Zacarias 11 - Ti Biblia (1973)

Dagiti dakes a papastor ipalubosda ti pannacadadael ti Israel.

¹ Luctam dagita ruanganmo, O Libano, tapno ti apuy lamutenna dagita cantingenmo.

² Agdung-awca, O cayo a parwa, ta ti cantingen natuang, ta dagiti naimnas madadaelda: agdung-awcayo, O dacayo a roble ti Basan, ta ti natibker a bakir marugpo.

³ Timec ti dung-aw dagiti agpaspastor! ta ti dayagda madadael: timec ti panagungor dagiti bumaro a leon! ta ti tangsit ti Jordan narba.

⁴ Castoy ti kinuna ni Jehova a Diosco; Ipaarabmo ti pangen a maipaay iti pagpartian;

⁵ A dagiti gimmatang cadacuada papatayenda ida, ket ibilangda a dida nacabasol; ket dagidiay nangilaco cadacuada cunada, Bendito coma ni Jehova, ta nabacnangac; ket dagiti paspastorda met laeng dida caasian ida.

⁶ Ta siac diacto caasianen dagiti agnaed ti daga, cuna ni Jehova; ngem, adtoy, yawatconto dagiti lallaki tunggal maysa iti ima ti caarrubana, ken iti ima ti arina; ket isuda dadaelendanto ti daga, ket ispalen ida iti imada.

⁷ Iti casta impaarabco ti pangen a maipaay iti pagpartian, kinapudnona ti pangen nacuttong. Ket innalac dagiti dua a sarucod; iti maysa ninaganco ti kinaimbag, ket iti sabali ninaganco ti pagreppet; ket impaarabco ti pangen.

⁸ Ket dinadaelco ti tallo a pastor iti maysa a bulan; ta ti cararuac nautoyan idi cadacuada, ket ti cararuada met gimmurada caniac.

⁹ Idin kinunac, saancayto nga ipaarab: daydiay matay, matay laeng; ket daydiay madadael, madadael laeng; ket dagidiay matda agkikinaanda coma iti lasagda met laeng.

¹⁰ Ket innalac ti sarucodco a Kinaimbag, ket pinutedco a naggudua, tapno burakec ti tulagco nga inaramidco cadagiti amin nga il-ili.

¹¹ Ket isu naburac iti daydi nga aldaw; ket iti castoy ti nacuttong iti pangen a nagimdeng caniac nabigbigna a daydi sao ni Jehova.

¹² Ket kinunac cadacuada, No dacayo panunutenyo a naimbag, itdenyo caniac ti tangdanco; ket no saan baybay-anyo. Iti casta kinatida ti tangdanco iti tallopulo a capisi a pirac.

¹³ Ket ni Jehova kinunana caniac, Isu ipalladawmo iti agdamdamili, ti nasayaat a pateg a nacapatgac cadacuada. Ket innalac daydi tallopulo a capisi a pirac, ket impalladawco ida iti agdamdamili, idiay balay ni Jehova.

¹⁴ Idin pinutedco a naggudua ti sabali a sarucodco, a ti met laeng Pagreppet, tapno burakec ti panagcabsat da Juda ken Israel.

¹⁵ Ket ni Jehova kinunana caniac, Alaem manen dagiti ar-aruaten ti nacuneng a pastor.

¹⁶ Ta, adtoy, bangonecto ti maysa a pastor iti daga, isu a dinto sumarungcar cadagidiay nadadael, dinto met agbiruc cadagidiay maiwara, saan met a mangagas cadagidiay nadunor, saan met a mangipaarab cadagidiay nacaradcad; no di ket sidaennanto ti lasag ti nalucmeg a carnero ken pisangennanto dagiti cucodna.

¹⁷ Asi pay iti awan cais-iscanna a pastor a mangbaybay-a iti pangen! ti campilan agdissonto iti tackiagna, ken iti canawan a matana, ti tackiagna mamagmaganto unay, ket ti canawan a matana agsipngetto amin.