Taga-Roma 9 - Ti Biblia (1973)

Dagiti annac ti cari.

¹ Saoec ti pudno gapu ken Cristo, diac agulbod, ti concienciac makipagpanecnec caniac babaen ti Espiritu Santo,

² Nga adda dackel a ladingit ken rigat a di agressat itoy pusoc.

³ Ta no mabalin tarigagayac a siac met laeng mailunodac coma a maisina ken Cristo, gapu cadagiti cacabsatco, dagiti cacabagiac no maipapan iti lasag:

⁴ Isuda dagiti Israelitas, nga agtagicua ti pannacaibilang nga annac ken ti gloria, ken dagiti tultulag, ken ti pannakaituyang ti linteg, ken ti panagservi iti Dios, ken dagiti carcari;

⁵ Isuda a makin-ama cadagiti amma ket isuda ti nagtaudan ni Cristo no maipapan iti lasag; isu a nangnangrona ngem cadagiti isu-amin, bendito ti Dios nga agnanayon. Amen.

Ti pammati isu ti pacaisalacanan, ket saan laeng a ti panagaramid ti linteg.

⁶ Ngem saan a cas la awan banagna ti sao ti Dios; ta saan nga amin a nagtaud iti Israel, Israelitasda:

⁷ Ket saan met a gapu ta caputotan ida ni Abraham, annacna ida amin; ngem, ken Isaac managanto ti caputotam.

⁸ Cayatna a sao-en, a saan a dagiti annac ti lasag isuda dagiti annac ti Dios; no di ket dagiti annac ti cari ti maibilang a caputotan.

⁹ Ta daytoy ti sao ti cari: Itoy a panawen umayacto, ket maaddaanto ni Sara ti maysa nga anacna a lalaki.

¹⁰ Ket saan laeng a casta, no di ket ni Rebeca nagsicug met gapu ken Isaac nga amatayo.

¹¹ Ket idi dagiti singin saanda pay a nayanac, ket awan pay ti inaramidda a naimbag wenno dakes, tapno ti panggep ti Dios a mayannurot iti pannacapili mataginayon coma, saan a gapu cadagiti ar-aramid, no di ket gapu iti umayab,

¹² Naibaga kencuana a Ti inauna agservinto iti inaudi.

¹³ Cas iti adda a naisurat: Inayatco ni Jacob, ngem ginurac ni Esau.

¹⁴ Ania ngarud ti sao-entayo? Adda aya kinakil-lo iti biang ti Dios? Ni caanoman.

¹⁵ Ta cunana ken Moises: Addanto asic iti caasiac, ket caasiacto a siaayat ti caasiac.

¹⁶ Iti casta ngarud saan nga aggapu iti mayat ket saan met nga iti agtaray, no di ket aggapu iti Dios nga adda asina.

¹⁷ Ta cuna ti Surat ken Faraon: Gapu met laeng itoy, intan-occa tapno ipakitac kenca iti pannacabalinco ken tapno maiwarragawag ti Naganco iti amin a daga.

¹⁸ Iti casta ngarud mangngaasi iti cayatna ket mangpatangken iti cayatna.

¹⁹ Cunaemto ngarud caniac: Apayapay mangpabasol pay? ta siasino ti macasupring iti pagayatanna?

²⁰ Ngem, O tao! siasinoca a sumungbat ti maibusor iti Dios? Ti inaramid cunaennanto aya iti nangaramid kencuana: Apayapay inaramidnac a castoy?

²¹ Wenno ti agdamdamili, awan aya ti pannacabalinna a mangaramid iti maymaysa a pitac ti maysa a damili tapno pacaidayawan, ken ti sabali, tapno pacaibainan?

²² Ket no ti Dios, idinto a cayatna nga ipakita ti pungtotna ken ipacaammo ti pannacabalinna, ituredna iti adu ken atiddug nga anus dagiti vasijas ti pungtot a maipaay a pacapucawan:

²³ Tapno ipacaammona met dagiti kinabacnang ti gloriana cadagiti vasijas ti asi, nga insaganana idi a maipaay iti gloria.

²⁴ Cadatayo, nga inayabanna met, saan laeng a cadagiti Judios, no di ket cadagiti pay Gentiles?

²⁵ Cas cunana pay iti Oseas: Naganecto ti ilic ti saanco nga ili idi, Ken ay-ayaten, ti saan a naay-ayat idi.

²⁶ Ket mapasamacto nga iti disso a nacaisao-an daytoy: Saan a dacayo ti ilic; Idiay met laeng managandanto annac ti Dios a sibibiag.

²⁷ Ket ni Isaias umawag a maipapan ken Israel: No ti bilang dagiti annac ni Israel casla coma cadagiti darat ti baybay, ti laeng matda isunto ti maisalacan:

²⁸ Ta ti Apo tungpalennanto a siinget ti saona ditoy daga, ken leppasennanto iti apagbiit.

²⁹ Cas kinuna ni Isaias idi: No ti Apo dagiti buybuyot dinatayo coma intiddaan ti putot, Nagbalintayo coma a cas iti Sodoma, ket pimmadistayo coma iti Gomorra.

³⁰ Ania ngarud ti saoentayo? A dagiti Gentiles, a saan a simmurot iti kinalinteg, nacagun-odda ti kinalinteg, nga isu ti kinalinteg a gapu iti pammati:

³¹ Ngem ni Israel, a sumursurot iti linteg a pagtaudan ti kinalinteg, saan a nacagteng iti dayta a linteg.

³² Ania ti gapuna? Agsipud ta ginun-odda saan a gapu iti pammati, no di ket cas gapu cadagiti ar-aramid. Gapuna naitibcolda iti bato a pacaitibcolan.

³³ Cas adda a naisurat: Adtoy, isaadco idiay Sion ti maysa a bato a pacaitibcolan ken bato a pacarurodan; Ket ti mamati kencuana, saanto a maibabain.