Taga-Roma 2 - Ti Biblia (1973)

Ti saan a Pannacabalin a maisalacan gapu iti linteg.

¹ Gapuna, awan pambarmo, uray siasinoka, O tao, a mangocom, ta iti daydiay met laeng a pangocoman iti sabali, patayam met la ta bagim, agsipud ta sica a mangocom agaramidca met cadagiti cacasta a banbanag.

² Ket ammotayo a ti panangocom ti Dios a maibusor cadagiti agaramid cadagiti cacasta a banbanag isu ti mayannurot iti pudno.

³ Ket pagarupem aya sica, O tao, a mangocom cadagiti agar-aramid cadagiti cacasta a banbanag ket aramidem met ida, a malisiamto ti panangocom ti Dios?

⁴ Wenno laisem aya ti kinabacnang ti imbagna, ti anusna ken ti nabayag a panagituredna, a dica ammo aya a ti kinaimbag ti Dios iturongnaca iti panagbabawi?

⁵ Ngem cas iti mayannurot iti kinasukirmo ken ti pusom a di agbabawi urnongem ti pungtot a maipaay kenca iti aldaw ti pungtot ken ti pannacaiparangarang ti nalinteg a panangocom ti Dios;

⁶ Isu a manggonggonanto iti tunggal maysa iti maitutop cadagiti ar-aramidna:

⁷ Cadagiti agtalinaed iti panagaramid ti naimbag a sapsapulenda ti gloria, ti dayaw ken ti saan nga ipapatay; ti biag nga agnanayon:

⁸ Ngem cadagiti mannakisuppiat a did agtungpal iti pudno, no di ket agtungpalda iti kinakil-lo; ti pungtot ken gura,

⁹ Ladingit ken rigat dagiti lacamento ti amin a cararua ti tao nga agaramid ti dakes, umuna ti Judio ken ti met Griego;

¹⁰ Ngem gloria, dayaw ken talna ti magonggona ti isu-amin nga agaramid ti naimbag, umuna ti Judio ken ti met Griego:

¹¹ Ta awan ti pagdudumaan dagiti tattao iti Dios.

¹² Ta dagup dagiti nagbasol nga awan linteg, mapucawdanto met nga awan linteg; ket dagup dagiti nagbasol iti babaen ti linteg, maocomdanto gapu iti linteg;

¹³ Ta saan a dagiti agdengngeg iti linteg, dagiti nalinteg iti sangoanan ti Dios; no di ket dagiti mangtungpal iti linteg isudanto dagiti majustificar;

¹⁴ (Ta no dagiti Gentiles nga awan lintegda, gapu iti nacaparsuaan a ricna, aramidenda dagiti banbanag ti linteg, dagitoy, uray awan lintegda; isuda ti linteg cadacuada met laeng:

¹⁵ Nga ipakitada ti aramid ti linteg a naisurat cadagiti puspusoda, ti concienciada met laeng mangpanecnec cadacuada, ken dagiti panpanunutda; agpipinnabasolda ken agpipinnambarda.

¹⁶ Intono aldaw a ti Dios ocomennanto dagiti palpalimed dagiti tattao, gapu ken Jesu-Cristo cas mayannurot iti evangelioc.

Dagiti Judio saanda a macapagpambar; ti pudno a panagcugit.

¹⁷ Ngem no managanca a Judio, ket agtalecca iti linteg, ket agpasindayawca iti Dios,

¹⁸ Ket ammom ti pagayatanna, ken mailasinmo dagiti banbanag a nasayaat, a nasursuroanca iti linteg,

¹⁹ Ket agcamatalecca a sica ti mangidaldalan cadagiti bulbulsec, silawca cadagiti adda iti sipnget,

²⁰ Mangisursuroca cadagiti awan ammona, mangad-adalca cadagiti ub-ubbing, nga addaanca ti pagalagadan ti pannacaammo ken ti pudno iti linteg:

²¹ Sica ngarud a mangisuro iti sabali, saanmo aya nga isuro ti bagim met laeng? sica nga iwarragawagmo a di rebbeng ti agtacaw, agtacawca aya?

²² Sica a cuncunam a di rebbeng ti makicamalala, makicamalalaca aya? sica a caguram dagiti saan a pudno a dios, tacawam aya dagiti temtemplo?

²³ Sica nga agpasindayag iti linteg, ibabainmo aya ti Dios gapu iti panangsalungasingmo iti linteg?

²⁴ Ta ti nagan ti Dios matabbaawan iti tengnga dagiti Gentiles gapu cadacayo, cas adda a naisurat.

²⁵ Ta pudno a ti pannacacugit agbanag a pagnam-ayan, no tungpalem ti linteg; ngem no agsukirca iti linteg, ti pannacacugitmo agbalin a saan a pannacacugit.

²⁶ Ngarud no ti saan a pannacacugit tungpalennanto dagiti bilbilin ti linteg, saan aya a maibilangto ti saanna a pannacacugit, a pannacacugit?

²⁷ Ket ti nacaparsuaan a di-pannacacugit, intono tungpalenna ti linteg, dinacanto babalawen aya, idinto nga adda kenca ti letra ken ti pannacacugit, ket sumalungasingca iti linteg?

²⁸ Ta saan a Judio ti naruar laeng a kinajudio ket di met cugit ti narnar laeng a pannacacugit iti lasag:

²⁹ Ngem ti Judio isu ti kinajudio iti uneg, ket ti pannacacugit agtaud iti puso, iti naespirituan ket saan nga iti letra; ti pannacaidayawna saan nga adda ti biang dagiti tattao, no di ket iti Dios.