Taga-Roma 5 - Ti Biblia (1973)

Dagiti patauden ti pannacajustificar gapu iti pammati.

¹ Idinto ngarud a mapalintegtayo gapu iti pammati, addaantayo ti pannakicappia, iti Dios, gapu ken Apotayo a Jesu-Cristo:

² Gapu kencuana met addaantayo ti pagsercan gapu iti pammati, itoy a parabur, isu a pagtalinaedantayo a sititibker, ket agrag-otayo ti namnamo iti kayag ti Dios.

³ Ket saan laeng a daytoy; no di ket agrag-otayo met cadagiti rigrigattayo nga ammotayo a ti rigat pataudenna ti anus:

⁴ Ket ti anus, pacasuutan; ket ti pannacasuut, inanama:

⁵ Ket ti inanama saan a pacaibabainan, ta ti ayat ti Dios naiparucpoc cadagiti puspusotayo, gapu iti Espiritu Santo, a naited cadatayo.

⁶ Ta idi nacapsuttayo pay laeng idi tiempo a pannacaipaayna ni Cristo natay gapu cadagiti managdacdakes.

⁷ Ta narasay ti mayat a matay a maipoon iti maysa a nalinteg: nupay adda ngata macaitured a matay gapu iti maysa a tao a naimbag.

⁸ Ngem ti Dios ipatalgedna ti ayatna cadatayo, agsipud ta idinto a managbasoltayo pay laeng, ni Cristo natay gapu cadatayo.

⁹ Nangnangrona pay ngarud, idinto a mapalintegtayon iti darana, maisalacantayto iti pungtot gapu kencuana.

¹⁰ Ta no idinto a cabusortayo, naicappiatayo iti Dios gapu iti ipapatay ti Anacna, nangnangrona pay ita, ta naicappiatayon, maisalacantayto maipuon iti biagna;

¹¹ Ket saan laeng a casta, no di ket agrag-otayo iti Dios, gapu ken Apotayo a Jesu-Cristo, a gapu kencuana inawattayon ita ti pannacaicappia.

Gapu iti maymaysa a tao, immay ti basol ken ipapatay; ket gapu met iti maymaysa a tao, immay ti pannacaisalacan iti basol.

¹² Gapuna, no casano ti iseserrec ti basol ditoy lubong gapu iti maymaysa a tao, ken ti ipapatay gapu iti basol, ket iti casta ti ipapatay immay cadagiti isu-amin a tattao, agsipud ta isuda nagbasolda amin:—

¹³ Ta idi awan pay ti Linteg ti basol addan ditoy lubong; ngem no awan pay ti linteg ti basol saan a maibilang a salungasing.

¹⁴ Nupay casta, nagari ti ipapatay nanipud ken Adan agingga ken Moises, uray pay cadagiti saan a nagbasol, cas iti caasping ti isasalungasing ni Adan; isu a cayarigan ti umayto.

¹⁵ Ngem saan a cas iti salungasing ti parabur a sagut ti Dios; ta no gapu iti babac daydi maysa matayda dagiti adu, ad-adda pay a ti parabur ti Dios ken ti sagut gapu iti naimbag a nakem daydi maysa a tao, ni Jesu-Cristo, wimmadwadda cadagiti adu.

¹⁶ Ket ti sagut saan met a cas iti panagsalungasing ti maysa: ta ti pannacaocom ti maysa nagpaay a pacadusaan; ngem ti parabur a sagut naigapu cadagiti adu a panagsalsalungasing a maipaay iti pannacapalinteg.

¹⁷ Ta no ti ipapatay nagari gapu iti basol daydi maysa, nangnangrona pay, a dagiti immawat iti kinawadwad ti parabur ken ti sagut ti kinalinteg, agaridanto iti biag gapu iti sabali, nga isu ni Jesu-Cristo.

¹⁸ Iti casta ngarud gapu iti maysa a salungasing nagpaay cadagiti amin a tattao ti pannacadusa, casta met gapu iti maysa nga aramid ti kinalinteg, nagpaay cadagiti amin a tattao a pacapalintegan ti biag,

¹⁹ Ta cas gapu iti isusukir ti maysa a tao, dagiti adu naibilangda a managbasol, casta met gapu iti panagtulnog ti maysa, dagiti adu maibilangdanto a nalinteg,

²⁰ Ket ti linteg simrec pay tapno paaduenna coma ti basol; ngem no immadu, ti basol immadu, ti parabur immad-adu pay iti casta unay:

²¹ Tapno, cas ti panagari ti basol ken patay, casta met coma nga agari ti parabur, gapu iti kinalinteg a maipaay iti biag nga agnanayon, gapu ken Jesu-Cristo nga Apotayo.