Taga-Roma 7 - Ti Biblia (1973)

Macalapsuttay cadagiti daan a bilin, datayo nga agdayaw iti Dios a buyugen ti baro a pakinakem. Ti linteg isu ti mangibaga iti basol. Panagdangadang ti lasag ken ti kinalinteg.

¹ Wenno dicayo ammo aya, cacabsat, (casaoc dagiti macaammo iti linteg) a ti linteg iturayanna laeng ti tao bayat ti caaddana a sibibiag?

² Ta ti babai nga adda asawana, adda a naisinggalut gapu iti linteg ken asawana iti bayat ti panagbiagna; ngem no matay ti asawa a lalaki; ti babai nawayaanen iti linteg iti asawana.

³ Ngarud, no sibibiag pay ti asawa a lalaki, ket ti babai makitipon iti sabali a lalaki, managanto iti makicamcamalala a babai; ngem no ti asawana matay, uray makiasawa iti sabali a lalaki saan a makicamcamalala ta nawayaanen iti linteg.

⁴ Gapuna, dacayo met, cacabsatco, natay cayon iti maipapan iti linteg gapu iti bagi ni Cristo, tapno maicallaysacayo iti sabali nga isu daydi napagungar cadagiti natay; tapno mangpataudtayo iti bunga a maipaay iti Dios.

⁵ Ta idi nagbibiagtayo a linalasag, dagiti calcalicagum a pacabasolan a pinarnuay ti linteg, ginargarida dagiti camcamengtayo tapno agpataudda iti bunga a maipaay ken patay.

⁶ Ngem ita nawayawayaantayon iti linteg, idinto a nataytayon iti daydi nacatenglantayo; iti casta agservitayo iti kinabaro ti espiritu ket saan a babaen iti kinadaan ti letra.

⁷ Ania ngarud ti cunatayo? Basol aya ti linteg? Ni caanoman. Ta diac coma nailasin ti basol, no saan a gapu iti linteg: Ket diac met coma nabigbig ti panagagum, no saan coma a kinuna ti linteg: Dica agagum;

⁸ Ngem ti basol, idi nga adda gundawayna, ginargarinac, gapu iti bilin, cadagiti amin a kita ti agum: ta no awan linteg, ti basol natay.

⁹ Ket siac, nagbibiagac idi nga awan linteg: ngem idi immay ti bilin, ti basol nagungar ket natayac;

¹⁰ Ket ti bilin, a maipaay iti biag, nasaracco a maipaay iti patay.

¹¹ Ta ti basol, idi nga adda gundawayna, gapu iti bilin sinulisugnac, ket gapu kencuana pinataynac.

¹² Iti casta ngarud ti linteg nasantoan, ket ti bilin nasantoan, nalinteg, ken naimbag.

¹³ Ti naimbag ngarud, nagbalin aya caniac nga ipapatay? Ni caanoman; no di ket ti basol tapno agparang a basol, nagpataud caniac ti ipapatay gapu iti naimbag; tapno gapu iti bilin, ti basol mabigbig a dakes unay.

¹⁴ Ta ammotayo a ti linteg isu naespirituan, ngem siac linalasagac, a nalaco iti biang ti basol.

¹⁵ Ta ti ar-aramidec diac maawatan; ta ti saanco a pagayatan isu ti ar-aramidec; ket ti cagurac ar-aramidec pay.

¹⁶ Ngem no aramidec ti saanco a pagayatan, anamungac a ti linteg naimbag.

¹⁷ Ita ngarud saanen a siac ti agaramid iti dayta, no di ket ti basol nga agnaed caniac.

¹⁸ Ta ammoc a saan nga agnaed ti naimbag a banag caniac, cayatco a sao-en, iti lasagco; ta ti panagpanggep nalaca caniac, ngem ti panagtungpal iti naimbag, awan.

¹⁹ Ta ti naimbag a panggeppec diac aramiden, ngem ti dakes a diac panggepen, isu ket di ti ar-aramidec.

²⁰ Ngem no aramidec ti diac pinanggep, saanen a siac ti agar-aramid kencuana, no di ket ti basol nga agnaed caniac.

²¹ Masaracac ngarud daytoy a linteg, nga idinto a tarigagayac nga aramiden ti naimbag, ti dakes sumango caniac.

²² Ta maayayoac iti linteg ti Dios, iti makinuneg a kinataoc:

²³ Ngem makitac ti sabali a linteg cadagiti camcamengco, bumusbusor iti linteg ti nakemco, ket ipannac a sicacayaw iti linteg ti basol, nga adda cadagiti camcamengco.

²⁴ O nacaay-ay-ayac a tao! siasino ti mangluc-atto caniac itoy bagi ni patay?

²⁵ Agyamanac iti Dios gapu ken Jesu-Cristo nga Apotayo. Iti casta ngarud, siac met laeng agserviac a mayannurot iti nakemco iti linteg ti Dios, ngem maiyannurot iti lasagco, iti linteg ti basol.