Taga-Roma 8 - Ti Biblia (1973)

Awan ti pannacadusa dagiti adda ken Cristo.

¹ Awan ngarud ita ti aniaman a pannacadusa a maipaay cadagiti adda ken Cristo Jesus,

² Ta ti linteg ti Espiritu ti biag ken Cristo Jesus, linuc-atannac iti linteg ti basol ken ti patay.

³ Ta ti saan a mabalinan ti linteg, idinto a napacapuy gapu iti lasag, inaramid ti Dios, nga imbaonna ti Anacna a caasping ti lasag a managbasol ket gapu iti basol, impatayna ti dusa ti basol iti lasag:

⁴ Tapno ti kinalinteg ti linteg matungpal coma cadatayo a saan nga agbiag a linalasag, no di ket naespirituan.

⁵ Ta dagiti umannurot iti lasag, panunutenda dagiti linalasag; ngem dagiti umannurot iti espiritu, panunutenda dagiti banbanag a naespirituan.

⁶ Ta ti nakem a linalasag isu ti patay; ngem ti nakem a naespirituan isu ti biag ken talna:

⁷ Agsipud ta ti nakem a linalasag maibusor iti Dios; ta saan a paiturayan iti linteg ti Dios, ket dina met cabaelan a pulos:

⁸ Ket dagiti agbiag a linalasag saanda a mabalin nga ay-ayaten ti Dios.

⁹ Ngem saancayo a linalasag, no di ket naespirituan, no bilang ta ti Espiritu ti Dios agnaed cadacayo; ngem ti saan a mangcupicup iti Espiritu ni Cristo, saanna a cucua.

¹⁰ Ket no ni Cristo adda cadacayo, ti bagi pudno a natay gapu iti basol, ngem ti espiritu agbiag gapu iti kinalinteg.

¹¹ Ngem no ti Espiritu daydi namagungar ken Jesus cadagiti natay, agnaed cadacayo, daydi namagungar ken Cristo cadagiti natay biagennanto met dagiti bagbagiyo a matay, babaen ti Espirituna nga agnaed cadacayo.

¹² Iti casta ngarud, cacabsat, datayo ti makautang, saan nga iti lasag, tapno agbiagtayo a mayannugot iti lasag:

¹³ Ta no agbiagcayo a mayannugot iti lasag, mataycayto; ngem no, gapu iti Espiritu, patayenyo dagiti ar-aramid ti lasag, agbiagcayto.

¹⁴ Ta dagup amin nga idalan ti Espiritu ti Dios, isuda dagiti annac ti Dios,

¹⁵ Ta saanyo nga inawat ti pakinakem ti pannacaadipen manen tapno agbutengcayo; ngem inawatyo ti pakinakem ti pannacaibilang nga annac, gapuna umawagtayo: Abba, Ama.

¹⁶ Ti Espiritu met laeng panecnecanna cadagiti espiritutayo, a datayo annacnatayo iti Dios:

¹⁷ Ket no annac, agtawid met, agtawid iti Dios, ken makipagtawid ken Cristo, no casta makipagsagabatayo kencuana, tapno makipaggloriatayo met kencuana.

Dagiti tulong ti Espiritu.

¹⁸ Ta pagarupec a dagiti sagsagabaen itoy agdama nga aldaw saanda a maicari nga ipadis iti dayag a maipanayagto cadatayo.

¹⁹ Ta ti nasged a tarigagay ti sangaparsuaan ur-urayenna ti pannacaiparangarang dagiti annac ti Dios.

²⁰ Ta ti sangaparsuaan pinaiturayan iti kinapasindayag, saan a ti nakemna, no di gapu iti daydi nangituray kencuana, a si-inanama.

²¹ A ti met laeng sangaparsuaan maluc-atanto iti pannacaadipen ti panagrupsa, a maipaay iti nadayag a wayawaya dagiti annac ti Dios.

²² Ta ammotayo a ti sangcaparsuaan agsasaibbecda ken agrigrigatda iti panagpasngay a sangsangcamaysa agingga ita.

²³ Ket saan laeng a casta, no di ket datayo met, nga addaan cadagiti umuna a bungbunga ti Espiritu, wen, datayo met laeng agsasaibbectayo iti uneg tayo, nga agur-uray iti pannacaibilang nga annac, wenno ti pannacasubbot dagiti bagbagitayo.

²⁴ Ta babaen daytoy a namnama maisalacantayo: ngem ti inanama a makita, isu ti saan nga inanama; ta asino ti aguray iti makitana?

²⁵ Ngem no namnamaentayo ti ditay pay makita ur-urayentayo a siaanus.

²⁶ Casta met a ti Espiritu tulungannatayo iti kinacapuytayo; ta ditay ammo no casano ti panagcararagtayo a cas maiparbeng: ngem ti Espiritu met laeng ibabaetnatayo, a buyugen dagiti ununnoy a dimayebcas;

²⁷ Ngem ti mangsukimat cadagiti puspuso ammona no ania ti tarigagay ti Espiritu; gapu ta isu ibabaetna dagiti sasanto cas iti pagayatan ti Dios.

²⁸ Ket ammotayo a dagiti amin a banbanag agtitimpuyogda nga agaramid a maipaay iti pagimbagan, dagiti agayat iti Dios, dagiti naayaban cas iti panggepna.

²⁹ Ta dagiti naammoanna a sigud, pinilina met ida idi tapno mayaspingda iti ladawan ni Anakna; tapno isu agbalin nga inauna cadagiti adu a cacabsat:

³⁰ Ket dagiti dinutucanna idi, inayabanna met ida; ket dagiti inayabanna pinalintegna met ida; ket dagiti pinalintegna indaydayawna met ida.

Ti panagbal-ligi. No ti Dios isu ti cappontayo asino ti makidangadang cadatayo?

³¹ Ania ngarud ti sao-entayonto cadagitoy a banbanag? no ti Dios adda a bumuyog cadatayo, siasino ti bumusor cadatayo?

³² Daydi saan a nangipaidam iti Anacna met laeng, no di ket inyawatna gapu cadatayo amin, dina aya iparaburto cadatayo dagiti amin a banbanag a mairaman kencuana?

³³ Siasino ti mangidarumto cadagiti pinili ti Dios? Ti Dios ti mangpalinteg;

³⁴ Siasino ti mangipatay iti dusa? Ni Cristo Jesus a natay; nangnangrona, ta isu napagungar cadagiti natay; isu nga adda iti makanawan ti Dios; a mangibabaet met cadatayo.

³⁵ Siasino ti mangisinanto cadatayo iti ayat ni Cristo? tinto ladingit? wenno ti rigat? ti pannakaidadanes? wenno ti bisin? wenno ti kinalamolamo? wenno ti peggad? wenno ti campilan?

³⁶ Cas adda a naisurat: Gapu kenca mapapataycami iti agmalmalem; Maibilangcami a cas cadagiti carcarnero a maipaay iti paguragaan.

³⁷ Saan, no di ket cadagitoy amin a banbanag agbal-ligitayo, pay a naananay, gapu iti daydiay nagayat cadatayo.

³⁸ Ta diac duaduaen nga uray ni patay, uray ti biag, uray dagiti angel, uray dagiti pagturayan, uray dagiti banbanag nga agdama, uray dagiti banbanag nga umayto, uray dagiti pannacabalin,

³⁹ Uray ti nangato, uray ti nababa, uray aniaman a sabsabali a parsua, didatay mabalinto nga isina iti ayat ti Dios, nga adda ken Cristo Jesus nga Apotayo.