Zacarias 13 - Ti Biblia (1973)

Ti panagdalus ti Jerusalem. Ti pastor ni Jehova macabil.

¹ Iti daydiay nga aldaw addanto maysa nga ubbog a silulucat nga agpaay iti balay ni David ken cadagiti agnaed iti Jerusalem, maipaay iti basol ken maipaay iti kinarugit.

² Ket maaramidto iti daydiay nga aldaw, cuna ni Jehova dagiti buybuyot, a dadaelecto dagiti nagnagan dagiti didiosen iti daga, ket isuda saandanto a malaglagipen; ket papanawecto met dagiti mammadles ken ti narugit nga espiritu iti daga.

³ Ket maaramidto nga, intono ti siasinoman agpadlesto manen, cunadanto da amana ken inana a nagputot kencuana, Sica dicanto agbiag, nagsaoca iti ulbod iti nagan ni Jehova; ket ni amana ken inana a nangputot kencuana isu salputendanto intono isu agpadto.

⁴ Ket maaramidto iti daydiay nga aldaw, a dagiti mammadles mababainandanto tunggal maysa iti sirmatana, intono isu agpadto; didanto met agcawes iti cagay a dutdotan a mangallilaw:

⁵ No di ket isu cunananto, Saanac a mammadto, siac agtartrabajoac iti daga; ta naaramidac a bag-en nanipud pay idi kinabumaroc.

⁶ Ket adda agcunanto kencuana, Ania dagitoy sugsugat iti nagbaetan dagiti takiagmo? Isu sumungbatton, Dagitoy a sugat naalac ida idiay balay dagiti gagayyemco.

⁷ Agriingca, O campilan, a maibusor iti pastorco, ken maibusor iti lalaki a caduac, cuna ni Jehova dagiti buybuyot: sugatem ti pastor, ket dagiti carneroc mawarawaradanto; ket siac idissocto ti imac cadagiti babassit.

⁸ Ket maaramidto nga iti amin a daga, cuna ni Jehova, dagiti dua a capaset kencuana madadaeldanto ket matayda; ngem ti maicatlo matdanto kencuana.

⁹ Ket yegconto ti maicatlo a capaset iti apuy, ket guguracto ida a cas iti pirac a maguguran, ket guguracto ida a cas iti balitoc a maisudi. Isuda awagandanto ti naganco, ket ipangagconto ida: cunaecto, Isu ti ilic; ket isuda cunaendanto, Ni Jehova ti Diosco.