Tito 2 - Ti Biblia (1973)

Pagalagadan ti panagbiag ken ti panursuro.

¹ Ngem sica, sao-em dagiti banbanag a maipaay iti nasayaat a sursuro:

² A dagiti lallacay managparbengda coma, natacneng, nanakem, nasalun-at iti pammati, iti ayat, iti kinaanus:

³ A dagiti babbaket nasingpetda iti panagbiagda, saanda a mamadpadakes, saanda a patagabu iti adu nga arac, mangisursuroda cadagiti nasayaat a banbanag;

⁴ Tapno isursuroda dagiti agtutubo a babai nga ayatenda dagiti assawada, nga ayatenda dagiti annacda,

⁵ Natacnengda, nadalusda, nga aywananda ti balay, naasida, nga agtulnogda cadagiti assawada met laeng, tapno di matabbaawan ti sao ti Dios:

⁶ Balacadam met dagiti agtutubo a lallaki tapno managparbengda:

⁷ A cadagiti isu-amin a banag agparangca coma nga ulidan babaen dagiti naimbag nga aramid; nga iti panangisursurom ipakitam ti kinatacneng ken kinadalus.

⁸ Palawag a nasayaat, a saan a mabalin a mababalaw, tapno ti cumappon iti bangir a bumusor, agbain coma, agsipud ta awan ti aniaman a dakes a mabalinna a saoen a maipapan cadacayo.

⁹ Bagbagaam met dagiti paad-adipen tapno paiturayanda cadagiti appoda met laeng, a mangay-ayoda iti isu-amin; saanda a managsungbat;

¹⁰ A dida agtacaw, no di ket ipakitada ti isu-amin a pannacatalec, tapno iti isu-amin arcosanda ti sursuro ti Dios a Manangisalacan cadatayo.

¹¹ Ta nagparang ti parabur ti Dios, a mangyeg ti pannacaisalacan cadagiti isu-amin a tattao,

¹² Nga isursuronatayo a no pagtalawantayo ti saan a kinasingpet ken dagiti tartarigagay a nailubungan, agbiagtay coma a sipaparbeng ken sililinteg ken sisisingpet, itoy lubong nga agdama;

¹³ Nga ur-urayen daydiay inanama a nagasat, ken ti panagparang a sidadayag ti dackel a Dios ken Manangisalacan cadatayo a ni Jesu-Cristo;

¹⁴ Isu nga inyawatna ti bagina gapu cadatayo, tapno subbotennatay iti amin a kinadakes ken manggugur a maipaay kencuana met laeng ti maysa nga ili a cucuana, a naregta cadagiti naimbag nga ar-aramid.

¹⁵ Dagitoy a banbanag sao-em, ket ibalacadmo ket mangtubngarca a buyugen ti amin a turay. Awan coma ti pacaumsiam.