Taga-Roma 10 - Ti Biblia (1973)

Ti kinalinteg a maipoon iti pammati.

¹ Cacabsat, ti tarigagay ti pusoc ken ti dawatco iti Dios, maipaay cadacuada, tapno maisalacanda coma.

² Ta panecnecac ida nga adda regtada a maipapan iti Dios, ngem saan a cas mayannurot iti sirib.

³ Ta idinto a dida ammo ti kinalinteg ti Dios, ket idinto nga agawaanda nga isaad ti bucudda a kinalinteg, saanda a nagtulnog iti kinalinteg ti Dios.

⁴ Ta ni Cristo isu ti panungpalan ti linteg tapno pacagun-odan ti kinalinteg ti tunggal maysa a mammati.

⁵ Ta ni Moises isuratna a ti tao nga agaramid ti kinalinteg a mayannurot iti linteg, agbiagto gapu kencuana.

⁶ Ngem ti kinalinteg a mayannurot iti pammati castoy ti cunana: Saanmo a cunaen ita pusom: Siasino ti umulinto sadi langit? (Cayatna a sao-en, tapno iyulogna ni Cristo:)

⁷ Wenno, Siasino ti umulogto iti yuyeng? (cayatna a sao-en, tapno iyulina ni Cristo cadagiti natay.)

⁸ Ngem, ania ti cunana? Ti sao adda iti asideg kenca, iti ngiwatmo ken iti pusom; cayatna a sao-en, ti sao ti pammati nga icascasabatayo:

⁹ Agsipud ta no ipudnom babaen ti panagsao a ni Jesus isu ti Apo ket patiem iti pusom a ti Dios pinagungarna cadagiti natay; maisalacancanto:

¹⁰ Ta buyugen ti puso, no mamati ti tao, tapno macagun-od ti kinalinteg, ket iti ngiwat ti pangaramid ti panangipaduyacyac maipaay iti pannacaisalacan.

¹¹ Ta cuna ti Surat: Isu-amin a mamatinto kencuana, saanto a mababainan.

¹² Ta awan ti pagdumaan ti Judio ken Griego: ta maymaysa met laeng ti Apo dagiti isu-amin, ket naparabur cadagiti isu-amin nga umawag kencuana;

¹³ Ta: Siasinoman nga umawagto iti nagan ti Apo, maisalacanto.

¹⁴ Casanonto ngarud ti panangawagda iti daydiay dida pinati? ket casano ti pammatidanto iti daydiay dida nangnangngeg? Ket casanonto ti pannacangngegda, no awan ti mangascasaba?

¹⁵ Ket casano ti panangicascasabadanto, no saandanto a maibaon? cas adda a naisurat: Nagsayaat ketdin dagiti sacsaca dagiti mangyeg cadagiti naragsac a damdamag dagiti naimbag a banbanag!

¹⁶ Ngem saan nga isuda amin impangagda dagiti naimbag a damdamag. Ta cuna ni Isaias: Apo, siasino ti namati iti impadamagmi?

¹⁷ Iti casta, ti pammati agtaud iti panagdengngeg; ket ti panangdengngeg agtaud gapu iti sao ni Cristo.

¹⁸ Ngem cunac: Dida aya nagdengngeg? Wen, kinapudnoanna, Ta: Ti awengda nagsacnap iti amin a daga. Ken dagiti sasaoda agingga cadagiti pungpungto ti lubong.

¹⁹ Ngem cunac: Saan aya a naawatan ti Israel idi? Umuna, cuna ni Moises: Siac pagimonencayto gapu iti saanco nga ili. Gapu iti maysa a pagarian a nanengneng pagpungtotencayto;

²⁰ Ket ni Isaias sibibileg unay, ket cunana: Nasaracandac dagiti saan a nangsapul caniac; Naiparangac cadagiti saan a nagsalsaludsud caniac:

²¹ Ngem no maipapan iti Israel, cunana: Nagmalmalemac a nangigay-at cadagiti im-imac iti maysa a nasukir ken mannakibusor nga ili.