Zacarias 2 - Ti Biblia (1973)

Ti sirmata a maipapan iti mangrucod. Ti parabur ti Dios iti Sion.

¹ Ket siac intangadco dagiti matac, ket kimmitaac, ket, adtoy, ti maysa a lalaki agraman pagrucod a tali iti imana.

² Idin kinunac, Sadino aya ti papanam? Ket isu kinunana caniac, Innac rucuden ti Jerusalem, tapno makitac ti caacabana, ken caatiddugna.

³ Ket, adtoy, ti angel a nakisarita caniac rimmuar idi, ket sabali nga angel rimmuar a simmabet kencuana,

⁴ Ket kinunana kencuana, Agtarayca, agsaoca itoy agtutubo a lalaki, a cunaem, Ti Jerusalem mapagnaedanto a cas la cadagiti purpuroc nga awanan bacud, a gapu iti caadu dagiti lallaki ken an-animal kencuana.

⁵ Ta siac, cuna ni Jehova, siacto kencuana ti maysa a bacud nga apuy iti aglicmut, ket siacto ti dayag iti nagtengngaanna.

⁶ O, O, agtalawca manipud iti daga ti amianan, cuna ni Jehova; ta siac isacnapcayo iti ruar a cas cadagiti uppat nga angin iti langit, cuna ni Jehova.

⁷ O Sion, agtalawca, sica a makitaeng iti anac a babai ti Babilonia.

⁸ Ta castoy ti cuna ni Jehova dagiti buybuyot: Maipaay iti dayag isu imbaonnac cadagiti nasnacion a nagsamsam kenca; ta daydiay a mangsagid kenca sagidenna ti bukel ti matana.

⁹ Ta, adtoy, wagwagecto ti imac iti ngatoenda, ket isudanto ti samsam cadagidiay nagservi cadacuada; ket dacayo mabigbigyonto a ni Jehova dagiti buybuyot imbaonnac.

¹⁰ Agcantaca ken agragsacca, O babai nga anac ti Sion; ta adtoy, siac umayac, ket agtaengacto iti nagtengngaam, cuna ni Jehova.

¹¹ Ket adu a nasnacion tumipondanto ken Jehova iti daydiay nga aldaw, ket isudanto ti ilic; ket agnaedacto iti nagtengngaam, ket sica mabigbigmonto a ni Jehova dagiti buybuyot imbaonnac kenca.

¹² Ket ni Jehova tawidennanto ti Juda a cas apagna iti daga a nasantoan, ket piliennanto manen ti Jerusalem,

¹³ Agulimeccayo, amin a lasag, iti saclang ni Jehova; ta isu nagriingen iti nasantoan a taengna.