Taga-Roma 11 - Ti Biblia (1973)

Ti mapasungad a pannacaisubli dagiti Judio.

¹ Cunac ngarud: Pinagtalaw aya ti Dios dagiti tattaona? Ni caanoman: ta siac Israelitaac met capuonan ni Abraham, iti caputotan ni Benjamin,

² Saan a pinagtalaw ti Dios dagiti tattaona, a nailasinna idi. Saanto nga ammo aya ti cuna ti Surat a maipapan ken Elias? no casano ti panagasugna iti Dios a maicaniwas iti Israel, a cunana:

³ Apo, pinatayda dagiti mammadtom ket dinupracda dagiti al-altarmo: ket si-siac laeng ti nabati, ket sapsapulenda toy biagco.

⁴ Ngem ania ti cuna ti nadiosan a sungbat kencuana? Intiddac a maipaay caniac dagiti pito ribo a lallaki, isuda a saan a nagparintumeng iti sangoanan ni Baal.

⁵ Casta met ngarud, ita a pannawen adda natidda a cas iti pannacapili gapu iti parabur.

⁶ Ket no gapu iti parabur, saanen a gapu cadagiti ar-aramid: ta no saan, ti parabur saanen a parabur.

⁷ Ania ngarud? Ni Israel saanna a nagun-odan ti sapsapulenna; ngem dagiti napili nacagun-odda, ket dagiti dadduma napatangkenda:

⁸ Cas iti naisurat: Iniccan ida ti Dios ti espiritu ti talimpungaw, matmata a dida macakita, ken pagdengngeg a dida macangngeg agingga ita nga aldaw.

⁹ Ket cuna ni David: Ti lamisaanda agbalin coma cadacuada a maysa a silo ken maysa a palab-ug, Ken maysa a pacaitibcolan ken maysa a supapac cadacuada:

¹⁰ Agcudrep coma dagiti matmatada tapno dida macakita. Ken agnanayon coma a pagrucubem ti bucotda.

¹¹ Cunac ngarud: Naitibcolda aya tapno madadaelda? Ni caanoman. No saan ket a gapu iti pannacabasolda, immay ti pannacaisalacan cadagiti Gentiles, tapno agimunda.

¹² Ket no ti pannacatnagda isu ti pannacapabacnang ti lubong, ket ti pannacapucawda isu ti pannacapabacnang dagiti Gentiles, dinto nangnangrona ti pannacapunnoda?

¹³ Ngem casaocayo a Gentiles. Gapu ta siac apostolac cadagiti Gentiles, idayawco ti kinaministroc;

¹⁴ Bareng no mabalinco a gargarien iti panagimun dagiti cacabagiac, ken isalacan dagiti dadduma cadacuada.

¹⁵ Ta no ti pannacapagtalawda isu ti pannakicappia ti lubong, anianto ti pannacaawatda, no di biag cadagiti natay.

¹⁶ Ket no ti umuna a bunga nasantoan, casta met ti nacaalaanna; ket no masantoan ti ramut, casta met dagiti sangsanga.

¹⁷ Ngem no dagiti dadduma a sangsanga nasip-acda, ket idinto a maysaca nga olivo nga atap naisulbongca iti puonda, ket makipagtaraonca cadacuada iti ramut ken kinalucmeg ti puon ti olivo;

¹⁸ Saanmo a pagtangsitan dagiti sangsanga: ngem no agtangsitca, saan a sica ti mangtaraon iti ramut no di ket ti ramut ti mangtaraon kenca.

¹⁹ Cunaemto ngarud: Dagiti sangsanga nasip-acda tapno maisulbongac.

²⁰ Nasayaat: gapu iti awan pammati nasip-acda ket gapu iti pammatim agtaengca. Dica agtangsit, no di ket agbutengca:

²¹ Ta no ti Dios saanna a pinacawan dagiti sangsanga a punganay, saannacanto met a pacawanen.

²² Kitaem ngarud ti kinaimbag ken kinainget ti Dios: kinainget cadagiti naiculbo; ngem kenca kinaimbag ti Dios, no agtalinaedca iti kinaimbagna; ket no saan, maputedcanto met.

²³ Ket isuda met, no saanda nga agtalinaed iti kinaawan pammati, maisulbongdanto; ta ti Dios adda pannacabalinna a mangisulbong manen cadacuada.

²⁴ Ta no sica naputedca iti oliva nga atap ket nupay maisupadi iti nacaparsuaan naisulbongca iti nasayaat nga oliva, dinto nangnangrona dagitoy, nga isuda dagiti punganay a sangsanga, maisulbongda iti nacaisigudanda nga oliva?

²⁵ Ta diac cayat a dicay maammoan, cacabsat, daytoy a palimed, tapno dicayo aginsisirib iti kinatangsit, a ti itatangken ti maysa a paset naaramid ken Israel agingga iti macastrec a naan-anay dagiti Gentiles;

²⁶ Ket iti casta isu-amin nga Israel maisalacanto, a cas iti naisurat: Aggapunto idiay Sion ti Manluc-at; Iyadayonanto ken Jacob dagiti kinadakes:

²⁷ Ket daytoy ti tulagco cadacuada, Inton iccatec dagiti basbasolda.

²⁸ No maipapan iti evangelio, cabusorda gapu cadacayo; ngem no maipapan iti pannacapili, ayatenda maipoon cadagiti amma.

²⁹ Ta saan a pagbabawyan ti Dios dagiti sagsagut ken panangawisna.

³⁰ Ta cas cadacayo idi napalabas nga aldaw nasukircayo idi iti Dios, ngem ita nacagun-odcayo iti asi, gapu iti sukirda,

³¹ Casta met dagitoy simmukirda, tapno gapu iti caasi a maited cadacayo, macagun-odda met coma iti caasi.

³² Ta ti Dios, imbilangna amin ida iti kinasukir, tapno mangngaasi coma cadagiti isu-amin.

Pagdaydayaw.

³³ O nagunegen dagiti kinabacnang ti sirib ken ti met pannacaammo ti Dios! ania ketdin ti saan a pannacatucod cadagiti pakinakemna; ken ti saan a pannacasukimat cadagiti cadawyanna!

³⁴ Ta siasino ti nacaammo iti panunot ti Apo? wenno, siasino ti nangbalbalacad kencuana?

³⁵ Wenno siasino ti immun-una a nangted kencuana, tapno masupapacan?

³⁶ Ta dagiti amin a banbanag agtaudda kencuana, gapu kencuana ken maipaayda kencuana. Madaydayaw coma iti agnanayon. Amen.