siasino ti nanglais iti aldaw dagiti babassit a banbanag? ta dagitoy pito agragsacdanto, ken makitadanto ti tinnag iti ima ni Zorobabel; dagitoy a pito isuda dagiti mata ni Jehova, nga agtaray nga agsursur iti nagtengngaan ti amin a daga.

¹¹ Idin simmungbatac, ket kinunac kencuana, Aniada dagitoy dua a cayo ti olivo iti canawan a sikigan ti candelero ken iti catigid a sikiganna.

¹² Ket simmungbatac iti maicadua a daras, ket kinunac kencuana, Aniada dagitoy dua a sanga ti cayo ti olivo, nga addada iti denna dagiti dua a tubo a balitoc, nga ibuyatda ti nabalitocan a lana a naggapu cadacuada met laeng?

¹³ Ket isu simmungbat caniac ket kinunana, Saanmo nga ammo aya no aniada dagitoy? Ket kinunac, Saan, apoc.

¹⁴ Idin isu kinunana, Dagitoy isuda dagiti dua a napulotan, nga agtatacderda iti denna ti Apo ti amin a daga.