Taga-Roma 3 - Ti Biblia (1973)

Pacaidumdumaan dagiti Judio:—Kinalinteg ti Dios.

¹ Ania ngarud ti pacaigundawayan dagiti Judio? wenno ania ti magungguna iti pannacacugit?

² Adu dagiti pacaipaayanna: umuna, gapu ta naitalec cadacuada dagiti pacdaar ti Dios.

³ Ta ania ngarud no dagiti dadduma cadacuada nagbanagda nga awan pammatida? ti kinaawan pammatida iccatennanto aya ti kinamatalec ti Dios?

⁴ Ni caanoman: mapapati coma ti Dios uray pay naulbodda coma amin dagiti tattao, cas ti naisurat: Tapno mapalintegca cadagiti saom. Ket agbal-ligica intono umayca iti pangokoman.

⁵ Ngem no ti kinakil-lotayo ilatacna ti kinalinteg ti Dios, ania ti saoentayonto? nakil-lo aya ti Dios a mangipatay ti dusa? (agsaoac a cas iti cadawyan dagiti tattao).

⁶ Ni caanoman: ta casano ngarud ti panangocomto ti Dios iti lubong?

⁷ Ngem no ti kinapudno ti Dios, gapu iti ulbodco, nagbalin a pacaidayawanna, apayapay a mapabasolac pay laeng a cas managbasol?

⁸ Ket apayapay a saan a sao-en (cas iti pannacapabasoltayo, ken cas panecnecan dagiti dadduma a cuncunatayo cano): Aramidentayo coma ti dakes tapno umay ti naimbag? Ti pannacadusa dagitoy, maiparbeng.

Isu-amin dagiti tao addada iti babaen ti pannacabalin ti basol.

⁹ Ania ngarud? Naim-imbagtayo aya ngem isuda? Saan, nicaanoman, ta pinabaclayanmi nga agpadpada dagiti Judios ken dagiti Griegos, nga addada amin iti babaen ti basol;

¹⁰ Cas adda a naisurat: Awan ti nalinteg, uray maysa;

¹¹ Awan ti macaawat, Awan ti agsapul iti Dios;

¹² Simminada amin, nagmaymaysada a nagbalin nga awan kapapay-anda; Awan ti agaramid ti naimbag, awan, uray la coman maymaysa:

¹³ Tanem a silulucat ti carabucobda: Cadagiti dildilada nagaramidda ti ulbod: Gita dagiti ul-uleg ti adda iti baba dagiti bibbibigda;

¹⁴ Ti ngiwatda adda a napno iti lunod ken iti pait:

¹⁵ Dagiti sacsacada naparagsitda a mangibuyat ti dara;

¹⁶ Pannacadadael ken kinadacsangasat ti adda cadagiti daldalanda;

¹⁷ Ket ti dalan ti talna dida naammoan:

¹⁸ Awan ti buteng iti Dios iti sangoanan dagiti matmatada.

¹⁹ Ammotayon a dagup ti sao-en ti linteg, cunaenna cadagiti adda iti babaen ti linteg, tapno amin a ngiwat agumel coma, ket amin a lubong paiturayan coma iti pangngeddeng ti Dios:

²⁰ Agsipud ta, awanto ti lasag a maibilang a nalinteg iti sango ti Dios gapu cadagiti ar-aramid ti linteg: ta gapu iti linteg maipacaammo ti basol.

Ti kinalinteg ti Dios maiparangarang iti ruar ti linteg.

²¹ Ngem ita, naiparangarang ti maysa a kinalinteg ti Dios, iti ruar ti linteg, a mapanecnecan ti Linteg ken dagiti Mammadto;

²² Nadiosan a kinalinteg, a magun-odan gapu iti pammati ken Jesu-Cristo, a maipaay cadagiti amin a mamati, ta awan ti pagdudumaan:

²³ Ta isuda amin nagbasolda ket agcurangda iti dayag ti Dios;

²⁴ Idinto a maibilangda a nalinteg nga awan ti baybayadna gapu iti paraburna, a maaramat ti pannacasubbot nga adda ken Cristo Jesus:

²⁵ Isu nga impaay ti Dios a daton ti pannakicappia, gapu iti pammati iti darana, tapno maiparangarang ti kinalintegna, ta gapu iti kinaanus ti Dios pinalabasna dagiti basbasol a naaramid idi;

²⁶ Tapno ti kinalintegna maiparangarang iti agdama a tiempo; tapno maipakita a nalinteg, ken mangpalinteg iti adda pammatina ken Jesus.

²⁷ Adino ngarud ti yan ti panagpasindayaw? Naiccaten. Gapu iti ania a linteg? ti linteg dagiti aramid? saan, no di ket gapu iti linteg ti pammati.

²⁸ Panungpalenmi ngarud a ti tao maibilang a nalinteg gapu iti pammati, uray awan dagiti ar-aramid ti linteg.

²⁹ Isu Dios laeng aya dagiti Judio? saan aya a Dios met dagiti Gentiles? Wen, Dios met dagiti Gentiles.

³⁰ Ta maymaysa met laeng ti Dios, isu a mangpalintegto iti pannacacugit gapu iti pammati, ken iti saan a pannacacugit gapu iti pammati.

³¹ Pucawentayo ngarud aya ti linteg gapu iti pammati? Nicaanoman, no di ket pagtaginayonentayo ti linteg.