Taga-Roma 6 - Ti Biblia (1973)

Nataytayon no maipapan iti basol; ngem sibibiag tayo no maipapan iti Dios.

¹ Ania ngarud ti cunatayo? Adtalinaedtayo iti basol, tapno umadu ti parabur?

² Ni caanoman. Daatyo a natay iti basol, casano ti panagbiagtayo pay laeng kencuana?

³ Dicay ammo aya a datayo amin a nabautizaran ken Jesu-Cristo, nabautizarantayo iti ipapatayna?

⁴ Naitanemtayo ngarud a naikanunong kencuana, gapu iti pannacabautizar iti patay: tapno cas iti panagungar ni Cristo cadagiti natay gapu iti dayag ti Ama, casta met a magnatayo coma iti baro a panagbiag.

⁵ Ta no naicanunongtayo kencuana iti caasping ti ipapatayna, mairanudtayto met kencuana iti caasping ti panagungarna;

⁶ Nga ammotayo a ti daan a kinataotayo nailansa iti cruz a naicanunong kencuana, tapno mapucaw iti bagi ti basol, tapno ditayo patagabun iti basol.

⁷ Ta ti natayen gapu iti basol, adda a naluc-atanen iti bosol;

⁸ Ngem no nataytayo a naicanunung ken Cristo, patientayo nga agbiagtayto met a mairanud kencuana;

⁹ Nga ammotayo a ni Cristo, idinto a nagungar cadagiti natay, saan a matayen: Ti ipapatay saanen nga agturay kencuana.

¹⁰ Ta no maipapan iti ipapatay, natay iti naminpinsan maipoon iti basol; ngem no maipapan iti panagbiag, agbiag a maipaay iti Dios.

¹¹ Casta met nga ibilangyo ti bagiyo a natayen iti maipapan iti basol, ngem sibibiag ken Jesu-Cristo a maipaay iti Dios.

¹² Saan coma ngarud nga agari ti basol iti bagitayo a matay tapno tungpalenyo dagiti derrepna:

¹³ Ket dicayo met idaton iti basol dagiti camcamengyo, nga aruaten ti kinadakes; no di ket idatonyo dagiti bagbagiyo met laeng iti Dios, a cas cay la napapungar cadagiti natay, ken dagiti camcamengyo, nga aruaten ti kinalinteg a maipaay iti Dios.

¹⁴ Ta ti basol di agarinto cadacayo; ta awancayo iti babaen ti linteg, no di iti babaen ti parabur.

¹⁵ Ania ngarud? Agbasoltayo, gapu ta awantayo iti babaen ti linteg no di iti babaen ti parabur? Ni caanoman.

¹⁶ Dicay ammo aya nga iti pangidatonanyo a siannugot cadagiti bagbagiyo met laeng isu dayta ti mangadipen cadacayo, uray iti basol tapno ipatay, uray iti kinatuloc a maipaay iti kinalinteg?

¹⁷ Ngem yaman pay iti Dios, ta nupay pinaad-adipencayo idi iti basol, nagbalincayo a natuloc iti pusoyo, iti daydiay kita ti sursuro, a nacasursuroanyo;

¹⁸ Ket idinto a nacalapsutcayo iti basol nagbalincayo nga adipen ti kinalinteg.

¹⁹ Agsaoac cas ugali dagiti tattao, maipoon iti kinacapuy ti lasagyo. Ta cas iti panangidatonyo cadagiti camcamengyo a paadipen iti kinarugit ken kinadakes a maipaay iti basol, casta met ita idatonyo dagiti camcamengyo a paadipen iti kinalinteg a maipaay iti kinasanto.

²⁰ Ta idi dacayo dagiti ad-adipen ti basol, nailapsutcayo iti kinalinteg.

²¹ Ania ngarud ti bunga nga adda cadacayo idi cadagidi a banbanag nga ibainyo ita? ti panungpalan dagidiay a banbanag isu ni patay.

²² Ngem ita, ta naluc-atancayo iti basol ket nagbalincayo nga adipen ti Dios, adda bungayo a maipaay iti kinasanto ket ti panungpalanna, biag nga agnanayon.

²³ Ta dagiti supapac ti basol isu ni patay; ngem ti naparabur a sagut ti Dios isu ti biag nga agnanayon, ken Jesu-Cristo nga Apotayo.