Taga-Filipos 3 - Ti Biblia (1973)

Bagbaga nga maipapan iti panagannad cadagiti saan a pudno a manursuro ken panangigaga cadagiti bunga ti Espiritu. Dagiti ibagana ken balbalacadna.

¹ Camaudiananna, cacabsatco, agrag-ocayo iti Apo. Ti panangisurat cadagidi met la a banag cadacayo, saan a macaalimuteng caniac, ngem cadacayo, pacapatibkeran.

² Annadanyo dagiti asaso, annadanyo dagiti dakes nga agar-aramid, annadanyo ti managcugit:

³ Ta datayo ti pudno a pannacacugit, nga agdayaw babaen ti Espiritu ti Dios ket agrag-o ken Cristo Jesus, ket awan ti panagtalectayo iti lasag:

⁴ Uray siac met mabalinco coma ti agtalec iti lasag no adda siasinoman nga agpanunot nga agtalec iti lasag, nangnangronaac pay.

⁵ A nacugit iti maicawalo nga aldaw, iti capuonan ti Israel, iti caputotan ni Benjamin, Hebreo dagiti Hebreo, ti maipapan iti linteg, Fariseo;

⁶ Ket no maipapan iti regta, nangidadanes iti Iglesia, ket no maipapan iti kinalinteg nga adda iti linteg, awan pacapilawac.

⁷ Ngem dagidiay banbanag a gonggona caniac idi, imbilangco ida a pannacadadael gapu ken Cristo.

⁸ Nangnangrona pay, isu-amin dagiti banag ibilangco ida a pannacadadael, gapu iti napateg unay a pannacaammo ken Cristo Jesus, nga Apoc, a gapu kencuana pinucawco amin, ket ibilangco ida a rugit, tapno magun-odac ni Cristo,

⁹ Ket tapno maaddaac kencuana, a diac cupicupan ti kinalintegco met laeng nga gapu iti linteg, no di ket ti adda gapu iti pammati ken Cristo, ti kinalinteg nga aggapu iti Dios gapu iti pammati:

¹⁰ Tapno maammoac, ni Cristo ken ti pannacabalin ti panagungarna, ken ti pannacaicaddua cadagiti sinagabana, a mayaspingac iti ipapatayna;

¹¹ Bareng iti aniaman a pamay-an magun-odac coma ti panagungar cadagiti natay.

¹² Saan a nacagun-odacon wenno naaananayacon; no di ket agtuluyac, bareng no maalac daydiay gapu a nangalaan met ni Cristo Jesus caniac.

¹³ Cacabsat, diac pagarupen a nagun-odacon; ngem maysa ti aramidec idinto a lipatac dagiti malicudan, camacamec dagiti masangoanan,

¹⁴ Agtarayac a sipipinget nga agturong iti calat, maipuon ti gonggona ti natan-oc a panangawis ti Dios gapu ken Cristo Jesus.

¹⁵ Datayo ngarud amin, a nataenganen, addaantayo coma ti castoy a ricna; ket no maricnayo ti maisupadi daytoy lawlawaganto met ti Dios:

¹⁶ Isuna laeng nga iti nacagtengantayon ituloytayo coma a pagnaan.

¹⁷ Cacabsat, tumuladcayo a sititimpuyog caniac, ket matmatanyo dagidiay casta ti pannagnada ken cas iti pagulidananmi nga adda cadacayo.

¹⁸ Ta adu dagiti magna, isuda nga imbagac a naminadu cadacayo, ket ita ibagac manen a sisasangit cadacayo, nga cabusor ida ti cruz ni Cristo:

¹⁹ A ti panungpalanda isu ti pannacapucaw, a ti diosda isu ti tianda, ket ti dayagda adda iti bainda; isuda panunutenda laeng ti naindagaan.

²⁰ Ta ti pannakipagilitayo adda sadi langit: ket manipud idiay urayentayo met ti Manangisalacan, ni Apo Jesu-Cristo:

²¹ Isu pabaroennanto daytoy nanomo a bagitayo, tapno mayasping iti nadayag a bagina, cas mayalubog iti pannacabalinna met a mangpatulnog a maipaay kencuana met laeng cadagiti isu-amin a banbanag.