Zacarias 1 - Ti Biblia (1973)

Ni Jehova tubngarenna dagiti tattao. Ti cabayo a sirmata ni Zacarias. Ti caasi a maicari iti Sion. Ti sirmata a sarsara ken mammanday.

¹ Iti maicawalo a bulan, iti maicadua a tawen ni Dario, immay ti sao ni Jehova ken Zacarias a mammadto nga anac ni Berekias, nga anac ni Iddo, a cunana,

² Ni Jehova naglucsao unay idi cadagidi ammayo.

³ Gapuna cunaem cadacuada, Castoy ti cuna ni Jehova dagiti buybuyot: Agsublicayo caniac, cuna ni Jehova dagiti buybuyot, ket siac agsubliacto cadacayo, cuna ni Jehova dagiti buybuyot.

⁴ Saancayo coma a cas cadagidi ammayo, isuda a nagickisan dagiti immun-una a mammadto, a kinunada, Castoy ti cuna ni Jehova dagiti buybuyot, Agsublicayo ita manipud cadagiti dakes a daldalanyo, ken manipud cadagita dakes nga aramidyo: ngem dida impangag, dida nagimdeng caniac, cuna ni Jehova.

⁵ Dagiti ammayo, sadino aya ti yanda? ket dagiti mammadto, agbiagda aya nga agnanayon?

⁶ Ngem dagiti saoc ken bilinco, nga imbilinco cadagiti adipenco a mammadto, saanda aya a nacagteng cadagiti ammayo? ket isuda nagsublida ket kinunada, Cas pinanggep ni Jehova dagiti buybuyot, nga aramiden cadatayo, iti mayalubog cadagiti daldalantayo, ken mayannurot cadagiti ar-aramidtayo, casta ti inaramidna cadatayo.

⁷ Iti maicaduapulo ket uppat nga aldaw ti maicapulo ket maysa a bulan, nga isu ti bulan ti Sebat, iti maicadua a tawen ni Dario, immay ti sao ni Jehova ken Zacarias a mammadto nga anac ni Berekias, nga anac ni Iddo, a kinunana,

⁸ Siac kimmitaac iti rabii, ket, adtoy, ti maysa a lalaki a nagsacay iti nalabaga a cabayo, ket nagintec iti tengnga dagiti caycayo nga arrayan nga addada idi iti lasong; ket iti malicudanna addada idi dagiti cacabayo, a nalabaga, alazan a natangken, ken puraw.

⁹ Idin kinunac, O apoc, aniada dagitoy? Ket ti angel a nakisarita caniac kinunana caniac, Ipamatmatconto kenca no aniada dagitoy.

¹⁰ Ket ti lalaki a sitatacder iti tengnga dagiti caycayo nga arrayan simmungbat ket kinunana, Dagitoy isuda dagiti imbaon ni Jehova tapno magnada nga agsursur iti nagtengngaan ti lubong.

¹¹ Ket isuda simmungbatda iti angel ni Jehova nga agtatacder iti nagtengngaan dagiti caycayo nga arrayan, ket kinunada, Dacami sinursurmi ti nagtengngaan ti lubong, ket, adtoy, a ti amin a lubong adda a sitatalna ken siinana,

¹² Idin ti angel ni Jehova simmungbat ket kinunana, O Jehova dagiti buybuyot, casano ti cabayag ti kinaawanto ti panangngaasim iti Jerusalem, ken cadagiti il-ili ti Juda, a maibusor cadagidiay nagpungtotam iti pitopulo a tawen?

¹³ Ket ni Jehova simmungbat idi iti angel a nakisarita caniac babaen cadagiti naimnas a sasao, macaliwliwada met laeng a sasao.

¹⁴ Iti casta ti angel a nakisarita caniac kinunana caniac, Agpuccawca ala, a cunam, Castoy ti cuna ni Jehova dagiti buybuyot: Siac naimonac maipuon iti Jerusalem ken iti Sion iti dackel nga imon.

¹⁵ Ket malucsaoac unay cadagiti nasnacion nga addada a sinanamay; ta siac naglucsaoac iti bassit laeng, ket pinadackelda ti ladingit.

¹⁶ Gapuna castoy ti cuna ni Jehova; Nagsubliac a mangngaasi iti Jerusalem; ti balayco mabangonto kencuana, cuna ni Jehova dagiti buybuyot, ket maysa a paltic mayunnatto iti rabaw ti Jerusalem.

¹⁷ Agpuccawca manen, a cunaem, Castoy ti cuna ni Jehova dagiti buybuyot: Dagiti il-ilic aglaplapunusandanto manen iti kinarang-ay, ket ni Jehova liwliwaennanto manen ti Zion, ken piliennanto manen ti Jerusalem.

¹⁸ Ket intangadco dagiti matac, ket kimmitaac, ket, adtoy, dagiti uppat a sara.

¹⁹ Ket kinunac iti angel a nakisarita caniac, Aniada dagitoy? Ket isu simmungbat caniac, Dagitoy isuda dagiti sara a nangiwarawara ken Juda, ken Israel, ken Jerusalem.

²⁰ Ket ni Jehova imparangna caniac dagiti uppat a mammanday.

²¹ Idin kinunac, Ania ti umay aramiden dagitoy? Ket isu nagsao, a cunana, Dagitoy isuda dagiti sara a nangiwara ken Juda, iti casta awan ti tao a nangitungangaw iti olona; ngem dagitoy umayda tapno mangigtot cadacuada ken mangipadso cadagiti sara dagiti nasnacion, a nangitungangaw iti sarada a maibusor iti daga ti Juda tapno isu warawaraenda.