Tito 3 - Ti Biblia (1973)

Ti rebbeng nga isuro ni Tito.

¹ Ipalagipmo cadacuada a paiturayanda coma cadagiti agtuturay ken dagiti mannacabalin, agtulnogda, ket sisisiglatda iti isu-amin nga aramid a naimbag,

² A dida agsao iti dakes a maipapan iti uray siasino, saanda a mannakiringgor, naimbag coma ti awidda, nga ipakitada ti amin a kinaemma cadagiti isu-amin a tattao.

³ Ta nacunengtayo met idi naminsan, nasukir, naal-lilaw, a nagtulnogtayo cadagiti nadumaduma a kinagaramugam ken ragragsac; a nagbiagtay iti kinadakes ken apal, a mannakigura a naggiginnuratayo.

⁴ Ngem idi nagparang ti parabur ti Dios a Manangisalacan cadatayo, ken ti ayatna cadagiti tattao.

⁵ Saan a gapu cadagiti ar-aramid ti kinalinteg nga inaramidtayo, no di ket cas iti mayannugot iti asina insalacannatayo, gapu iti paggugoran ti panagbalbaliw a pannacayanac ken ti panangpabaro ti Espiritu Santo,

⁶ Nga imbuyatna cadatayo a sibabacnang, gapu ken Jesu-Cristo a Mangisalacan cadatayo;

⁷ Tapno, idinto a mapalintegtayo gapu iti paraburna, maaramidtayo nga agtawid, mayalubog iti pananginanama ti biag nga agnanayon.

⁸ Mapapati daytoy a sao; ket no maipapan cadagitoy a banbanag, tarigagayac nga ipapatim, a sitatalged tapno dagiti namati iti Dios rumegtada a mangaramid cadagiti naimbag nga ar-aramid. Dagitoy a banbanag nasayaatda ken macaited ti gonggona cadagiti tattao:

⁹ Ngem adayuam dagiti supsupiat a minamaag, ken dagiti capuonan, ken dagiti panagsusungbat ken panagsususic a maipapan iti linteg; ta awan ti maitedda a pagimbagan ket bareng-barengda.

¹⁰ Ti tao a mangriribuc, inton malpas ti umuna ken ti maicadua a panamagbaga, papanawem;

¹¹ Idinto a mailasinmo a daytoy dimmakesen, ket agbasbasol, ket ocomenna ti bagina met laeng.

Sabali a bilbilin ken panagpacada.

¹² Intono ibaonco kenca ni Artemas, wenno ni Tiquico, umagawaca nga umay caniac idiay Nicopolis; ta panggepco ti agnaed sadiay iti calam-ecna.

¹³ Agawaam a palubosan da Zenas, a masirib iti linteg, ken ni Apolos, nga awan coma ti pagcuranganda iti viajeda.

¹⁴ Ket dagiti cadduatayo adalenda met ti agaramid cadagiti nasayaat nga ar-aramid, a maipaay cadagiti masapul a pacaaramatan, tapno saanda a di agbunga.

¹⁵ Cablaawandaca dagiti isu-amin nga adda a naicuyog caniac. Cablaawam dagiti agayat cadacami, iti pammati. Parabur coma cadacay amin.