Taga-Roma 4 - Ti Biblia (1973)

Ni Abraham najustificaran gapu iti pammati.

¹ Ania ngarud ti sao-entayo a maipapan ken Abraham, nga Amatayo a mayannurot iti lasag?

² Ta no ni Abraham napalinteg cadagiti ar-aramid, adda panagpasindayagna, ngem saan a maipapan iti Dios.

³ Ta ania ngarud ti sao-en ti Surat? ni Abraham pinatina ti Dios, ket naibilang kencuana a kinalinteg.

⁴ Ngem iti mangmangged saan a maibilang kencuana a parabur ti tangdanna, no di ket maiparbeng.

⁵ Ket iti saan nga agtrabajo, ngem patienna daydiay mangpalinteg iti managdacdakes, ti pammatina maibilang kencuana a kinalinteg.

⁶ Castamet, uray ni David met laeng ipalawagna ti naimbag a gasat ti tao a pangibilangan ti Dios ti kinalinteg, uray awan dagiti ar-aramidna,

⁷ A cunana: Nagasat dagidiay mapacawan dagiti kinadakesda. Ken dagiti basbasolda maabbunganda.

⁸ Nagasat ti tao, a dinto pangipatayan ti Apo iti basol.

⁹ Daytoy ngarud a naimbag a gasat maipaay laeng aya iti nacugit wenno iti met saan a nacugit? ta cunatayo a ti pammati ni Abraham naibilang kencuana a kinalinteg.

¹⁰ Casano ngarud ti pannacaibilangna kencuana? idi a nacugiten wenno idi saan pay a nacugit? Saan nga idi nacugiten, no di ket idi saan pay a nacugit:

¹¹ Ket inawatna ti pagilasinan ti pannacacugit, a cas tanda ti kinalinteg ti pammati a cupcupicupanna idi di-pay nacugit; tapno isu coma idi ti ama dagiti amin a mamati, uray pay saanda a nacugit: tapno maibilang cadacuada a kinalinteg:

¹² Ken ama ti pannacacugit a saan laeng a cadagiti nacugit, no di ket cadagiti met sumursurot cadagiti tugtuggot ti pammati ni amatayo nga Abraham, nga adda kencuana.

¹³ Ta ti cari ken Abraham, wenno iti capututanna nga isu ti agtawidto iti lubong, saan a gapu iti linteg no di ket maigapu iti kinalinteg ti pammati.

¹⁴ Ta no dagiti sumurot iti linteg isuda ti agtawid, ti pammati rumsua nga awan ti banbanagna, ket ti cari awan capapay-anna:

¹⁵ Ta ti linteg pataudenna ti pungtot: ngem no awan ti linteg, awan met ti pannacasalungasing,

¹⁶ Gapu itoy, ti cari naigapu iti pammati, tapno mayannurot iti parabur; ken tapno mapatalgedan cadagiti isu-amin a capututan; saan laeng a cadagiti sumursurot iti linteg, no di pay ket cadagiti sumursurot met iti pammati ni Abraham nga amatayo amin.

¹⁷ (Cas adda a naisurat: Insaadca nga ama dagiti adu a pagpagarian nacion) iti imatang ti Dios a pinatina a mangpabiag cadagiti natay ket ibilangna dagiti banbanag nga awan pay, a cas la addadan.

¹⁸ Isu namati a siinanama iti saan a mainanaman, a maipoon iti pannacapagbalinna nga ama dagiti adu a nasnacion cas iti naisao kencuana: Cas cadagiti bitbituen ti caputotamto.

¹⁹ Ket saan a nagcapuy iti pammati, ket dina met imbilang ti bagina, a cas la awanen ti cabaelanna (idinto nga agsangagasut idin ti tawenna), ken ti kinabaket unayen ni Sara;

²⁰ No di ket, namati nga awan duaduana iti cari ti Dios ket timmibker iti pammati, nga pinadayawanna ti Dios,

²¹ Ket napnec unay a ti incarina mabalinna met a tungpalen kencuana,

²² Gapuna naibilang met kencuana a kinalinteg.

²³ Ket saan a naisurat a maipaay kencuana laeng ti kinalinteg a naibilang kencuana;

²⁴ No di ket maipaay met cadatayo, a pacaibilangannanto; cadatayo a mamati iti namagungar cadagiti natay ken Jesus nga Apotayo,

²⁵ Isu a nayawat gapu cadagiti babaktayo, ket napagungar tapno pacaibilangantayo a nalinteg.